ທ່ານດຣ.ທອງລຸນສີສຸລິດຈະເດີນທາງໄປຮວມບັນດາກອງປະຊຸມລະດັບລັດຖະມົນຕີຕາງປະເທດອາຊຽນ
ໃນວັນທີ 16 ພະຈິກ 2012, ທ່ານ ດຣ. ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດລາວ ຈະໄດ້ນຳພາຄະນະຜູ້ແທນ ລາວ ອອກເດີນທາງໄປຮ່ວມກອງປະຊຸມລັດຖະມົນຕີຕ່າງປະເທດອາຊຽນ, ກອງປະຊຸມສະພາການເມືອງ-ຄວາມໝັ້ນຄົງອາຊຽນຄັ້ງທີ 8, ກອງປະຊຸມສະພາປະສານງານອາຊຽນຄັ້ງທີ 11 ຊຶ່ງຈະໄດ້ຈັດຂຶ້ນໃນວັນທີ 16-17 ພະຈິກ2012 ທີ່ ນະຄອນຫຼວງພະນົມເປັນ, ກຳປູເຈຍ. ຈຸດປະສົງຂອງ 3ກອງປະຊຸມດັ່ງກ່າວແມ່ນເພື່ອກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 21 ແລະ ບັນດາກອງປະຊຸມສຸດຍອດທີ່ກ່ຽວຂ້ອງຊຶ່ງຈະຈັດຂຶ້ນໃນວັນທີ 18-20 ພະຈິກ 2012 ທີ່ພະນົມເປັນ.
ໃນໂອກາດນີ້,ທ່ານຮອງນາຍົກ ດຣ. ທອງ ລຸນ ສີສຸລິດ ຈະໄດ້ແຈ້ງໃຫ້ກອງປະຊຸມຊາບກ່ຽວກັບການປະກອບສ່ວນຂອງ ລາວ ໃນການສ້າງປະຊາຄົມການເມືອງ-ຄວາມຫມັ້ນຄົງອາຊຽນເຊັ່ນ: ລາວໄດ້ໃຫ້ສັດຕະຍາບັນສົນທິສັນຍາອາຊຽນວ່າດ້ວຍການຕ້ານການກໍ່ການຮ້າຍໃນວັນທີ 12 ພະຈິກ 2012 ແລະ ໃນປີ 2013 , ລາວ ຈະເປັນເຈົ້າພາບ 3 ກອງປະຊຸມພາຍໃຕ້ປະຊາຄົມການເມືອງ-ຄວາມຫມັ້ນຄົງອາຊຽນຄື:ກອງປະຊຸມຂອງລັດຖະມົນຕີຮັບຜິດຊອບວຽກງານອາດສະຍາກຳຂ້າມຊາດອາຊຽນຄັ້ງທີ 9, ກອງປະຊຸມຫົວໜ້າທະຫານອາກາດອາຊຽນຄັ້ງທີ 10 ແລະ ກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນຄັ້ງທີ 15.
ພາຍຫລັງສຳເລັດການເຂົ້າຮ່ວມ 3 ກອງປະຊຸມກະກຽມນີ້ແລ້ວ , ທ່ານຮອງນາຍົກ ດຣ. ທອງລຸນ ສີສຸລິດ ຈະໄດ້ຕິດຕາມທ່ານນາຍົກລັດຖະມົນຕີ ທອງສິງ ທຳມະວົງ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 21 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ.
