ທ່ານສີຈິ້ນຜິງກ່າວວ່າ ຕ້ອງໃຫ້ຄຳຕອບທີ່ເພີ່ງພໍໃຈໃຫ້ປະຊາຊົນ
ຕອນເຊົ້າວັນທີ15ພະຈິກນີ້,ຢູ່ຫໍສະພາປະຊາຊົນ,ທ່ານສີຈິ້ນຜິງ,ເລຂາທິການໃຫຍ່ສູນກາງພັກຄອມມູນິດຈີນທີ່ຫາກໍໄດ້ຮັບເລືອກຕັ້ງ,ໄດ້ນຳພາກຳມະການປະຈຳກົມການເມືອງສູນກາງພັກຄອມນູດຈີນຊຸດໃໝ່ພົບກັບນັກຂ່າວຈີນແລະຕ່າງປະເທດ.ທ່ານສີຈິ້ນຜິງໄດ້ຕາງ ໜ້າສະມາຊິກອົງການນຳຊຸດໃໝ່ຂອງສູນກາງພັກຄອມມູນິດຈີນກ່າວຄຳປາໄສ.ໃນຄຳປາໄສໃນຄັ້ງນີ້,ທ່ານໄດ້ກ່າວຢ້ຳໄປຢ້ຳມາຫຼາຍໆຄັ້ງເຖິງຄຳທີ່ວ່າ "ພາລະໜ້າທີ່"ແລະ "ປະຊາຊົນ".
ທ່ານສີຈິ້ນຜິງກ່າວວ່າ: "ພາລະໜ້າທີ່ອັນໜັກໜ່ວງນີ້ແມ່ນພາລະໜ້າທີ່ທີ່ມີຕໍ່ປະຊາຊາດ.ພາລະໜ້າທີ່ຂອງພວກຂ້າພະເຈົ້າແມ່ນ,ຕ້ອງສາມັກຄີແລະນຳພາສະມາຊິກທົ່ວພັກແລະປະຊາຊົນບັນດາເຜົ່າໃນທົ່ວປະເທດ,ຮັບໄມ້ຕໍ່ແຮງໃນປະຫວັດສາດ,ສືບຕໍ່ພະຍາຍາມບຸກບືນສູ້ຊົນເພື່ອພາລະກິດອັນຍິ່ງໃຫຍ່ທີ່ເຮັດໃຫ້ປະຊາຊາດຈີນຟື້ນຟູຄວາມຈະເລີນຮຸ່ງເຮືອງ,ເຮັດໃຫ້ປະຊາຊາດຈີນຢືນຢູ່ໃນຮ່ວມກັບປະຊາຊາດທົ່ວໂລກຢ່າງເຂັ້ມແຂງກວ່າເກົ່າ,ແລະປະກອບສ່ວນອັນໃຫຍ່ຫຼວງກວ່າເກົ່າໃຫ້ແກ່ມວນມະນຸດ."
ໃນເວລາກ່າວຄຳປາໄສ,ທ່ານສີຈິ້ນຜິງໄດ້ສະແດງຄວາມເປັນຫ່ວງເປັນໃຍແລະ ຄວາມຮັກແພງທີ່ພັກຄອມມູນິດຈີນມີຕໍ່ປະຊາຊົນ.ທ່ານກ່າວວ່າ,ປະຊາຊົນຈີນອາໄສຄວາມດຸໝັ່ນຂະຫຍັນພຽນ, ຄວາມກ້າຫານແລະຄວາມສະຫຼາດສະຫຼຽວຂອງຕົນ,ສ້າງບ້ານແປງເມືອງອັນສວຍງາມທີ່ຊົນເຜົ່າຕ່າງໆຢູ່ຮ່ວມກັນດ້ວຍຄວາມສາມັກຄີປອງດອງກັນ,ບົ່ມເພາະວັດທະນະທຳອັນດີເລີດທີ່ຜ່ານເວລາດົນນານຍັງໃໝ່ອ່ຽມຢູ່.ປະຊາຊົນຈີນແມ່ນປະ ຊາຊົນອັນຍິ່ງໃຫຍ່.