ການສົນທະນາດ້ານຍຸດທະສາດລະຫວ່າງຟີລິບປິນກັບອາເມລິກາມີຈຸດປະສົງຄືແນວໃດ?
(GMT+08:00) 2012-12-12 17:43:54 cri
ເຈົ້າໜ້າທີ່ອາວຸໂສຂອງຟີລິບປິນທີ່ຮັບຜິດຊອບການພົວພັນຟີລິບປິນອາເມລິກາກ່າວໃນຫວ່າງມໍ່ໆນີ້ວ່າ:ຟີລິບປິນແລະອາເມລິກາຈະຈັດການສົນທະນາດ້ານຍຸດທະສາດລະຫວ່າງສອງຝ່າຍຢູ່ນະຄອນຫຼວງມານີລາຂອງຟີລິບປິນໃນອາທິດນີ້,ຊຶ່ງສອງຝ່າຍຈະປຶກສາຫາລືຫຼາຍບັນຫາໃນສາກົນແລະພາກພື້ນເປັນຕົ້ນແມ່ນຄວາມປອດໄພທາງທະເລ,ການຮ່ວມມືດ້ານວຽກງານປ້ອງກັນຊາດແລະອື່ນໆ.ໃນນັ້ນຈະລົງເລິກຫາລືບັນຫາກ່ຽວກັບການເພີ່ມກຳລັງທະຫານຂອງອາເມລິກາຢູ່ຟີລິບປິນ.
ເຖິງວ່າເຈົ້າໜ້າທີ່ອາວຸໂສຂອງຟີລິບປິນຜູ້ນີ້ໄດ້ກ່າວວ່າ:ການສົນທະນາລະຫວ່າງຟີລິບປິນກັບອາເມລິກາບໍ່ໄດ້ກ່ຽວພັນເຖິງຄວາມຂັດແຍ່ງດ້ານສິດອຳນາດອະທິປະໄຕຢູ່ທະເລຈີນໃຕ້ລະຫວ່າງຟີລິບປິນກັບຈີນກໍ່ຕາມ,ແຕ່ທ່ານໄດ້ຊີ້ອອກວ່າ,ໃນການສົນທະນາຄັ້ງນີ້ມັນຍາກທີ່ຈະບໍ່ເວົ້າກ່ຽວກັບບັນຫາທີ່ກ່ຽວຂ້ອງ.ໃນມື້ດຽວກັນ,ທ່ານເດວໂລຊາຣີໂອ ລັດຖະມົນຕີວ່າການກະຊວງການຕ່າງປະເທດຟີລິບປິນກ່າວວ່າ:ການພົວພັນຄູ່ຮ່ວມມືກັບອາເມລິກາ,ເວົ້າສຳລັບຟີລິບປິນແລ້ວ,ມີຄວາມສຳຄັນດ້ານຍຸດທະສາດ,ໂດຍສະເພາະແມ່ນປະຈຸບັນ,ຟີລິບປິນພວມປະເຊີນກັບສິ່ງທ້າທາຍຫຼາຍຢ່າງເປັນຕົ້ນແມ່ນໄພທຳມະຊາດຕະຫຼອດຮອດຄວາມຂັດແຍ່ງທາງທະເລເຫຼົ່ານີ້ເປັນຕົ້ນ,ຊຶ່ງລ້ວນແລ້ວແຕ່ຕ້ອງການໃຊ້ມາດຕະການໃນການຮັບມື.ທັງໝົດເຫຼົ່ານີ້ໄດ້ສະແດງໃຫ້ເຫັນວ່າ:ການຮ່ວມມືທາງການທະຫານລະຫວ່າງຟີລິບປິນກັບອາເມລິກາອາດຈະກ່ຽວພັນກັບບັນຫາທະເລຈີນໃຕ້.
ເວົ້າສຳລັບອາເມລິກາແລ້ວ,ການເພີ່ມກຳລັງທະຫານຢູ່ຟີລິບປິນແມ່ນຂອດສຳຄັນໃນການປະຕິບັດຍຸດທະສາດກັບຄືນສູ່ອາຊີໂດຍບໍ່ຕ້ອງສົງໃສ.ມັນບໍ່ພຽງແຕ່ເປັນເສັ້ນທາງໜຶ່ງໃນການເຂົ້າແຊກແຊງວຽກງານໃນພາກພື້ນນີ້ໂດຍກົງຂອງອາເມລິກາເທົ່ານັ້ນ,ການເພີ່ມກຳລັງທະຫານຢູ່ຟີລິບປິນຂອງອາເມລິກາຍັງຈະສົ່ງຜົນສະທ້ອນໂດຍກົງຕໍ່ສະຖານະການຂອງພາກພື້ນນີ້ອີກດ້ວຍ.
ເວົ້າສຳລັບຟີລິບປິນແລ້ວ,ທຳອິດແມ່ນໄດ້ສະແດງໃຫ້ເຫັນເຖິງຈຸດຢືນຂອງຟີລິບປິນທີ່ນິຍົມອາເມລິກາຕະຫຼອດມາ,ອັນທີສອງ,ອາເມລິກາເພີ່ມກຳລັງທະຫານຢູ່ຟີລິບປິນຍ່ອມຈະນຳເອົາການຊ່ວຍເຫຼືອດ້ານເສດຖະກິດທີ່ມີມູນຄ່າຢ່າງມະຫາສານມາໃຫ້ຟີລິບປິນໂດຍກົງ.ອັນສຸດທ້າຍ,ຟີລິບປິນຫວັງຢາກອາໄສອິດທິກຳລັງຂອງອາເມລິກາເພີ່ມສິດໃນການປະກອບຄຳຄິດຄຳເຫັນແລະບົດບາດຂອງຕົນໃນພາກພື້ນນີ້ໃຫ້ຫຼາຍຂຶ້ນຕື່ມອີກ.