ຈັດງານສຳມະນາກ່ຽວກັບການສົ່ງເສີມການລົງທຶນຢູ່ລາວ
ຕາມຂ່າວCRI:ວັນທີ 20 ທັນວານີ້,ງານສຳມະນາກ່ຽວກັບການສົ່ງເສີມການລົງທຶນຢູ່ລາວໄດ້ຈັດຂຶ້ນຢູ່ທີ່ປັກກິ່ງໂດຍແມ່ນກອງເລຂາຝ່າຍຈີນຂອງສະພາການທຸລະກິດຈີນ-ອາຊຽນແລະສະຖານທູດສ.ປ.ປ.ລາວປະຈຳສ.ປ.ຈີນຮ່ວມກັນຈັດຂຶ້ນ,ທ່ານສູໜີງໜີງ,ຮອງເລຂາທິການໃຫຍ່ຜູ້ປະຈຳການຝ່າຍຈີນຂອງສະພາການທຸລະກິດຈີນ-ອາຊຽນໄດ້ເປັນປະທານຂອງກອງປະຊຸມ,ມີຜູ້ຮັບຜິດຊອບສະພາການຄ້າໃນຫຼາຍຂະແໜງ,ຜູ້ຕາງໜ້າວິສາຫະກິດແລະຜູ້ຕາງໜ້າສື່ຕ່າງໆທົ່ວປະເທດຈີນເຂົ້າຮ່ວມທັງໝົດ 200 ທ່ານ.
(ທ່ານສູໜີງໜີງກຳລັງກ່າວຄຳປາໄສ)
ທ່ານສູໜີງໜີງ,ຮອງເລຂາທິການໃຫຍ່ຜູ້ປະຈຳການຝ່າຍຈີນຂອງສະພາການທຸລະກິດຈີນ-ອາຊຽນຊີ້ອອກວ່າ:ລາວຫາກໍ່ເຂົ້າເປັນສະມາຊິກອົງການການຄ້າໂລກຫຼືWTO,ວິສາຫະກິດຈີນກຳລັງຍາດເອົາໂອກາດໃໝ່ໃນການດຳເນີນທຸລະກິດໂດຍອີງໃສ່ທ່າແຮງດ້ານພູມສັນຖານທີ່ມີສາຍພູສາຍນ້ຳຕິດຈອດກັນກັບລາວ.ທ່ານກ່າວວ່າ:ໃນຊຸມປີມໍ່ໆມານີ້,ເສດຖະກິດລາວໄດ້ມີການພັດທະນາຢ່າງວ່ອງໄວ,ພື້ນຖານໂຄງລ່າງໄດ້ຮັບການປັບປຸງໃຫ້ດີຂຶ້ນເລື້ອຍໆ,ພ້ອມທັງມີຊັບພະຍາກອນບໍ່ແຮ່ແລະໄຟຟ້ານ້ຳຕົກທີ່ອຸດົມສົມບູນ,ໄດ້ດຶງດູດໃຫ້ວິສາຫະກິດຈີນໄປລົງທຶນຢູ່ລາວນັບມື້ນັບຫຼາຍຂຶ້ນ.ຂໍ້ມູນສະຖິຕິທີ່ກ່ຽວຂ້ອງສະແດງໃຫ້ເຫັນວ່າ:ນັບມາຮອດປະຈຸບັນນີ້,ທຶນທີ່ວິສາຫະກິດຈີນໄດ້ໄປລົງທຶນຢູ່ລາວນັ້ນລວມທັງໝົດຈຳນວນ 3 ຕື້ 300 ລ້ານໂດລາ,ເປັນອັນດັບທີ 3 ໃນບັນດາປະເທດທີ່ໄປລົງທຶນຢູ່ລາວ.
ທ່ານສົມດີ ບຸນຄຸ້ມ,ເອກອັກຄະລັດຖະທູດລາວປະຈຳຈີນໄດ້ເຂົ້າຮ່ວມງານສຳມະນາແລະກ່າວຄຳປາໄສວ່າ:ຍິນດີຕ້ອນຮັບວິສາຫະກິດຈີນມາລົງທຶນຢູ່ລາວ.ທ່ານກ່າວຕໍ່ໄປວ່າ:ເຖິງວ່າລາວແມ່ນປະເທດນ້ອຍທີ່ບໍ່ມີທາງອອກສູ່ທະເລ,ແຕ່ລາວມີຊາຍແດນຕິດກັບຈີນ,ຫວຽດນາມແລະໄທເຊິ່ງເປັນປະເທດທີ່ພັດທະນາໄວສົມຄວນ,ທ່າແຮງດ້ານພູມສັນຖານທີ່ສຳຄັນອັນນີ້ຈະເຮັດໃຫ້ລາວກາຍເປັນສູນການຄ້າຊຸມທາງເຊື່ອມຕໍ່ທີ່ສຳຄັນ.
(ທ່ານສົມດີ ບຸນຄຸ້ມກຳລັງກ່າວຄຳປາໄສ)
ໃນງານສຳມະນາ,ທ່ານຄຳປັນ ແສງທອງຄຳ,ອັກຄະລັດຖະທູດທີ່ປຶກສາຝ່າຍເສດຖະກິດການຄ້າລາວປະຈຳຈີນໄດ້ແນະນຳນະໂຍບາຍການລົງທຶນຂອງລາວໃຫ້ຜູ້ຮ່ວມປະຊຸມບັນດາທ່ານຮູ້ຢ່າງລະອຽດ.
(ທ່ານຄຳປັນ ແສງທອງຄຳກຳລັງແນະນຳນະໂຍບາຍການລົງທຶນຂອງລາວ)
