ກອງປະຊຸມສຸດຍອດອາຊີເອີຣົບຄັ້ງທີໄຂຂຶ້ນຢ່າງເປັນທາງການ
ຕອນບ່າຍວັນທີ 5 ພະຈິກນີ້, ທີ່ນະຄອນຫຼວງວຽງຈັນ, ກອງປະຊຸມສຸດຍອດອາຊີເອີຣົບຄັ້ງທີ 9 ຫຼືອາເຊັມ 9 ທີ່ປະເທດລາວເປັນເຈົ້າພາບໄດ້ໄຂຂຶ້ນຢ່າງເປັນທາງການ. ໂດຍໃຫ້ກຽດເຂົ້າຮ່ວມມີປະມຸກລັດ, ຫົວໜ້າລັດຖະບານ, ລັດຖະມົນຕີວ່າການແລະລັດຖະມົນຕີຊ່ວຍວ່າການຈາກປະເທດຕ່າງໆຂອງສອງທະວີບອາຊີແລະເອີຣົບ, ພ້ອມດ້ວຍຜູ້ຕາງໜ້າຂັ້ນສູງຂອງອົງການຈັດຕັ້ງສາກົນໃນໂລກແລະສື່ມວນຊົນປະເທດຕ່າງໆລວມ3000ກວ່າຄົນ.
ໃນພິທີໄຂກອງປະຊຸມ, ທ່ານຈູມມາລີ ໄຊຍະສອນ, ປະທານປະເທດລາວໄດ້ຂຶ້ນກ່າວສູນທອນພົດ, ໂດຍສະແດງຄວາມຂອບໃຈຢ່າງເລິກເຊິ່ງມາຍັງບັນດາຄູ່ຮ່ວມມືອາເຊັມທີ່ມາເຂົ້າຮ່ວມກອງປະຊຸມອາເຊັມ9.
ທ່ານຈູມມະລີກ່າວວາ: ປັດຈຸບັນ, ສະພາບການເມືອງແລະຄວາມໝັ້ນຄົງຢູ່ບາງຈຸດແລະບາງພາກພື້ນຍັງມີຄວາມສັບສົນຢູ່, ມວນມະນຸດກໍ່ພວມປະສົບກັບໄພອັນຕະລາຍໃໝ່ຫຼາຍປະການ, ເຊັ່ນ, ຄວາມບໍ່ໝັ້ນຄົງທາງດານສະບຽງອາຫານ, ຄວາມບໍ່ໝັ້ນຄົງທາງພະລັງງານແລະອືນໆ.
ສິ່ງເຫຼົ່ານັ້ນ, ມັນຮຽກຮ້ອງໃຫ້ສອງທະວີບຂອງພວກເຮົາຕ້ອງໄດ້ເພີ່ມທະວີກນປຶກສາຫາລືກັນ, ແລະປະສານສົມທົບກັນ ເພື່ອພ້ອມກັນຄົ້ນຄວ້າຊອກຫາຮູບການພັດທະນາທີ່ຍືນຍົງແບບໃໝ່ ທີ່ສອດຄ່ອງກັບສະພາວະຄວາມເປັນຈິງຂອງໂລກໃນປະຈຸບັນ, ເຮັດໃຫ້ປະຊາຊົນຂອງພວກເຮົາໄດ້ດຳລົງຊີວິດຢູ່ໃນສັນຕິພາບແລະຄວາມສົມບູນພູນສຸກ, ພ້ອມກັນນັ້ນ, ກໍ່ສະກັດກັ້ນບໍ່ໃຫ້ວິກິດການເສດະກິດການເງິນກາຍເປັນຮອບວົງຈອນທີ່ຊ້ຳແລ້ວຊ້ຳອີກ.
ທ່ານຈຸມມາລີ ໄຊຍະສອນກ່າວວ່າ: ໃນ 16 ປີທີ່ຜ່ານມາ, ອາເຊັມໄດ້ກາຍເປັນເວທີໜຶ່ງທີ່ສຳຄັນໃນການປຶກສາຫາລືບັນຫາຍຸດທະສາດຕ່າງໆ, ເພື່ອເພີ່ມທະວີຄວາມເຂົ້າໃຈກັນ, ຄວາມໄວ້ເນື້ອເຊື່ອໃຈກັນ, ສົ່ງເສີມການຮ່ວມມືທີ່ກວ້າງຂວາງແລະສ້າງສັນ, ແນໃສ່ເຮັດໃຫ້ປະຊາຊົນອາຊີແລະເອີຣົບໄດ້ດຳລົງຄົງຕົວຢູ່ໃນສັນຕິສຸກ, ມີມິດໄມຕີຕໍ່ກັນ, ແລະຢູ່ໃນຄວາມຈະເລີນຮຸ່ງເຮືອງ, ສົມບູນພູນສຸກ. ຂ້າພະເຈົ້າຫວັງຢ່າງຍິງວ່າ,ກອງປະຊຸມອາເຊັມ 9 ນີ້ຈະພ້ອມກັນປຶກສາຫາລື, ແລກປ່ຽນບົດຮຽນເຊິ່ງກັນແລະກັນ, ຖ່າຍທອດປະສົບການໃຫ້ກັນແລະກັນ, ພ້ອມກັນຊອກຫາວິທີການທີ່ແທດເໝາະ ເພື່ອສະກັດກັ້ນຜົນກະທົບຂອງວິກິດການເສດຖະກິດການເງິນຂອງໂລກ, ຊຸກຍູ້ການພັດທະນາຂອງສອງທະວີບໃຫ້ກ້າວຂຶ້ນຢ່າງແຂງແຮງກວ່າເກົ່າ, ຕອບສະໜອງຄວາມມຸ້ງມາດປາຖະໜາຂອງປະຊາຊາດທີ່ຢາກມີຊີວິດການເປັນຢູ່ທີ່ດີຂຶ້ນແລະຍືນຍົງຍາວນານ."
ໃນສຸດທ້າຍ, ທ່ານກ່າວຕື່ມອີກວ່າ:"ຂ້າພະເຈົ້າເຊື່ອມໝັ້ນວ່າ, ການປຶກສາຫາລືລະດັບສູງໃນກອງປະຊຸມອາເຊັມ 9 ຄັ້ງນີ້ຈະປະສົບຜົນສຳເລັດຢ່າງຈົບງາມ, ແລະບັນລຸເປົ້າໝາຍໃນການສົ່ງເສີມສັນຕິພາບ, ການຮ່ວມມືແລະການພັດທະນາໂດຍປິ່ນອ້ອມຄຳຂວັນຂອງກອງປະຊຸມສຸດຍອດຄັ້ງນີ້ວ່າ"ເພື່ອນມິດເພື່ອສັນຕິພາບ, ຄູ່ຮ່ວມມືເພື່ອຄວາມສົມບູນພູນສຸກ."
