ທ່ານເວີ່ນເຈຍປາວເຂົ້າຮ່ວມແລະກ່າວຄຳປາໄສໃນກອງປະຊຸມຜູ້ນຳຄັ້ງທີ 2 ຂອງກອງປະຊຸມສຸດຍອດອາເຊັມຄັ້ງທີ 9
ຕາມຂ່າວສານຊີນຮວາ:ວັນທີ 6 ພະຈິກນີ້,ຢູ່ທີ່ນະຄອນຫຼວງວຽງຈັນ,ທ່ານເວີ່ນເຈຍປາວ,ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມຜູ້ນຳຄັ້ງທີ 2 ຂອງກອງປະຊຸມສຸດຍອດອາເຊັມຄັ້ງທີ 9,ແລະໄດ້ກ່າວຄຳປາໄສກ່ຽວກັບບັນຫາຕ່າງໆໃນທົ່ວໂລກ.
ທ່ານເວີ່ນເຈຍປາວກ່າວວ່າ:ປະຈຸບັນນີ້,ສະຖານະການສາກົນສືບຕໍ່ມີການປ່ຽນແປງອັນເລິກເຊິ່ງແລະສັບສົນ,ບັນຫາຕ່າງໆໃນທົ່ວໂລກເຊັ່ນ:ຄວາມປອດໄພດ້ານພະລັງງານແລະອາຫານ,ການປ້ອງກັນແລະຫຼຸດຜ່ອນໄພທຳມະຊາດ,ການປ່ຽນແປງຂອງດິນຟ້າອາກາດແລະບັນຫາອື່ນໆຍັງພົ້ນເດັ່ນຢູ່ຄືເກົ່າ,ໄດ້ນຳເອົາສິ່ງທ້າທາຍມາສູ່ການຟື້ນຟູເສດຖະກິດໂລກຢ່າງຮອບດ້ານແລະການພັດທະນາແບບຍືນຍົງຂອງບັນດາປະເທດອາຊີແລະເອີຣົບ.
ທ່ານເວີ່ນເຈຍປາວຊີ້ອອກວ່າ:ຄວາມປອດໄພດ້ານພະລັງງານແມ່ນບັນຫາອັນສຳຄັນທີ່ກ່ຽວພັນເຖິງເສດຖະກິດແຫ່ງຊາດ,ຊີວິດການເປັນຢູ່ແລະຄວາມສົມບູນພູນສຸກຂອງປະຊາຊົນ,ມີຄວາມໝາຍອັນສຳຄັນຕໍ່ການຮັບປະກັນການຟື້ນຟູເສດຖະກິດໂລກຢ່າງຮອບດ້ານແລະການພັດທະນາແບບຍືນຍົງ.ປະເທດທີ່ຜະລິດ,ບໍລິໂພກແລະຂົນສົ່ງພະລັງງານຂອງອາຊີແລະເອີຣົບຄວນທຳຄວາມພະຍາຍາມຮ່ວມກັນ,ສ້າງທັດສະນະຄວາມປອດໄພດ້ານພະລັງງານທີ່ຮ່ວມມືແລະຕ່າງຝ່າຍຕ່າງມີຜົນປະໂຫຍດ,ພັດທະນາແບບຫຼາຍຝ່າຍແລະຮັບປະກັນດ້ວຍການປະສານງານ.ຄວນອອກແຮງພັດທະນາພະລັງງານສະອາດແລະພະລັງງານໝູນວຽນ,ຊຸກຍູ້ໂຄງປະກອບພະລັງງານໃຫ້ດີຂຶ້ນ,ເຮັດໃຫ້ລາຄາພະລັງງານມີຄວາມໝັ້ນທ່ຽງ,ຮັກສາລະບຽບການອັນເປັນປົກກະຕິຂອງຕະຫຼາດພະລັງງານ;ປະຢັດພະລັງງານແລະເພີ່ມປະສິດທິຜົນ,ຊຸກຍູ້ການສ້າງຮູບການການຜະລິດແລະຮູບການບໍລິໂພກແບບປະຢັດ.
ທ່ານເວີ່ນເຈຍປາວກ່າວວ່າ,ປະເທດອາຊີໄດ້ມີບົດຮຽນໃນການຕ້ານໄພທຳມະຊາດຢ່າງຫຼວງຫຼາຍ,ປະເທດເອີຣົບມີຜະລິດຕະພັນຫຼຸດຜ່ອນແລະກູ້ໄພທີ່ມີເຕັກນິກສູງ,ສອງຝ່າຍຄວນເພີ່ມທະວີການຮ່ວມມືໃນຂົງເຂດປ້ອງກັນແລະຫຼຸດຜ່ອນໄພທຳມະຊາດ.
ພາຍຫຼັງທ່ານເວີ່ນເຈຍປາວໄດ້ເຂົ້າຮ່ວມກອງປະຊຸມສຸດຍອດອາເຊັມຄັ້ງທີ 9 ທີ່ຈັດຂຶ້ນຢູ່ນະຄອນຫຼວງວຽງຈັນແລະສຳເລັດການຢ້ຽມຢາມລາວຢ່າງເປັນທາງການແລ້ວ,ທ່ານໄດ້ເດີນທາງດ້ວຍເຮືອບິນພິເສດກັບຄືນເຖິງປັກກິ່ງໃນວັນທີ 6 ພະຈິກນີ້.
