ຈັດງານພົບປະມິດລາຍການCRI FM93ຢ່າງຄຶກຄື້ນມ່ວນຊື່ນ
(GMT+08:00) 2013-01-30 17:00:02 cri
ໃນພິທີເປີດງານ, ທ່ານສີພາ ນົງລາດ,ຜູ້ອຳນວຍການໃຫຍ່ວິທະຍຸກະຈາຍສຽງແຫ່ງຊາດກ່າວວ່າ, CRI FM93ໄດ້ເສີມຂະຫຍາຍບົດບາດອັນສຳຄັນໃນວຽກງານວິທະຍຸກະຈາຍສຽງຂອງລາວ, ເຊິ່ງໄດ້ເພີ່ມທະວີຄວາມເຂົ້າໃຈລະຫວ່າງປະຊາຊົນສອງຊາດ, ທັງໄດ້ຜະລິດລາຍການທີ່ມີຫຼາຍຮູບຫຼາຍແບບ,ມີເນື້ອໃນອຸດົມສົມບູນ, ແລະໜ້າເຊື່ອຖື, ໂດຍເຮັດໃຫ້ຜູ້ຟັງລາວໄດ້ຮັບຮູ້ໂລກກວ້າງໄກ, ໄດ້ຂໍ້ມູນຢ່າງຫຼວງຫຼາຍ, ແລະໄດ້ຮັບຄວາມນິຍົມຈາກຜູ້ຟັງລາວ. ການຈັດງານພົບປະມິດລາຍການຈະສ້າງຄວາມສະໜິດສະໜົມກັບຜູ້ຟັງ, ທັງຈະໄດ້ຊຸກຍູ້ການຕອບຮັບລະຫວ່າງມິດລາຍການກັບຜູ້ຈັດລາຍການ(ໂຄສົກ), ຫວັງວ່າສຳນັກງານຕາງໜ້າCRIປະຈຳລາວຈະຈັດກິດຈະກຳແນວນີ້ຫຼາຍກວ່າເກົ່າ. ນອກນີ້,ທ່ານສີພານົງລາດຍັງກ່າວຕື່ມອີກວ່າ,ຫວັງວ່າວິທະຍຸຂອງລາວກັບCRIຈະເພີ່ມທະວີການແລກປ່ຽນແລະການຮ່ວມມືກັນ, ພ້ອມກັນພັດທະນາແລະກ້າວໄປໜ້າ, ຮັບໃຊ້ປະຊາຊົນລາວເປັນຢ່າງດີກວ່າເກົ່າ.
ໃນງານພົບປະຄັ້ງນີ້, ຜູ້ຮັບຜິດຊອບສຳນັກງານຕາງໜ້າCRIປະຈຳລາວໄດ້ແຈ້ງໃຫ້ມິດລາຍການຮູ້ກ່ຽວກັບສະພາບລວມຂອງCRI,ທິມງານຕ່າງໆຂອງຫ້ອງການພາກພາສາລາວ, ທິມງານຜູ້ຈັດລາຍການ(ໂຄສົກ)ຂອງFM93,ແລະວຽກງານກໍ່ຄືກິດຈະກຳສຳຄັນຕ່າງໆໃນຊຸມປີມໍ່ໆມານີ້, ເຊິ່ງໄດ້ເພີ່ມທະວີຄວາມຮັບຮູ້ແລະຄວາມເຂົ້າໃຈໃຫ້ແກ່ຂອງມິດລາຍການທີ່ມີຕໍ່CRI. ມິດລາຍການທີ່ຮ່ວມງານພົບປະຕ່າງກໍ່ໄດ້ກ່າວວ່າ,ຈະສືບຕໍ່ເອົາໃຈໃສ່ແລະສະໜັບສະໜູນລາຍການແລະກິດຈະກຳຂອງCRI FM93,ພ້ອມທັງອວຍພອນໃຫ້FM93ຈົ່ງໄດ້ຮັບຜົນງານອັນໃຫຍ່ຫຼວງກວ່າເກົ່າໃນປີໃໝ່2013ນີ້.
