ປະທານສະພາແຫ່ງຊາດລາວຕ້ອນຮັບຄະນະຜູ້ແທນສະພາປຶກສາການເມືອງປະຊາຊົນຈີນ
ຕາມຂ່າວCRI:ຕອນເຊົ້າວັນທີ 6 ທັນວານີ້,ຢູ່ຫໍຮັບແຂກສະພາແຫ່ງຊາດລາວ,ທ່ານນາງປານີ ຢາທໍ່ຕູ້,ປະທານສະພາແຫ່ງຊາດລາວໄດ້ຕ້ອນຮັບຄະນະຜູ້ແທນຄະນະກຳມະການວຽກງານການຕ່າງປະເທດສະພາປຶກສາການເມືອງປະຊາຊົນຈີນທີ່ນຳໂດຍທ່ານສີເຈິ້ນຮວນ,ກຳມະການປະຈຳສະພາປຶກສາການເມືອງປະຊາຊົນຈີນທັງເປັນກຳມະການຄະນະກຳມະການວຽກງານຕ່າງປະເທດແຫ່ງຊາດ.
ໃນເວລາເຂົ້າຢ້ຽມຂ່ຳນັບປະທານສະພາແຫ່ງຊາດລາວ,ທ່ານສີເຈິ້ນຮວນໄດ້ແຈ້ງຜົນສຳເລັດອັນສຳຄັນຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນໃຫ້ປະທານສະພາແຫ່ງຊາດລາວຊາບ,ທ່ານໄດ້ຕີລາຄາສູງຕໍ່ມິດຕະພາບອັນເປັນມູນເຊື້ອລະຫວ່າງຈີນກັບລາວມາເປັນເວລາອັນຍາວນານແລະການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ,ພ້ອມທັງກ່າວວ່າຈະຕັ້ງໜ້າຊຸກຍູ້ການແລກປ່ຽນແລະຮ່ວມມືລະຫວ່າງສອງພັກ,ສອງລັດ,ໂດຍສະເພາະແມ່ນລະຫວ່າງສະພາປຶກສາການເມືອງປະຊາຊົນຈີນກັບສະພາແຫ່ງຊາດລາວ.
ທ່ານນາງປານີ ຢາທໍ່ຕູ້ໄດ້ສະແດງຄວາມຊົມເຊີຍຕໍ່ຜົນສຳເລັດອັນຈົບງາມທີ່ໄດ້ຮັບໃນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນທີ່ຫາກໍ່ສິ້ນສຸດລົງໃນຫວ່າງກ່ອນນີ້ບໍ່ດົນ,ສະແດງຄວາມຍ້ອງຍໍສັນລະເສີນຕໍ່ຜົນສຳເລັດອັນຍິ່ງໃຫຍ່ທີ່ພັກກອມມູນິດຈີນໄດ້ຮັບໃນເວລາຍາວນານມານີ້ໃນການນຳພາປະຊາຊົນຈີນຍຶດໝັ້ນເດີນຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນ,ແລະສະແດງຄວາມຂອບອົກຂອບໃຈຕໍ່ພັກ,ລັດແລະປະຊາຊົນຈີນທີ່ໄດ້ໃຫ້ຄວາມຊ່ວຍເຫຼືອຢ່າງຫຼວງຫຼາຍແກ່ພັກ,ລັດແລະປະຊາຊົນລາວມາໂດຍຕະຫຼອດ.
ຕອນເຊົ້າມື້ດຽວກັນ,ທ່ານສີເຈິ້ນຮວນຍັງໄດ້ເຈລະຈາກັບທ່ານຈັນທະວົງ ແສນອາມາດມົນຕີ,ຮອງປະທານແນວລາວສ້າງຊາດ.
ທ່ານສີເຈິ້ນຮວນໄດ້ເດີນທາງມາຢ້ຽມຢາມລາວເປັນເວລາ 5 ວັນຕາມຄຳເຊີນຂອງແນວລາວສ້າງຊາດ.
