ໄຂກອງປະຊຸມປະຈຳປີຂອງສະພາປຶກສາການເມືອງປະຊາຊົນແຫ່ງຊາດຈີນ
ຕາມຂ່າວCRI, ຕອນບ່າຍວັນທີ3ມີນານີ້, ກອງປະຊຸມປະຈຳປີຂອງສະພາປຶກສາການເມືອງປະຊາຊົນແຫ່ງຊາດຈີນ ເຊິ່ງເປັນອົງການປຶກສາການເມືອງສູງສຸດຂອງຈີນ ໄດ້ໄຂຂຶ້ນຢູ່ນະຄອນຫຼວງປັກກິ່ງ.
ນີ້ແມ່ນກອງປະຊຸມປະຈຳປີຄັ້ງທຳອິດຂອງສະພາປຶກສາການເມືອງແຫ່ງຊາດຈີນສະໄໝທີ12 ໃນໄລຍະຕຳແໜ່ງທີ່ເປັນເວລາ5ປີ, ຜູ້ນຳພັກແລະລັດ ເຊັ່ນ ທ່ານຫູຈີນທາວ, ທ່ານສີຈິ້ນຜິງ ແລະທ່ານອື່ນໆໄດ້ເຂົ້າຮ່ວມພິທີໄຂກອງປະຊຸມ
ທ່ານເຈຍຊິງລິນ ປະທານສະພາປຶກສາການເມືອງປະຊາຊົນແຫ່ງຊາດຈີນຊຸດທີ11ໄດ້ຕາງໜ້າຄະນະປະຈຳຊຸດກ່ອນ, ລາຍງານວຽກງານໃນ5ປີຜ່ານມາຕໍ່ກອງປະຊຸມ. ທ່ານກ່າວວ່າ, 5ປີຜ່ານມາ, ສະພາປຶກສາການເມືອງປະຊາຊົນແຫ່ງຊາດຈີນໄດ້ປິ່ນອ້ອມການສ້າງສາເສດຖະກິດ, ໄດ້ສະເໜີຂໍ້ສະເໜີຕ່າງໆ ເຊັ່ນ: ພັດທະນາອຸດສາຫະກຳຈະເລີນໃໝ່ທີ່ມີລັກສະນະຍຸດທະສາດ, ຊຸກຍູ້ການຫັນເປັນຕົວເມືອງແລະການສ້າງສາຊົນນະບົດແບບໃໝ່, ປະຕິບັດຍຸດທະສາດທະເລເຫຼົ່ານີ້ເປັນຕົ້ນ, ໄດ້ຈັດເຂົ້າໃນແຜນການ5ປີຄັ້ງທີ12ແຫ່ງການພັດທະນາເສດຖະກິດສັງຄົມແລະແຜນການສະເພາະຕ່າງໆ. ສະພາປຶກສາການເມືອງປະຊາຊົນແຫ່ງຊາດຈີນຍັງໄດ້ປິ່ນອ້ອມບັນຫາທີ່ພົວພັນເຖິງຜົນປະໂຫຍດຕົວຈິງຂອງປະຊາຊົນໂດຍກົງແລະບັນຫາທີ່ປະຊາຊົນເອົາໃຈໃສ່ທີ່ສຸດ ເພື່ອດຳເນີນການສຳຫຼວດຄົ້ນຄວ້າ, ສະເໜີໃຫ້ຊຸກຍູ້ການສຶກສາພາກບັງຄັບພັດທະນາຢ່າງສະໝ່ຳສະເໝີ, ຈັດສັນການປະກອບອາຊີບລະຫວ່າງຕົວເມືອງກັບຊົນນະບົດ, ຊຸກຍູ້ວຽກງານປະກັນໄພລ້ຽງດູຜູ້ເຖົ້າທາງສັງຄົມຢູ່ຊົນນະບົດແບບໃໝ່, ຊຸກຍູ້ຈຸດທົດລອງປະຕິຮູບໂຮງໝໍຫຼວງແລະອື່ນໆ, ໄດ້ຊຸກຍູ້ການປັບປຸງຊີວິດການເປັນຢູ່ຂອງປະຊາຊົນ.
ກ່ຽວກັບວຽກງານຂອງສະພາປືກສາການເມືອງຊຸດໃໝ່, ທ່ານເຈຍຊິງລິນສະເໜີໃຫ້ວຽກງານຂອງສະພາປຶກສາການເມືອງຕ້ອງຖືຜົນປະໂຫຍດຂອງປະຊາຊົນໄວ້ຢູ່ອັນດັບທີໜຶ່ງ, ກຳມະການຕ້ອງລົງໄປຊອກຮູ້ສະພາບຕົວຈິງດ້ານຊີວິດການເປັນຢູ່ຂອງປະຊາຊົນ, ດູດເອົາທາດບຳລຸງດ້ານສະຕິປັນຍາຈາກປະຊາຊົນ, ຜ່ານຈາກການລົງຮາກຖານ, ຍົກຄຸນນະພາບຂອງການປຶກສາການເມືອງແລະປະກອບຄຳເຫັນໃຫ້ສູງຂຶ້ນເລື້ອຍໆ.
