ກອງປະຊຸມທົບທວນລະດັບພາກພື້ນອາຊີ-ເອີລົບຂອງກຸ່ມປະເທດທີ່ບໍ່ມີຊາຍແດນຕິດທະເລໄຂຂື້ນ
(GMT+08:00) 2013-03-05 18:33:04 cri
ຕອນເຊົ້າຂອງວັນທີ 5 ເດືອນ ມີນານີ້, ກອງປະຊຸມທົບທວນລະດັບພາກພື້ນອາຊີ-ເອີຣົບ ກ່ຽວກັບການຈັດຕັ້ງປະຕິບັດແຜນດໍາເນີນງານ ອານມາຕີ ເພື່ອແກ້ໄຂສະພາບຄວາມຕ້ອງການພິເສດຂອງປະເທດກໍາລັງພັດທະນາທີ່ບໍ່ມີຊາຍແດນຕິດທະເລ ໄດ້ຈັດຂື້ນທີ່ນະຄອນຫລວງວຽງຈັນ, ໂດຍມີພະນະທ່ານ ດຣ. ທອງລຸນ ສີສຸລິດ ຮອງນາຍົກລັດຖະມົນຕີ, ປະທານກຸ່ມປະເທດກຳລັງພັດທະນາທີ່ບໍ່ມີຊາຍແດນຕິດທະເລ, ທ່ານ ນາງ ໂນລິນ ເຮເຊີ ຮອງເລຂາທິການໃຫຍ່ ອົງການສະຫະປະຊາຊາດ, ຫົວໜ້າຄະນະກໍາມາທິການ ເສດຖະກິດ-ສັງຄົມ ສະຫະປະຊາຊາດ ສໍາລັບພາກພື້ນອາຊີ-ປາຊີຟິກ, ທ່ານ ກວນ ຈັນດຣາ ຮອງເລຂາທິການໃຫຍ່ອົງການສະຫະປະຊາຊາດ, ຜູ້ຕ່າງໜ້າຂັ້ນສູງສໍາລັບປະເທດດ້ອຍພັດທະນາ ປະເທດກໍາລັງພັດທະນາທີ່ບໍ່ມີຊາຍແດນຕິດທະເລ ແລະ ປະເທດກໍາລັງພັດທະນາເກາະດອນນ້ອຍ, ພ້ອມດ້ວຍບັນດາທ່ານຜູ້ແທນທີ່ມີກຽດເຂົ້າຮ່ວມຢ່າງພ້ອມພຽງ.
ໃນກອງປະຊຸມ, ທ່ານ ດຣ. ທອງລຸນ ສີສຸລິດ ໄດ້ຂື້ນກ່າວຄຳຕ້ອນຮັບວ່າ, ກອງປະຊຸມຄັ້ງນີ້ມີຄວາມໝາຍສຳຄັນຍິ່ງ ຕໍ່ການກະກຽມໃຫ້ແກ່ກອງປະຊຸມລະດັບໂລກເພື່ອທົດທວນຄືນ 10 ປີ ແຫ່ງການຈັດຕັ້ງປະຕິບັດ ແຜນດຳເນີນງານ ອານມາຕີ ທີ່ຈະຈັດຂື້ນໃນຕົ້ນປີ 2014. ຕະຫຼອດໄລຍະ 10 ປີທີ່ຜ່ານມາ, ພວກເຮົາສາມາດບັນລຸຜົນສຳເລັດໃນຫຼາຍດ້ານ ໃນການແກ້ໄຂຄວາມຕ້ອງການ ພິເສດແລະບັນຫາສະເພາະຂອງປະເທດກຳລັງພັດທະນາທີ່ບໍ່ມີຊາຍແດນຕິດທະເລ. ແຕ່ພ້ອມກັນນັ້ນ, ປະເທດກຳລັງພັດທະນາທີ່ບໍ່ມີຊາຍແດນຕິດທະເລກໍ່ໄດ້ປະເຊີນກັບສິ່ງທ້າທາຍຕ່າງໆໃນການເຊື່ອມໂຍງເຂົ້າກັບລະບົບເສດຖະກິດ ແລະການຄ້າຂອງພາກພື້ນແລະສາກົນ.
ທ່ານ ດຣ. ທອງລຸນ ສີສຸລິດເຫັນວ່າ, ໜຶ່ງໃນບູລິມະສິດອັນຮີບດ່ວນຂອງປະເທດກຳລັງພັດທະນາທີ່ບໍ່ມີຊາຍແດນຕິດທະເລ ແມ່ນການສ້າງລະບົບຂົນສົ່ງຜ່ານແດນທີ່ມີປະສິດທິພາບ ອັນປະກອບດ້ວຍການມີຄູ່ຮ່ວມທີ່ແທ້ຈິງ ລະຫວ່າງ ພາກລັດແລະເອກະຊົນ ແລະລະຫວ່າງປະເທດກຳລັງພັດທະນາທີ່ບໍ່ມີຊາຍແດນຕິດທະເລ, ປະເທດທາງຜ່ານ ແລະຄູ່ຮ່ວມມືເພື່ອການພັດທະນາ ທັງໃນລະດັບຊາດ ລະດັບອະນຸພາກພື້ນ, ພາກພື້ນ ແລະສາກົນ. ເພື່ອໃຫ້ການຮ່ວມມືປະສົບຜົນສຳເລັດ, ການເປັນຄູ່ຮ່ວມ ຕ້ອງຢູ່ບົນພື້ນຖານທີ່ຕ່າງຝ່າຍຕ່າງໄດ້ຮັບຜົນປະໂຫຍດ ຈາກການປະຕິບັດມາດຕະການສະເພາະ ພາຍໃຕ້ແຜນດຳເນີນງານອານມາຕີ. ລັດຖະບານລາວມີຄວາມມຸ້ງໝັ້ນຢ່າງແຮງກ້າ ໃນການຈັດຕັ້ງປະຕິບັດແຜນດຳເນີນງານ ອານມາຕີ ໃຫ້ມີປະສິດທິຜົນ ໂດຍໄດ້ນຳເອົາເນື້ອໃນຈິດໃຈຂອງແຜນງານດັ່ງກ່າວເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດຂອງຕົນ.
ກຸ່ມປະເທດກໍາລັງພັດທະນາທີ່ບໍ່ມີຊາຍແດນຕິດທະເລແມ່ນໜຶ່ງໃນ 3 ກຸ່ມ ທີ່ອົງການສະຫະປະຊາຊາດຖືວ່າເປັນກຸ່ມທີ່ມີຄວາມອ່ອນໄຫວທີ່ສຸດ, ປັດຈຸບັນ, ມີສະມາຊິກທັງໝົດ 31 ປະເທດ ໃນນີ້ອາຊີມີ 10 ປະເທດ ອາຟຣິກກາ 15 ປະເທດ ເອີຣົບ 4 ປະເທດ ແລະ ອາເມລິກາລາຕິນ 2 ປະເທດ. ຍ້ອນທີ່ຕັ້ງດ້ານພູມມີສາດ, ປະເທດເຫລົ່ານີ້ຈຶ່ງປະສົບກັບຄວາມຫຍຸ້ງຍາກ ແລະ ສິ່ງທ້າທາຍຫລາຍຢ່າງ ໃນການພັດທະນາເສດຖະກິດ-ສັງຄົມຂອງຕົນ.
