ທ່ານອູປ່າງກົວພົບກັບທ່ານນາງປານີ ຢາທໍ່ຕູ້,ປະທານສະພາແຫ່ງຊາດລາວ
(GMT+08:00) 2013-01-29 18:45:39 cri
ຕາມຂ່າວCRI: ທ່ານອູປ່າງກົວ,ປະທານຄະນະປະຈຳສະພາຜູ່ແທນປະຊາຊົນແຫ່ງຊາດຈີນທີ່ພວມເຂົ້າຮ່ວມກອງປະຊຸມປະຈຳປີຂອງເວທີປຶກສາຫາລືສະພາອາຊີປາຊິຟິກຢູ່ວຼາດີວົສຕົກຂອງຣັດເຊຍໄດ້ພົບກັບທ່ານນາງປານີ ຢາທໍ່ຕູ້,ປະທານສະພາແຫ່ງຊາດລາວ.
ໃນການພົບປະ,ທ່ານອູປ່າງກົວກ່າວວ່າ,ຈີນລາວແມ່ນປະເທດບ້ານໃກ້ເຮືອນຄຽງທີ່ດີ,ເພື່ອນມິດທີ່ດີ,ສະຫາຍທີ່ດີແລະຄູ່ຮ່ວມມືທີ່ດີ.ພາຍໃຕ້ຄວາມພະຍາຍາມຮ່ວມຂອງສອງ ຝ່າຍ,ການພົວພັນຈີນລາວໄດ້ຂະຫຍາຍຕົວເປັນຢ່າງດີແລະໄດ້ຮັບຜົນສຳເລັດອັນອຸດົມສົມບູນ.ຈີນລາວມີລະບອບການເມືອງອັນດຽວກັນ,ມີອຸດົມຄະຕິຄືກັນ,ມີອະນາຄົດແລະໂຊກຊະຕາກຳທີ່ຕິດຕໍ່ພົວພັນກັນ,ລ້ວນແຕ່ຢູ່ໃນໄລຍະສຳຄັນແຫ່ງການປະຕິຮູບແລະພັດທະນາ.ຫວັງວ່າສອງຝ່າຍຈະສືບຕໍ່ຍຶດໝັ້ນນ້ຳໃຈທີ່ວ່າ"ໝັ້ນຄົງຍາວນານ,ປອງດອງກັນກັບບ້ານໃກ້ເຮືອນຄຽງຢ່າງມີໄມຕີຈິດມິດຕະພາບ,ໄວ້ເນື້ອເຊື່ອໃຈກັນແລະຮ່ວມມືຢ່າງຮອບດ້ານ",ສ້າງມິດຕະພາບໃຫ້ໝັ້ນຄົງ,ລົງເລິກການຮ່ວມມື,ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານຈີນລາວໃຫ້ໄດ້ຮັບການຂະຫຍາຍຕົວອັນໃຫຍ່ຫຼວງກວ່າເກົ່າ,ສ້າງຄວາມສຸກໃຫ້ແກ່ ປະຊາຊົນສອງຊາດ.
ທ່ານນາງປານີ ຢາທໍ່ຕູ້ກ່າວວ່າ,ໃນຖານະເປັນເພື່ອນມິດທີ່ດີຂອງປະຊາຊົນຈີນ,ປະຊາຊົນລາວຮູ້ສຶກດີໃຈຢ່າງຈິງໃຈຕໍ່ຈີນທີ່ໄດ້ຮັບຜົນສຳເລັດອັນຍິ່ງໃຫຍ່ໃນການປະຕິຮູບແລະໄຂປະຕູສູ່ພາຍນອກແລະມີຖານະບົດບາດນັບມື້ນັບສູງຂຶ້ນໃນເວທີສາກົນ.ນີ້ບໍ່ພຽງແຕ່ໄດ້ສ້າງໂອກາດໃໝ່ໃຫ້ແກ່ການຂະຫຍາຍການພົວພັນລະຫວ່າງລາວກັບຈີນທໍ່ນັ້ນ,ຍັງໄດ້ຊຸກຍູ້ການພັດທະນາເສດຖະກິດສັງຄົມຢູ່ພາຍໃນປະເທດລາວອີກດ້ວຍ.ພັກ,ສະພາແຫ່ງຊາດແລະລັດຖະບານລາວເອົາໃຈໃສ່ໃນລະດັບສູງຕໍ່ການພົວພັນກັບຈີນ,ຍິນດີຮ່ວມແຮງຮ່ວມໃຈກັບຈີນ,ຂະຫຍາຍການພົວພັນລາວຈີນໃຫ້ດີກວ່າເກົ່າ,ພ້ອມກັນປົກປັກຮັກສາສະພາບການທີ່ດີ ແຫ່ງສັນຕິພາບແລະສະຖຽນລະພາບຂອງພາກພື້ນ.
