ງານດົນຕີຄລາດສິກມິດຕະພາບລາວ-ໄທຈະໄດ້ຈັດຂຶ້ນໃນຕອນເດືອນມີນາປີ2013
ງານສະແດງດົນຕີຄລາດສິກມິດຕະພາບລາວ - ໄທ ຈະໄດ້ຈັດຂຶ້ນໃນວັນທີ 2 ມີນານີ້ທີ່ຫໍວັດທະນະທຳແຫ່ງຊາດ, ເພື່ອເປັນການເສີມສ້າງສາຍພົວພັນມິດຕະພາບ ແລະ ບັນຍາກາດໃຫ້ແກ່ການກ້າວສູ່ເປັນປະຊາຄົມອາຊຽນໃນປີ 2015 ທີ່ຈະມາເຖິງນີ້, ແລະເປັນການເຜີຍແຜ່ສິລະປະດົນຕີຄລາດສິກ ເຊິ່ງບັນເລງໂດຍຄະນະນັກດົນຕີ ຈາກມະຫາວິທະຍາໄລມະຫິດົນແຫ່ງລາຊະອານາຈັກໄທ ໃຫ້ແກ່ຊາວລາວໄດ້ເບິ່ງໄດ້ຊົມ ເວົ້າລວມ, ເວົ້າສະເພາະຊາວນະຄອນຫລວງວຽງຈັນ, ໂດຍມີນັກຮ້ອງປະສານສຽງ ຈາກນັກສິລະປິນລາວເຂົ້າຮ່ວມ 50 ຄົນ, ການຈັດງານນີ້ທັງເປັນການຫາລາຍໄດ້ ແລະ ລະດົມທຶນຈາກສັງຄົມທັງພາຍໃນ ແລະ ຕ່າງປະເທດ ເພື່ອຊື້ເຄື່ອງດົນຕີ ແລະວັດຖຸອຸປະກອນຮັບໃຊ້ການຮຽນ-ການສອນຂອງຄູ-ອາຈານ ແລະ ນັກຮຽນໃນໂຮງຮຽນສິລະປະດົນຕີແຫ່ງຊາດລາວ, ງານສະແດງດົນຕີຄັ້ງນີ້ຖືກຈັດຂຶ້ນ ໂດຍການຮ່ວມມືລະຫວ່າງກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວແລະສະຖານເອກອັກຄະລາຊະທູດແຫ່ງລາຊະອານາຈັກໄທປະຈຳລາວ.
ພິທີຖະແຫລງຂ່າວໄດ້ຈັດຂຶ້ນເມື່ອວັນທີ 12 ກຸມພາ 2013ທີ່ຫໍວັດທະນະທຳແຫ່ງຊາດ,ເຊິ່ງມີ ທ່ານ ບົວເງິນ ຊາພູວົງ ສິລະປິນແຫ່ງຊາດ,ລັດຖະມົນຕີຊ່ວຍວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວຂອງລາວ;ທ່ານ ວະລາຍຸດ ໄຊຍະກຸນເອກອັກຄະລາຊະທູດແຫ່ງລາຊະອານາຈັກໄທປະຈຳລາວ,ມີຫົວຫນ້າກົມສິລະປະການສະແດງນັກສິລະປິນ,ພ້ອມດ້ວຍແຂກຖືກເຊີນທີ່ກ່ຽວຂ້ອງເຂົ້າຮ່ວມ.
