ກະຊວງອະນຸລັກສິ່ງແວດລ້ອມຈີນຈະໃຊ້ມາດຕະການທີ່ແຂງແຮງເພື່ອປັບປຸງມົນລະພິດອາກາດຢູ່ເຂດທີ່ມີມົນລະພິດໜັກໜ່ວງ
(GMT+08:00) 2013-03-16 14:38:35 cri
ຕາມຂ່າວສານຊີນຮວາ:ວັນທີ 15 ມີນານີ້,ທ່ານອູສຽວຊີ່ງ,ລັດຖະມົນຕີຊ່ວຍວ່າການກະຊວງອະນຸລັກສິ່ງແວດລ້ອມຂອງຈີນກ່າວວ່າ:ປີນີ້ຈະສຸມໃສ່ວຽກງານແກ້ໄຂການມົນລະພິດອາກາດຢູ່ເຂດທີ່ມີມົນລະພິດໜັກໜ່ວງເຊັ່ນນະຄອນປັກກິ່ງ,ທຽນສິນ,ແຂວງເຫີເປ,ເຂດສາມຫຼ່ຽມແມ່ນ້ຳຈູ່ຈ່ຽງແລະເຂດສາມຫຼ່ຽມແມ່ນ້ຳຢາງຊີກ້ຽງເປັນຕົ້ນໃຫ້ດີ,ໂດຍໃຊ້ມາດຕະການທີ່ແຂງແຮງຢູ່ເຂດເຫຼົ່ານີ້.
ໃນງານຖະແຫຼງຂ່າວຂອງກອງປະຊຸມເທື່ອທຳອິດຂອງສະພາປະຊາຊົນແຫ່ງຊາດຈີນສະໄໝທີ 12 ທີ່ຈັດຂຶ້ນໃນວັນທີ 15 ມີນານີ້,ທ່ານອູສຽວຊີ່ງໄດ້ສະເໜີມາດຕະການແກ້ໄຂທີ່ຈະໃຊ້ຢູ່ເຂດທີ່ມີມົນລະພິດໜັກໜ່ວງ,ລວມທັງການຄວບຄຸມຍອດຈຳນວນການນຳໃຊ້ຖ່ານຫີນຢູ່ເຂດທີ່ມີມົນລະພິດໜັກໜ່ວງ.ນັບແຕ່ປີນີ້ເປັນຕົ້ນໄປ,ຈີນຈະເລີ່ມປະຕິບັດການຈຳກັດພິເສດຕໍ່ການລະບາຍສິ່ງມົນລະພິດອາກາດຢູ່ເຂດທີ່ມີມົນລະພິດໜັກໜ່ວງ.ທ່ານກ່າວວ່າ:ຈີນຈະຕັ້ງໜ້າຊຸກຍູ້ການດັດແກ້ກົດໝາຍວ່າດ້ວຍການປ້ອງກັນແລະແກ້ໄຂການມົນລະພິດອາກາດ,ຊຸກຍູ້ອົງການປົກຄອງທຸກຂັ້ນໃຫ້ເລັ່ງລັດປະຕິບັດຕາມໜ້າທີ່ຮັບຜິດຊອບຕໍ່ການແກ້ໄຂສິ່ງມົນລະພິດອາກາດ,ແລະເພີ່ມຄວາມແຮງໃນການປະຕິບັດກົດໝາຍໃນດ້ານສິ່ງແວດລ້ອມ.
ທ່ານຍັງໄດ້ສະເໜີອີກວ່າ:ຈີນໄດ້ໃຫ້ຄວາມສຳຄັນໃນລະດັບສູງຕໍ່ການແກ້ໄຂການມົນລະພິດຈາກໂລຫະໜັກ,ໃນສອງປີມານີ້,ໄດ້ປິດວິສາຫະກິດທີ່ສ້າງມົນລະພິດໂລຫະໜັກຢ່າງໜັກໜ່ວງນັ້ນໃນຈຳນວນ 1000 ກວ່າແຫ່ງແລ້ວ,ປະຈຸບັນ,ອົງປະກອບອຸດສາຫະກຳໂລຫະໜັກຂອງຈີນໄດ້ຮັບການປັບປຸງໃຫ້ດີຂຶ້ນເປັນກ້າວໆ.