ປິດກອງປະຊຸມເທື່ອທຳອິດຂອງສະພາປະຊາຊົນແຫ່ງຊາດຈີນສະໄໝທີ 12,ທ່ານສີຈິ້ນຜິງກ່າວຄຳປາໄສອັນສຳຄັນ,ບັນລະຍາຍ"ຄວາມຝັນຂອງຈີນ"ອີກເທື່ອໜຶ່ງ
(GMT+08:00) 2013-03-17 15:26:38 cri
ຕາມຂ່າວCRI:ວັນທີ 17 ມີນານີ້,ພິທີປິດກອງປະຊຸມເທື່ອທຳອິດຂອງສະພາປະຊາຊົນແຫ່ງຊາດຈີນສະໄໝທີ 12 ໄດ້ຈັດຂຶ້ນຢູ່ທີ່ປັກກິ່ງ,ທ່ານສີຈິ້ນຜິງ,ປະທານປະເທດຈີນໄດ້ກ່າວຄຳປາໄສອັນສຳຄັນໃນພິທີໂດຍໄດ້ບັນລະຍາຍອີກເທື່ອໜຶ່ງກ່ຽວກັບຄວນເຮັດແນວໃດເພື່ອບັນລຸຄວາມຝັນຂອງຈີນ.ທ່ານກ່າວວ່າ:ເວົ້າເຖິງກົກເຖິງຮາກແລ້ວ,ຄວາມຝັນຂອງຈີນແມ່ນຄວາມຝັນຂອງປະຊາຊົນ,ຕ້ອງອາໄສປະຊາຊົນມາເຮັດໃຫ້ມັນປະກົດເປັນຈິງ,ຕ້ອງສ້າງຄວາມຜາສຸກໃຫ້ແກ່ປະຊາຊົນຢ່າງບໍ່ຢຸດຢັ້ງ.
ທ່ານສີຈິ້ນຜິງກ່າວວ່າ:ການບັນລຸຄວາມຝັນຂອງຈີນຕ້ອງສົ່ງເສີມຈິດໃຈປະເທດຈີນ.ນີ້ກໍ່ແມ່ນຈິດໃຈຂອງຊາດທີ່ຖືລັດທິຮັກຊາດເປັນໃຈກາງ,ແລະຈິດໃຈຍຸກສະໄໝທີ່ຖືການປະຕິຮູບແລະຫົວຄິດປະດິດສ້າງເປັນໃຈກາງ.
ທ່ານສີຈິ້ນຜິງກ່າວວ່າ:ການບັນລຸຄວາມຝັນຂອງຈີນຕ້ອງເດີນຕາມເສັ້ນທາງຂອງຈີນ.ນີ້ກໍ່ແມ່ນເສັ້ນທາງສັງຄົມນິຍົມທີ່ມີສີສັນພິເສດຂອງຈີນ.
ທ່ານສີຈິ້ນຜິງຍັງກ່າວອີກວ່າ:ການບັນລຸຄວາມຝັນຂອງຈີນຕ້ອງທ້ອນໂຮມກຳລັງຂອງຈີນ.ນີ້ກໍ່ແມ່ນກຳລັງແຫ່ງຄວາມສາມັກຄີໃຫຍ່ຂອງປະຊາຊົນຈີນ.
ກອງປະຊຸມເທື່ອທຳອິດຂອງສະພາປະຊາຊົນແຫ່ງຊາດຈີນສະໄໝທີ 12 ໄດ້ລົງຄະແນນສຽງຮັບຮອງມະຕິກ່ຽວກັບບົດລາຍງານວຽກງານຂອງລັດຖະບານ,ໄດ້ອະນຸມັດບົດລາຍງານວຽກງານຂອງລັດຖະບານ;ໄດ້ລົງຄະແນນສຽງຮັບຮອງມະຕິກ່ຽວກັບບົດລາຍງານວຽກງານຂອງຄະນະປະຈຳສະພາປະຊາຊົນແຫ່ງຊາດຈີນ,ໄດ້ອະນຸມັດບົດລາຍງານຂອງຄະນະປະຈຳສະພາປະຊາຊົນແຫ່ງຊາດຈີນ;ໄດ້ລົງຄະແນນສຽງຮັບຮອງມະຕິກ່ຽວກັບສະພາບການປະຕິບັດງົບປະມານການເງິນຂອງສູນກາງແລະທ້ອງຖິ່ນປີ 2012 ແລະງົບປະມານຂອງສູນກາງແລະທ້ອງຖິ່ນປີ 2013,ໄດ້ອະນຸມັດບົດລາຍງານງົບປະມານແລະງົບປະມານສູນກາງປີ 2013;ໄດ້ລົງຄະແນນສຽງຮັບຮອງມະຕິກ່ຽວກັບບົດລາຍງານວຽກງານຂອງອົງການໄອຍະການປະຊາຊົນສູງສຸດ,ໄດ້ອະນຸມັດບົດລາຍງານວຽກງານຂອງອົງການໄອຍະການປະຊາຊົນສູງສຸດ.ພາຍຫຼັງໄດ້ສຳເລັດໜ້າທີ່ທັງໝົດແລ້ວ,ທ່ານຈ່າງເຕີ໊ຈ່ຽງ,ປະທານຄະນະປະຈຳສະພາປະຊາຊົນແຫ່ງຊາດຈີນໄດ້ກ່າວຄຳປາໄສແລະກ່າວປິດປະຊຸມ.