ຈິດໃຈແຫ່ງວັດທະນະທຳຈີນ, ຮ່ວມສະຫຼອງລະດູບານໃໝ່
ວັນທີ 17 ກຸມພານີ້, ທີ່ຫໍວັດທະນະທຳແຫ່ງຊາດລາວ, ນະຄອນຫຼວງວຽງຈັນ, ທ່ານຟົງ ຈູຮວາ ຫົວໜ້າຄະນະສິລະປະຈີນ ໄດ້ນຳພາຄະນະສິລະປະຈີນ ເດີນທາງມາສະແດງຢູ່ນະຄອນຫຼວງວຽງຈັນ, ໂດຍເປັນກຽດເຂົ້າຮ່ວມຂອງທ່ານອາຊາງ ລາວລີ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີລາວ, ທ່ານບໍ່ແສງຄຳ ວົງດາລາ, ລັດຖະມົນຕີວ່າການກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານນາງ ປູຈ້ຽນກົວ, ເອກອັກຄະລະຖະທູດຈີນປະຈຳລາວ, ມີບັນດາແຂກຖືກເຊີນ, ສື່ມວນຊົນ ແລະ ຊາວນະຄອນຫຼວງວຽງຈັນ ເຂົ້າຮ່ວມຢ່າງຫຼວງຫຼາຍ.
ຄະນະສິລະປະຈີນ ທີ່ມາສະແດງຢູ່ນະຄອນຫຼວງວຽງຈັນຄັ້ງນີ້ ແມ່ນຫ້ອງວ່າການວຽກງານຈີນຕ່າງດ້າວຂອງຄະນະລັດຖະບານຈີນ ແລະ ສະມາຄົມແລກປ່ຽນກັບຕ່າງປະເທດຂອງຈີນ ຮ່ວມກັນມອບໝາຍໃຫ້ຫ້ອງວ່າການວຽກງານຈີນຕ່າງດ້າວເຂດປົກຄອງຕົນເອງເຜົ່າຈ້ວງກວາງຊີຈີນ ຈັດຂຶ້ນຢູ່ພາກພື້ນອາຊຽນ, ເພື່ອຢ້ຽມຢາມ ແລະ ອວຍພອນບຸນກຸດຈີນ ໃຫ້ແກ່ຄົນຈີນຢູ່ລາວ ແລະ ຄົນລາວເຊື້ອສາຍຈີນ.
ກ່ອນການສະແດງ, ທ່ານຟົງ ຈູຮວາກ່າວວ່າ, ເປັນໄລຍະດົນນານມານີ້, ຊາວຈີນທີ່ອາໄສຢູ່ລາວ ໄດ້ເສີມຂະຫຍາຍມູນເຊື້ອທີ່ດີເລີດຂອງຈີນ ຄື ດຸໝັ່ນ, ກ້າຫານ, ຮັກຫອມສັນຕິພາບ, ແລະມີຄວາມສາມັກຄີຊ່ວຍເຫຼືອ ເຊິ່ງກັນແລະກັນ, ຢູ່ຮ່ວມກັນໂດຍສັນຕິກັບຄົນລາວ ແລະ ຮ່ວມທຸກຮ່ວມສຸກນຳກັນ, ໄດ້ສ້າງໄມຕີຈິດມິດຕະພາບອັນເລິກເຊິ່ງໃຫ້ແກ່ລາວ-ຈີນ, ໄດ້ປະກອບສ່ວນອັນຕັ້ງໜ້າເຂົ້າໃນການສົ່ງເສີມວັດທະນະທຳຈີນ, ຊຸກຍູ້ການພັດທະນາເສດຖະກິດສັງຄົມຂອງລາວ ແລະ ການໄປມາຫາສູ່ກັນຢ່າງມີໄມຕີຈິດມິດຕະພາບລາວ-ຈີນ ໃຫ້ຂະຫຍາຍຕົວຢ່າງບໍ່ຢຸດຢັ້ງ.
ການສະແດງຂອງຄະນະສິລະປະຈີນໃນຄັ້ງນີ້, ລວມມີການສະແດງບົດເພງ, ການຟ້ອນ, ລະຄອນຕຸກກະຕາປ່ຽນໜ້າ, ວິທະຍາກົນ ແລະອື່ນໆ. ຜ່ານການສະແດງ ໄດ້ສ້າງຄວາມຕື່ນຕາຕື່ນໃຈໃຫ້ແກ່ຜູ້ເຂົ້າຊົມຢ່າງຫຼວງຫຼາຍ, ໂດຍສະເພາະແມ່ນລະຄອນຕຸກກະຕາປ່ຽນໜ້າ ແລະ ວິທະຍາກົນ ທີ່ໄດ້ຮັບສຽງຕົບມືຈາກຜູ້ເຂົ້າຊົມຢ່າງຟົດສະນັ່ນຫວັ່ນໄຫວ.
