ຕອນບ່າຍວັນທີ6ພະຈິກນີ້, ກອງປະຊຸມສຸດຍອດອາຊີເອີຣົບຄັ້ງທີ9ຫຼືອາເຊັມ9ທີ່ຈັດຂຶ້ນຢູ່ນະຄອນຫຼວງວຽງຈັນເປັນເວລາ2ວັນໄດ້ສິ້ນສຸດລົງດ້ວຍຜົນສຳເລັດອັນຈົບງາມ.ໃນກອງປະຊຸມຄັ້ງນີ້, ໄດ້ຮັບຮອງເອົາເອກະສານ2ສະບັບທີ່ສຳຄັນ,ຄື:ຖະແຫຼງການວຽງຈັນວ່າດ້ວຍການຮັດແໜ້ນການເປັນຄູ່ຮ່ວມມືເພື່ອສັນຕິພາບແລະການພັດທະນາ,ແລະ ບົດຖະແຫຼງຂອງປະທານກອງປະຊຸມສຸດຍອດອາເຊັມຄັ້ງທີ9.
ໃນງານຖະແຫຼງຂ່າວພາຍຫຼັງພິທີອັດປະຊຸມ,ທ່ານທອງສິງ ທຳມະວົງ,ນາຍົກລັດຖະມົນຕີຂອງລາວປ,ທັງເປັນປະທານກອງປະຊຸມ,ໄດ້ແຈ້ງເຖິງຜົນສຳເລັດຂອງກອງປະຊຸມຄັ້ງນີ້ວ່າ, ໃນກອງປະຊຸມສຸດຍອດອາເຊັມ9ຄັ້ງນີ້, ບັນດາຜູ້ນຳອາເຊັມໄດ້ເຫັນດີຮ່ວມກັນວ່າ,ບັນດາປະເທດສະມາຊິກຈະຄົງຢູ່ຮ່ວມກັນໃນສັນຕິພາບແລະສ້າງໃຫ້ມີສະຖຽນລະພາບອັນໝັ້ນຄົງຍາວນານໃຫ້ແກ່ປະຊາຊົນ,ລົບລ້າງສົງຄາມອອກຈາກມວນມະນຸດ,ບໍ່ໃຊ້ກຳລັງຕໍ່ກັນ, ບໍ່ແຊກແຊງເຂົ້າໃນກິດຈະການພາຍໃນຂອງກັນແລະກັນ, ແກ້ໄຂບັນຫາຄວາມຂັດແຍ່ງຕ່າງໆດ້ວຍສັນຕິວິທີ.ນັບຖືສິດຂອງປະຊາຊົນອາເຊັມໃນການເລືອກລະບອບການເມືອງ, ເສດຖະກິດ,ສັງຄົມຂອງຕົນເອງ.ບັນດາຜູ້ນຳສະມາຊິກອາເຊັມໄດ້ເຫັນດີເຫັນພ້ອມກັນໃນການນັບຖືສິດຂອງປະຊາຊົນອາເຊັມໃນການເລືອກລະບອບການເມືອງ, ເສດຖະກິດ,ສັງຄົມຂອງຕົນເອງ.
ນອກຈາກນັ້ນ, ບັນດາຜູ້ນຳອາເຊັມຍັງຕົກລົງແລະຮ່ວມມືກັນເພື່ອການພັດທະນາທີ່ຍືນຍົງ,ຮັບປະກັນໃຫ້ການເຕີບໂຕທາງເສດຖະກິດທີ່ໝັ້ນທ່ຽງ, ເພື່ອສ້າງຄວາມກົມກຽວກັບການພັດທະນາທາງສັງຄົມ,ແລະການປົກປັກຮັກສາສະພາບແວດລ້ອມ.
ກອງປະຊຸມສຸດຍອດອາເຊັມ9ຈັດຂຶ້ນແຕ່ວັນທີ5ຫາວັນທີ6ພະຈິກນີ້ຢູ່ນະຄອນຫຼວງວຽງຈັນ, ໂດຍມີຫົວຂໍ້ວ່າ: "ເພື່ອນມິດເພື່ອສັນຕິພາບ,ຄູ່ຮ່ວມມືເພື່ອຄວາມສົມບູນພູນສຸກ", ໄດ້ມີຜູ້ນຳຂອງ51ສະມາຊິກມາເຂົ້າຮ່ວມ,ໃນກອງປະຊຸມຄັ້ງນີ້ໄດ້ຮັບເອົາ3ປະເທດ,ຄື ບັງກາລະເດັດ,ສະວິສແລະນອກແວເຂົ້າເປັນສະມາຊິກໃໝ່.ກອງປະຊຸມສຸດຍອດອາເຊັມຄັ້ງຕໍ່ໄປຄືຄັ້ງທີ10ຈະແມ່ນສະຫະພາບເອີລົບເປັນເຈົ້າພາບຈັດຂຶ້ນໃນປີ2014.
