ທ່ານຫຼີເຄີ້ສຽງກ່າວວ່າ ລັດຖະບານຊຸດນີ້ຈະແກ້ໄຂສາມບັນຫາໃຫຍ່
(GMT+08:00) 2013-03-17 15:31:06 cri
ຕາມຂ່າວສານຊີນຮວາ:ວັນທີ 17 ມີນານີ້,ໃນກອງປະຊຸມຖະແຫຼງຂ່າວຂອງກອງປະຊຸມເທື່ອທຳອິດຂອງສະພາປະຊາຊົນແຫ່ງຊາດຈີນສະໄໝທີ 12,ທ່ານຫຼີເຄີ້ສຽງ,ນາຍົກລັດຖະມົນຕີຈີນກ່າວວ່າ:ລັດຖະບານຊຸດນີ້ຈະແກ້ໄຂສາມບັນຫາໃຫຍ່ຄື:ພັດທະນາເສດຖະກິດຢ່າງຕໍ່ເນື່ອງ,ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນຢ່າງບໍ່ຢຸດຢັ້ງແລະຊຸກຍູ້ຄວາມຍຸດຕິທຳຂອງສັງຄົມ.
ທ່ານຫຼີເຄີ້ສຽງກ່າວວ່າ:ອັນທີ 1,ຕ້ອງພັດທະນາເສດຖະກິດຢ່າງຕໍ່ເນື່ອງ.ສະພາບແວດລ້ອມດ້ານເສດຖະກິດຈີນໃນໄລຍະຕໍ່ໜ້າຍັງສັບສົນຢູ່,ພວກຂ້າພະເຈົ້າຕ້ອງຮັກສາໃຫ້ເສດຖະກິດເຕີບໂຕຢ່າງຕໍ່ເນື່ອງ,ປ້ອງກັນບໍ່ໃຫ້ເກີດໄພເງິນເຟີ້,ຄວບຄຸມຄວາມສ່ຽງທີ່ບົ່ມຊ້ອນ,ເຮັດໃຫ້ເສດຖະກິດຈີນບໍ່ເກີດມີຄວາມປັ່ນປ່ວນໃຫຍ່;ອັນທີ 2,ຕ້ອງປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນຢ່າງບໍ່ຢຸດຢັ້ງ,ສຸມໃສ່ໃນການເຮັດໃຫ້ປະຊາຊົນໃນຕົວເມືອງແລະຊົນນະບົດໂດຍສະເພາະແມ່ນຜູ້ທີ່ມີລາຍໄດ້ຕ່ຳມີລາຍໄດ້ເພີ່ມຂຶ້ນ,ເປີດກວ້າງກຸ່ມຄົນທີ່ມີລາຍໄດ້ຜ້ານກາງຢ່າງຕໍ່ເນື່ອງ;ອັນທີ 3,ຕ້ອງຊຸກຍູ້ຄວາມຍຸດຕິທຳທາງສັງຄົມ,ພະຍາຍາມເຮັດໃຫ້ແຕ່ລະຄົນມີໂອກາດທີ່ສະເໝີພາບກັນ.
ທ່ານຫຼີເຄີ້ສຽງຊີ້ອອກວ່າ:ການແກ້ໄຂສາມບັນຫານີ້,ຍັງຕ້ອງມີສາມສິ່ງຮັບປະກັນຄື:ອັນທີ 1 ແມ່ນສ້າງລັດຖະບານທີ່ມີຫົວຄິດປະດິດສ້າງ,ອາໄສການປະຕິຮູບແລະໄຂປະຕູສູ່ພາຍນອກເຮັດໃຫ້ເສດຖະກິດສັງຄົມເຕັມໄປດ້ວຍຄວາມມີຊີວິດຊີວາ;ອັນທີ 2 ແມ່ນສ້າງລັດຖະບານທີ່ປອດໄສຂາວສະອາດ,ເພີ່ມທະວີຄວາມໄວ້ເນື້ອເຊື່ອໃຈຂອງປະຊາຊົນທີ່ມີຕໍ່ລັດຖະບານພ້ອມດ້ວຍກຳລັງປະຕິບັດແລະປະສິດທິຜົນຂອງລັດຖະບານ;ອັນທີ 3 ແມ່ນສ້າງລັດຖະບານທີ່ປົກຄອງດ້ວຍກົດໝາຍ,ຕ້ອງນຳໃຊ້ຈິດໃຈປົກຄອງດ້ວຍກົດໝາຍມາສ້າງສາເສດຖະກິດ,ສັງຄົມແລະລັດຖະບານຍຸກປະຈຸບັນ.