ທ່ານຫູຈິນທ່າວ ປະທານປະເທດຈີນ, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນທີ່ໄດ້ຮັບເລືອກຕັ້ງໃໝ່, ປະທານຄະນະກຳມະການການທະຫານສູນກາງພັກກອມມູນິດຈີນແລະຜູ້ນຳອື່ນໆໄດ້ພົບປະຢ່າງໃກ້ຊິດກັບຜູ້ຕາງໜ້າ, ຜູ້ຕາງໜ້າພິເສດແລະຜູ້ແທນທີ່ມາປະຊຸມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ18ຂອງພັກກອມມູນິດຈີນແລະກ່າວຄຳປາໄສທີ່ມີເນື້ອໃນສຳຄັນ
ໃນຕອນບ່າຍວັນທີ15ພະຈິກນີ້, ຢູ່ທີ່ຫໍສະພາປະຊາຊົນແຫ່ງຊາດຈີນ, ທ່ານຫູຈິນທ່າວ ປະທານປະເທດຈີນ, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນທີ່ໄດ້ຮັບເລືອກຕັ້ງໃໝ່, ປະທານຄະນະກຳມະການການທະຫານສູນກາງພັກກອມມູນິດຈີນ, ແລະກຳມະການປະຈຳອື່ນໆກົມການເມືອງສູນກາງພັກກອມມູນິດຈີນຄັ້ງທີ17 ພ້ອມດ້ວຍກຳມະການປະຈຳອື່ນໆຂອງກົມການເມືອງສູນກາງພັກກອມມູນິດຈີນຄັ້ງທີ18 ໄດ້ພົບປະຢ່າງໃກ້ຊິດກັບຜູ້ຕາງໜ້າ, ຜູ້ແທນພິເສດແລະຜູ້ແທນທີ່ມາຮ່ວມປະຊຸມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ18ຂອງພັກກອມມູນິດຈີນ, ແລະຖ່າຍຮູບຮ່ວມກັນເປັນທີ່ລະລຶກ.
ພາຍໃຕ້ສຽງຕົບມືຊົມເຊີຍຢ່າງສຸດອົກສຸດໃຈ, ທ່ານຫູຈິນທ່າວ, ປະທານປະເທດຈີນ, ທ່ານສີຈິ້ນຜິງ ໄດ້ກ່າວຄຳປາໄສທີ່ມີເນື້ອໃນສຳຄັນ.
ທ່ານຫູຈິນທ່າວກ່າວເນັ້ນໃນຄຳປາໄສວ່າ, ພາຍໃຕ້ຄວາມພະຍາຍາມພ້ອມກັນຂອງຜູ້ແທນທຸກຄົບຖ້ວນໜ້າ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ18ຂອງພັກກອມມູນິດຈີນໄດ້ຮັບຜົນສຳເລັດຢ່າງຈົບງາມ, ແມ່ນກອງປະຊຸມໃຫຍ່ຄັ້ງໜຶ່ງທີ່ໄດ້ເຊີດຊູຄັນທຸງຢ່າງສູງສົ່ງ, ສືບຕໍ່ຂະຫຍາຍພາລະກິດຂອງຄົນຮຸ້ນກ່ອນ, ສາມັກຄີສູ້ຊົນກ້າວໄປໜ້າ. ຕັ້ງໃຈຮ່ຳຮຽນແລະຈັດຕັ້ງປະຕິບັດຈິດໃຈຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ18ຂອງພັກກອມມູນິດຈີນແມ່ນໜ້າທີ່ການເມືອງອັນສຳຄັນໃນປະຈຸບັນຂອງພວກເຮົາ. ຫວັງຢ່າງຈິງໃຈວ່າພາຍໃຕ້ການນຳພາຂອງສູນກາງພັກກອມມູນິດທີ່ມີທ່ານສີຈິ້ນຜິງ, ເລຂາທິການໃຫຍ່ສູນກາງພັກກອມມູນິດຈີນເປັນຜູ້ນຳ, ທົ່ວພັກທົ່ວກອງທັບແລະປະຊາຊົນເຜົ່າຕ່າງໆທົ່ວປະເທດຈະເດີນຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນຢ່າງໝັ້ນຄົງແລະເດັດຂາດ, ປົດປ່ອຍແນວຄິດ, ປະຕິຮູບແລະໄຂປະຕູສູ່ພາຍນອກ, ເຕົ້າໂຮມກຳລັງ, ຜ່ານຜາຄວາມຫຍຸ້ງຍາກ, ສູ້ຊົນເພື່ອສ້າງສຳເລັດສັງຄົມທີ່ອີ່ມໜຳສຳລານຢ່າງຮອບດ້ານ, ຍາດເອົາໄຊຊະນະໃໝ່ຂອງສັງຄົມນິຍົມທີ່ມີສີສັນພິເສດຂອງຈີນ. ໄຊຊະນະອັນຍິ່ງໃຫຍ່ຕ້ອງເປັນຂອງພັກພວກເຮົາ, ໄຊຊະນະທີ່ຍິ່ງໃຫຍ່ຕ້ອງເປັນຂອງປະເທດພວກເຮົາ,ໄຊນະນະອັນຍິ່ງໃຫຍ່ຕ້ອງເປັນຂອງປະຊາຊົນຂອງພວກເຮົາ.
