ທ່ານທອງລຸນ ສີສຸລິດສົ່ງໂທລະເລກຊົມເຊີຍເຖິງທ່ານຢາງເຈຍສື ທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງປຶກສາແຫ່ງລັດຈີນ ແລະສົ່ງໂທລະເລກຊົມເຊີຍເຖິງທ່ານວາງອີ້ ທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນລັດຖະມົນຕີວ່າການກະຊວງການຕ່າງປະເທດຈີນ
(GMT+08:00) 2013-03-18 10:48:20 cri
ຫວ່າງມໍ່ໆນີ້,ທ່ານທອງລຸນສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດແຫ່ງສາທາລະນະລັດ ປະຊາທິປະໄຕປະຊາຊົນລາວ.ໄດ້ສົ່ງໂທລະເລກເຖິງທ່ານຢາງເຈຍສື ທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງປຶກສາແຫ່ງລັດແຫ່ງສາທາລະນະລັດປະຊາຊົນຈີນທີ່ນະຄອນຫຼວງປັກກິ່ງ.ເນື້ອໃນໂທລະເລກຂຽນວ່າ:
ເນື່ອງໃນໂອກາດທີ່ສະຫາຍໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນທີ່ປຶກສາແຫ່ງລັດແຫ່ງສາທາລະນະລັດປະຊາຊົນຈີນ,ຂ້າພະເຈົ້າ ຂໍສົ່ງຄວາມຊົມເຊີຍຢ່າງສຸດອົກສຸດໃຈມາຍັງສະຫາຍ.
ການທີ່ ສະຫາຍໄດ້ຮັບແຕ່ງຕັ້ງໃຫ້ດຳລົງຕຳແໜ່ງທີ່ມີຄວາມຮັບຜິດຊອບສູງນີ້ ເປັນການສະແດງເຖິງຄວາມໄວ້ວາງໃຈແລະການຕີລາຄາສູງຂອງພັກ,ລັດຖະບານແລະປະຊາຊົນຈີນທີ່ມາຕໍ່ສະຫາຍ.
ຂໍອວຍພອນໃຫ້ ສະຫາຍຈົ່ງມີສຸຂະພາບເຂັ້ມແຂງ ແລະປະສົບຜົນສຳເລັດໃໝ່ໃຫຍ່ຫຼວງກວ່າເກົ່າໃນພາລະກິດອັນສູງສົ່ງຂອງສະຫາຍ.
ໃນໂອກາດດຽວກັນນີ້,ທ່ານທອງລຸນ ສີສຸລິດ ຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງການຕ່າງປະເທດສປປລາວຍັງໄດ້ສົ່ງໂທລະເລກຊົມເຊີຍເຖິງທ່ານວາງອີ້ ລັດຖະມົນຕີວ່າການກະຊວງການຕ່າງປະເທດແຫ່ງສາທາລະນະລັດ ປະຊາຊົນຈີນທີ່ນະຄອນຫຼວງປັກກິ່ງເຊັ່ນດຽວກັນ.ເນື້ອໃນໂທລະເລກຂຽນວ່າ:
ເນື່ອງໃນໂອກາດທີ່ສະຫາຍໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນລັດຖະມົນຕີວ່າການກະຊວງການຕ່າງປະເທດແຫ່ງສາທາລະນະລັດປະຊາຊົນຈີນ, ຂ້າພະເຈົ້າຂໍສົ່ງຄວາມຊົມເຊີຍຢ່າງຈິງໃຈມາຍັງສະຫາຍ.
ການທີ່ສະຫາຍ ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງທີ່ມີຄວາມຮັບຜິດຊອບສູງນີ້, ເປັນການສະ ແດງເຖິງຄວາມໄວ້ເນື້ອເຊື່ອໃຈແລະການຕີລາຄາສູງຂອງພັກ,ລັດຖະບານແລະປະຊາຊົນຈີນຕໍ່ບົດບາດແລະການປະກອບສ່ວນອັນສຳຄັນຂອງສະຫາຍເຂົ້າໃນພາລະກິດປະຕິຮູບແລະເປີດປະຕູສູ່ໂລກພາຍນອກ ເພື່ອໃຫ້ ສປຈີນ ກາຍເປັນປະເທດສັງຄົມນິຍົມທີ່ທັນສະໄໝແລະມັ່ງຄັ່ງເຂັ້ມແຂງ,ມີບົດບາດນັບມື້ນັບສູງເດັ່ນຂຶ້ນໃນເວທີພາກພື້ນແລະສາກົນ.
ຂ້າພະເຈົ້າມີຄວາມຍິນດີເປັນຢ່າງຍິ່ງທີ່ຈະໄດ້ຮ່ວມກັບສະຫາຍເພື່ອເສີມສ້າງສາຍພົວພັນມິດຕະພາບ ອັນເປັນມູນເຊື້ອແລະການຮ່ວມມືຮອບດ້ານລະຫວ່າງສປປລາວແລະສປຈີນ,ໂດຍສະເພາະແມ່ນການຮ່ວມມືທີ່ມີປະສິດທິຜົນລະຫວ່າງສອງຂະແໜງການຕ່າງປະເທດລາວແລະຈີນໃຫ້ມີການຂະຫຍາຍຕົວຢ່າງບໍ່ຢຸດຢັ້ງ ເພື່ອຜົນປະໂຫຍດລວມແຫ່ງສັນຕິພາບແລະການພັດທະນາ.
ຂໍອວຍພອນໃຫ້ ສະຫາຍ ຈົ່ງມີສຸຂະພາບເຂັ້ມແຂງ ແລະປະສົມຜົນສຳເລັດໃໝ່ໃຫຍ່ຫຼວງກວ່າເກົ່າໃນພາລະກິດອັນສູງສົ່ງຂອງສະຫາຍ.