ໂຄງການກໍ່ສ້າງເຂື່ອນໄຟຟ້າໄຊຍະບູລີຈັດພິທີວາງສີລາລືກ
ຫວ່າງມໍ່ໆມານີ້ ທີ່ແຂວງໄຊຍະບູລີ ໄດ້ຈັດພິທີວາງສີລາລືກໂຄງການສ້າງເຂື່ອນໄຟຟ້າໄຊຍະບູລີຂື້ນຢ່າງເປັນທາງການ ໂດຍການເຂົ້າຮ່ວມຂອງ ທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດ, ພ້ອມດ້ວຍບັນດາລັດຖະມົນຕີວ່າການ, ລັດຖະມົນຕີຊ່ວຍວ່າການ, ເຈົ້າແຂວງໄຊຍະບູລີ ແລະ ເຈົ້າແຂວງ ຫລວງພະບາງ ພ້ອມດ້ວຍພາກສ່ວນທີ່ກ່ຽວຂ້ອງຫຼາຍຮ້ອຍຄົນເຂົ້າຮ່ວມ.
ໂຄງການໄຊຍະບູລີນີ້ແມ່ນນອນໃນແຜນພັດທະນາໄຟຟ້ານ້ຳຕົກຂອງລາວ ຖືເປັນໂຄງການຂະໜາດໃຫຍ່, ມີສະມັດຕະພາບສູງ, ທັງຈະໄດ້ລາຍຮັບເຂົ້າສູ່ປະເທດຕະຫຼອດໄລຍະການສຳປະທານຫຼາຍກວ່າ3ຕື້ໂດລາສະຫະລັດເພື່ອປະກອບສ່ວນເຂົ້າໃນງົບປະມານລັດ. ນອກນັ້ນ ຍັງເປັນຜົນດີຕໍ່ປະຊາຊົນທີ່ຢູ່ອ້ອມຂ້າງນຳອີກ.
ໂຄງການນີ້ແມ່ນຈະມີການສ້າງເຂື່ອນຕັນລຳແມ່ນ້ຳຂອງ ເຊິ່ງເປັນແມ່ນ້ຳສາກົນ, ດັ່ງນັ້ນ, ເລີ່ມແຕ່ຫົວທີ, ລັດຖະບານກໍ່ໄດ້ມີການປະສານສົມທົບກັບຜູ້ພັດທະນາໂຄງການ ເພື່ອສຶກສາຄົ້ນຄວ້າກ່ຽວກັບຜົນກະທົບຕໍ່ສິ່ງແວດລ້ອມ, ທັງເອົາໃຈໃສ່ປະຕິບັດຂັນຕອນຕ່າງໆຕາມສັນຍາແມ່ນ້ຳຂອງ1995ຢ່າງຄົບຖ້ວນ.
ປະຈຸບັນ ແມ່ນໄດ້ຮັບການຢັ້ງຢືນຢ່າງໜັກແໜ້ນວ່າ, ໂຄງການໄດ້ຜ່ານການປະຕິບັດຂັ້ນຕອນຕ່າງໆຢ່າງຖືກຕ້ອງແລະຄົບຖ້ວນ, ການອອກແບບໄດ້ມີການປັບປຸງເປັນຢ່າງດີ. ໄດ້ຜ່ານການທົດສອບແບບຈຳລອງຂອງເຂື່ອນຢ່າງມີຜົນສຳເລັດ, ຍ້ອນແນວນັ້ນ, ບັນດາປະເທດເພື່ອນມິດຈຶ່ງບໍ່ຂັດຂ້ອງ, ໃນທີສຸດ ລັດຖະບານຈຶ່ງມີຄວາມໝັ້ນໃຈ ແລະ ຕັດສິນໃຈພັດທະນາໂຄງການນີ້
