ທ່ານເວິ່ນເຈ່ຍປາວ ນາຍົກລັດຖະມົນຕີຈີນເຂົ້າຢ້ຽມຂ່ຳນັບທ່ານຈູມມາລີ ໄຊຍະສອນ ເລຂາທິການໃຫຍ່ພັກປະຊາຊົນປະຕິວັດລາວ ປະທານປະເທດສປປລາວ
ວັນທີ5ພະຈິກນີ້ຢູ່ທີ່ນະຄອນຫຼວງວຽງຈັນ,ທ່ານເວິ່ນເຈ່ຍປາວ ນາຍົກລັດຖະມົນຕີຈີນໄດ້ເຂົ້າຢ້ຽມຂ່ຳນັບທ່ານ ຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດສປປລາວ.
ທ່ານເວິ່ນເຈ່ຍປາວໄດ້ນຳເອົາຄຳຢື້ຢາມຖາມຂ່າວອັນສະໜິດສະໜົມທີ່ທ່ານຫູຈິນທາວ ເລຂາທິການໃຫຍ່ສູນກາງພັກກອມມູນິດຈີນຝາກນຳທ່ານມາໄປເຖິງທ່ານຈູມມາລີໄຊຍະສອນ.ທ່ານເວິ່ນເຈ່ຍປາວກ່າວວ່າ:ລາວເປັນເຈົ້າພາບຈັດກອງປະຊຸມສຸດຍອດອາຊີ-ເອີຣົບແລະໄດ້ເຂົ້າເປັນສະມາຊິກອົງການການຄ້າໂລກ,ອັນໄດ້ສ່ອງແສງໃຫ້ເຫັນເຖິງປະເທດລາວມີການພັດທະນາທີ່ຈະເລີນຮຸ່ງເຮືອງແລະເປີດປະຕູສູ່ພາຍນອກ,ຈີນຂໍສະແດງຄວາມຊົມເຊີຍຢ່າງສຸດໃຈ.ໃນຊຸມປີມໍ່ໆມານີ້,ຈີນແລະລາວໄດ້ຮັກສາການໄປມາຫາສູ່ກັນລະຫວ່າງການນຳຂັ້ນສູງຢ່າງຫຼວງຫຼາຍ,ໄດ້ບັນລຸຄວາມຮັບຮູ້ທີ່ຄືກັນຫຼາຍຢ່າງ,ແລະໄດ້ຊຸກຍູ້ໃຫ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດຂະຫຍາຍຕົວກ້າວສູ່ລວງເລິກຢ່າງບໍ່ຢຸດຢັ້ງ.ພາຍໃຕ້ສະພາບການໃນປະຈຸບັນ,ການເຮັດວຽກຫຼາຍດ້ານໃຫ້ໄດ້ຮັບຜົນດີແມ່ນມີຄວາມສຳຄັນເປັນພິເສດຄືໜຶ່ງແມ່ນສືບຕໍ່ໃຫ້ການສະໜັບສະໜູນຊຶ່ງກັນແລະກັນຢ່າງເດັດດ່ຽວໜຽວແໜ້ນໃນບັນຫາກ່ຽວກັບຜົນປະໂຫຍດໃຈກາງຂອງຕົນ,ສອງແມ່ນເປີດກວ້າງການຮ່ວມມືຕົວຈິງບົນພື້ນຖານທີ່ສະເໝີພາບແລະຕ່າງຝ່າຍຕ່າງມີຜົນປະໂຫຍດ,ສາມແມ່ນເພີ່ມທະວີຄວາມສາມັກຄີແລະຄວາມໄວ້ເນື້ອເຊື່ອໃຈກັນລະຫວ່າງຈີນກັບອາຊຽນ,ສີ່ແມ່ນລົງເລິກການຮ່ວມມືໃນການປະຕິບັດກົດໝາຍເພື່ອປ້ອງກັນຄວາມປອດໄພໃນການເດີນເຮືອຕາມລ້ຳແມ່ນ້ຳຂອງ.
ທ່ານຈູມມາລີໄຊຍະສອນໄດ້ຝາກຄວາມຢື້ຢາມຖາມຂ່າວອັນສະໜິດສະໜົມນຳທ່ານເວິ່ນເຈ່ຍປາວເພື່ອສົ່ງໄປຍັງທ່ານຫູຈິນທາວ ເລຂາທິການໃຫຍ່ສູນກາງພັກກອມມູນິດຈີນແລະຂອບໃຈນຳຈີນທີ່ໃຫ້ການຊ່ວຍເຫຼືອດ້ວຍນ້ຳໃຈໄມຕີຈິດເອື້ອເຟື້ອເຜື່ອແຜ່ແລະການສະໜັບສະໜູນອັນປະເສີດແກ່ປະເທດລາວຕະຫຼອດໄລຍະເວລາອັນຍາວນານ.ທ່ານຈູມມະລີໄຊຍະສອນກ່າວວ່າ,ໃນຊຸມປີມໍ່ໆມານີ້,ການພົວພັນລາວຈີນໄດ້ຂະຫຍາຍຕົວຢ່າງຮອບດ້ານແລະກ້າວສູ່ລວງເລິກ,ໄດ້ນຳເອົາຄວາມຜາສຸກມາແກ່ປະຊາຊົນສອງຊາດ.ລາວຍິນດີຮ່ວມມືກັບຈີນຢ່າງໃກ້ຊິດເພື່ອຊຸກຍູ້ໃຫ້ການພົວພັນລະຫວ່າງອາຊຽນກັບຈີນຂະຫຍາຍຕົວກ້າວໄປໜ້າຢ່າງບໍ່ຢຸດຢັ້ງ.ທ່ານຈູມມາລີໄຊຍະສອນຍັງໄດ້ກ່າວອວຍພອນໃຫ້ກອງປະຊຸມໃຫຍ່ຄັ້ງທີ18ຂອງພັກກອມມູນິດຈີນຈົ່ງໄດ້ຮັບຜົນສຳເລັດຢ່າງຈົບງາມ,ແລະເຊື່ອໝັ້ນວ່າພາຍໃຕ້ການນຳພາຂອງພັກກອມມູນິດຈີນ,ພາລະກິດສັງຄົມນິຍົມທີ່ມີສີສັນພິເສດຂອງຈີນຈະໄດ້ຮັບຜົນສຳເລັດຫຼາຍກວ່າເກົ່າ.
ທ່ານເວິ່ນເຈ່ຍປາວກ່າວວ່າ:ຈີນຍິນດີຮ່ວມກັບລາວເພີ່ມທະວີການແລກປ່ຽນບົດຮຽນໃນດ້ານການປົກຄອງບໍລິຫານປະເທດ,ຂໍອວຍພອນໃຫ້ປະເທດລາວຈົ່ງໄດ້ຮັບຜົນສຳເລັດອັນໃໝ່ຕາມເສັ້ນທາງສ້າງສາສັງຄົມນິຍົມ.