ທ່ານກ່າວວ່າ:"ປະຊາຊົນພວກເຮົາຮັກຫອມຊີວິດການເປັນຢູ່,ປາຖະ ໜາໃຫ້ມີການສຶກສາທີ່ດີກວ່າເກົ່າ, ວຽກງານທີ່ໝັ້ນຄົງກວ່າເກົ່າ,ລາຍໄດ້ທີ່ໜ້າເພີ່ງພໍໃຈກວ່າເກົ່າ,ການປະກັນສັງຄົມທີ່ເພິ່ງພາອາໄສໄດ້ກວ່າເກົ່າ,ການບໍລິການດ້ານການແພດແລະສາທາລະນະສຸກທີ່ມີລະດັບສູງກວ່າເກົ່າ,ເງື່ອນໄຂເຮືອນຢູ່ທີ່ສະດວກສະບາຍກວ່າເກົ່າ,ສິ່ງແວດລ້ອມທີ່ສວຍງາມກວ່າເກົ່າ,ແລະມີຄວາມປາຖະໜາໃຫ້ການຈະເລີນເຕີບໂຕຂອງເດັກນ້ອຍລູກຫຼາຍດີຂຶ້ນກວ່າເກົ່າ,ມີວຽກທີ່ດີກວ່າເກົ່າ,ແລະມີຊີວິດການເປັນຢູ່ທີ່ດີກວ່າເກົ່າ.ຄວາມມຸ່ງຫວັງຕໍ່ຊີວິດການເປັນຢູ່ອັນສວຍງາມຂອງປະຊາຊົນ,ກໍແມ່ນເປົ້າ ໝາຍການບຸກບືນສູ້ຊົນຂອງພວກຂ້າພະເຈົ້າ."
ທ່ານສີຈິ້ນຜິງກ່າວຕື່ມອີກວ່າ,ພາລະໜ້າທີ່ທີ່ມີຕໍ່ປະຊາຊົນກໍແມ່ນ,ຕ້ອງສາມັກຄີແລະນຳພາສະມາຊິກທົ່ວພັກແລະປະຊາຊົນບັນດາເຜົ່າໃນທົ່ວປະເທດ,ສືບຕໍ່ປົດປ່ອຍແນວຄິດ,ຍຶດໝັ້ນດຳເນີນການປະຕິຮູບແລະໄຂປະຕູສູ່ພາຍນອກ,ປົດປ່ອຍແລະພັດທະນາກຳລັງການຜະລິດຂອງສັງຄົມຢ່າງບໍ່ຢຸດຢັ້ງ,ພະຍາຍາມແກ້ໄຂຄວາມຫຍຸ້ງຍາກໃນການຜະລິດແລະຊີວິດການເປັນຢູ່ຂອງປະຊາຊົນ,ຍຶດໝັ້ນເດີນຕາມເສັ້ນທາງໄປສູ່ຄວາມຮັ່ງມີຮ່ວມກັນ ຢ່າງໝັ້ນຄົງແລະເດັດຂາດ.
ໂດຍປະເຊີນກັບຄວາມມຸ່ງຫວັງອັນແຮງກ້າຂອງປະຊາຊົນຕື້ກວ່າຄົນ,ຜູ່ນຳພັກຄອມມູນິດຈີນຊຸດໃໝ່ນີ້ໄດ້ໃຫ້ຄຳໝັ້ນສັນຍາອັນເດັດຂາດວ່າ:"ພາລະໜ້າທີ່ໜັກກວ່າພູໄທ້ຊ່ານ,ພາລະກິດໜັກໜ່ວງແລະຕ້ອງໃຊ້ເວລາຍາວນານ.ພວກເຮົາຕ້ອງຄິດນຳເລື່ອງທີ່ປະຊາ ຊົນຄິດນັ້ນຢູ່ສະເໝີ,ຮ່ວມທຸກຮ່ວມສຸກກັບປະຊາຊົນ,ສາມັກຄີແລະຮ່ວມກັບປະຊາຊົນໃນການບຸກບືນສູ້ຊົນ,ເຮັດວຽກງານຕະຫຼອດມື້ຕະຫຼອດຄືນແລະດຸໝັ່ນຂະຫຍັນພຽນ,ພະຍາຍາມມອບຄຳຕອບທີ່ເພີ່ງພໍໃຈໃຫ້ແກ່ປະຫວັດສາດແລະປະຊາຊົນ."