ທ່ານສີຈິ້ນຜິງຊີ້ອອກໃນຄຳປາໄສວ່າ, ສູນກາງພັກທີ່ນຳພາໂດຍທ່ານຫູຈິນທ່າວ, ເລຂາທິການໃຫຍ່, ໄດ້ສາມັກຄີແລະນຳພາປະຊາຊົນບັນດາເຜົ່າທົ່ວປະເທດ, ໄດ້ຮັບຜົນສຳເລັດທີ່ຈະເລີນຮຸ່ງເຮືອງທີ່ປະຈັກຕາຕໍ່ຊາວໂລກ. ເພື່ອສືບຕໍ່ຂະຫຍາຍພາລະກິດຂອງພັກແລະປະຊາຊົນຮຸ່ນກ່ອນ, ທ່ານຫູຈິນທ່າວ, ທ່ານອູປາງກົວະ, ທ່ານເວີ່ນເຈ່ຍປາວ, ທ່ານເຈຍຊິ້ງລິນ, ທ່ານຫຼີສາງຊຸ່ນ, ທ່ານເຮີ້ກົວສຽງ, ທ່ານໂຈ່ວຢົງຄ່າງແລະສະຫາຍອື່ນໆ, ໄດ້ພ້ອມກັນລາອອກຈາກຕຳແໜ່ງນຳພາສູນກາງພັກ, ນີ້ໄດ້ສະແດງໃຫ້ເຫັນເຖິງຄຸນສົມບັດຢ່າງສູງສົ່ງ. ພວກຂ້າພະເຈົ້າຂໍສະແດງຄວາມເຄົາລົບນັບຖືຢ່າງສູງສົ່ງຕໍ່ພວກເພິ່ນ. ຄຳປາໄສຂອງທ່ານຫູຈິນທ່າວໃນເມື່ອກີ້ນີ້, ໄດ້ເຕັມໄປດ້ວຍຄວາມຈິງໃຈແລະບົ່ມຊ້ອນໄປດ້ວຍຄວາມໝາຍອັນເລິກເຊິ່ງ, ເພື່ອຊຸກຍູ້ໃຫ້ຄົນຮຸ່ນໃໝ່ໄດ້ສືບຕໍ່ສູ້ຊົນກ້າວໄປໜ້າ, ແມ່ນການໃຫ້ກຳລັງໃຈທີ່ຈິງໃຈແລະການຊຸກຍູ້ທີ່ໃຫຍ່ຫຼວງຕໍ່ພວກເຮົາ.
ພວກເຮົາຕ້ອງຈື່ຈຳຕໍ່ຄຳສັ່ງສອນນີ້ຢ່າງແໜ້ນໜຽວແລະເດັດຂາດ, ຕັ້ງໃຈຮ່ຳຮຽນແລະເຜີຍແຜ່ຈັດຕັ້ງປະຕິບັດຈິດໃຈຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ18, ສາມັກຄີແລະຮ່ວມແຮງຮ່ວມໃຈກັນ, ບຸກເບີກແລະຂະຫຍາຍກ້າວໄປໜ້າ, ແລະຝາກຝັງພາລະກິດທີ່ໜັກໜ່ວງນີ້ດ້ວຍການອອກແຮງສູ້ຊົນເພື່ອສ້າງສຳເລັດສັງຄົມທີ່ອີ່ມໜຳສຳລານຢ່າງຮອບດ້ານ.
ຄຳປາໄສຂອງທ່ານຫູຈິນທ່າວ,ປະທານປະເທດຈີນ ແລະທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນທີ່ໄດ້ຮັບເລືອກຕັ້ງໃໝ່, ປະທານຄະນະກຳມະການການທະຫານສູນກາງພັກກອມມູນິດຈີນ, ໄດ້ຮັບສຽງຕົບມືຊົມເຊີຍຢ່າງສຸດອົກສຸດໃຈ ເປັນເວລາຍາວນານຈາກຜູ້ຮ່ວມປະຊຸມທັງຫຼາຍ.
