ຕາມຂ່າວCRI: ວັນທີ 14 ມີນານີ້, ທ່ານຈູມມະລີ ໄຊຍະສອນ ປະທານປະເທດລາວ ແລະ ທ່ານບຸນຍັງ ວໍລະຈິດ ຮອງປະທານປະເທດລາວໄດ້ສົ່ງໂທລະເລກຊົມເຊີຍທ່ານສີຈີນຜີງໄດ້ຮັບເລືອກຕັ້ງເປັນປະທານປະເທດຈີນ,ທ່ານຫຼີຢວນຊາວໄດ້ຮັບເລືອກຕັ້ງເປັນຮອງປະທານປະເທດຈີນ.
ເນື້ອໃນໂທລະເລກຊົມເຊີຍມີດັ່ງລຸ່ມນີ້:
ໂທລະເລກຊົມເຊີຍເຖິງ:ສະຫາຍ ສີຈີນຜີງ
ປະທານປະເທດແຫ່ງສາທາລະນະລັດປະຊາຊົນຈີນ
ທີ່ນະຄອນຫຼວງປັກກິ່ງສະຫາຍທີ່ນັບຖື ແລະ ຮັກແພງ,
ເນື່ອງໃນໂອກາດທີ່ສະຫາຍໄດ້ຮັບການເລືອກຕັ້ງຈາກກອງປະຊຸມຄົບຄະນະຄັ້ງທີ 1 ຂອງສະພາຜູ້ແທນປະຊາຊົນທົ່ວປະເທດສະໄໝທີ Ⅻ ແຫ່ງສາທາລະນະລັດປະຊາຊົນຈີນໃຫ້ດຳລົງຕຳແໜ່ງເປັນປະທານປະເທດແຫ່ງສາທາລະນະລັດປະ
ຊາຊົນຈີນ, ຕາງໜ້າໃຫ້ລັດຖະບານ ແລະ ປະຊາຊົນລາວກໍຄືໃນນາມສ່ວນຕົວ,ຂ້າພະເຈົ້າຂໍຖືເປັນກຽດສົ່ງຄວາມຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງສະຫາຍ.
ການເລືອກຕັ້ງໃຫ້ສະຫາຍດຳລົງຕຳແໜ່ງອັນສູງສົ່ງນີ້ ແມ່ນເປັນການສະແດງເຖິງຄວາມໄວ້ວາງໃຈ ແລະ ການຕີລາຄາສູງຂອງພັກ, ລັດ ແລະ ປະຊາຊົນຈີນ ຕໍ່ການປະກອບສ່ວນໃຫຍ່ຫຼວງຂອງສະຫາຍ ເຂົ້າໃນພາລະກິດ ປະຕິຮູບ ແລະ ເປີດປະຕູສູ່ໂລກພາຍນອກຕາມທິດທາງຂອງພັກກອມມູນິດຈີນໄດ້ວາງອອກ.
ຂ້າພະເຈົ້າ ເຊື່ອໝັ້ນຢ່າງໜັກແໜ້ນວ່າ, ພາຍໃຕ້ການນຳພາອັນສະຫຼາດສອງໃສຂອງພັກກອມມູນິດຈີນທີ່ມີສະຫາຍເປັນແກ່ນນຳນັ້ນ, ພາລະກິດກໍ່ສ້າງສັງຄົມນິຍົມທີ່ມີສີສັນຂອງຈີນ ຈະສຳເລັດບັນດາເປົ້າໝາຍ ສູ້ຊົນໃນສັດຕະວັດໃໝ່, ເຮັດໃຫ້ສາທາລະນະລັດປະຊາຊົນຈີນກ້າວໄປສູ່ປະເທດສັງຄົມນິຍົມທີ່ທັນສະໄໝ ແລະ ມີບົດບາດສູງເດັ່ນຂຶ້ນໃນເວທີພາກພື້ນ ແລະ ສາກົນ.
ຂໍອວຍພອນໃຫ້ສາຍພົວພັນມິດຕະພາບຖານບ້ານໃກ້ເຮືອນຄຽງທີ່ມີມູນເຊື້ອ ແລະ ການຮ່ວມມືຍຸດທະສາດຮອບດ້ານ ທີ່ມີປະສິດຜົນ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ ແລະ ຈີນ ຈົ່ງໃຫ້ຮັບການຂະຫຍາຍຕົວເລື້ອຍໄປ ເພື່ອພາລະກິດ ສັນຕິພາບ ແລະ ການພັດທະນາຢູ່ພາກພື້ນ ກໍຄືໃນໂລກ.
ອວຍພອນໃຫ້ສະຫາຍ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ໄດ້ຮັບຜົນສຳເລັດອັນໃຫຍ່ຫຼວງກວ່າເກົ່າ ໃນໜ້າທີ່ທີ່ມີກຽດສະຫງ່າຂອງສະຫາຍ.
ນະຄອນຫຼວງວຽງຈັນ,ວັນທີ 14 ມີນາ 2013
ຈູມມະລີ ໄຊຍະສອນ
ປະທານປະເທດ ແຫ່ງ
ສາທາລະນະລັດ ປະຊາທິປະໄຕ ປະຊາຊົນລາວ
© China Radio International.CRI. All Rights Reserved. 16A Shijingshan Road, Beijing, China. 100040 |