ນະຄອນຫຼວງວຽງຈັນຈັດງານຄອນເສີດກຸສົນ ເພື່ອຊ່ວຍເຫຼືອບຸກຄົນໂອທິສຕິກ
(ງານຄອນເສີດການກຸສົນເພື່ອສົມທົບທຶນຊ່ວຍເຫລືອບຸກຄົນໂອທິສຕິກ)
ຕາມຂ່າວ CRI: ຕອນຄໍ່າວັນທີ 29 ມີນານີ້, ສະມາຄົມນັກທຸລະກິດຍິງລາວຮ່ວມກັບ ສະມາຄົມນັກຂ່າວ ແລະ ສະມາຄົມຫັດຖະກຳລາວ ໄດ້ຈັດງານຄອນເສີດການກຸສົນ ເພື່ອສົມທົບທຶນຊ່ວຍເຫຼືອບຸກຄົນໂອທິສຕິກທີ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ.
ກ່ອນການສະແດງ, ທ່ານ ນາງ ວຽງຊຳ ສໍອິນໄຊ, ປະທານສະມາຄົມເພື່ອຄົນໂອທິສຕິກໄດ້ແນະນຳຄວາມເປັນມາຂອງສະມາຄົມແລະຈຸດປະສົງຂອງງານນີ້, ທ່ານກ່າວວ່າ, ເພື່ອຫາຊ່ອງທາງຊ່ວຍເຫຼືອລູກໂອທິສຕິກຂອງຕົນ, ປີ 2005, ຜູ້ປົກຄອງຂອງເດັກໂອທິສຕິກຈຳນວນໜຶ່ງໄດ້ລິເລີ່ມຮວມຕົວກັນ,ກາຍເປັນຈຸດເລີ່ມຕົ້ນຂອງການສ້າງສູນ ເພື່ອຄົນໂອທິສຕິກວຽງຈັນ. ໃນໄລຍະ 7 ປີຜ່ານມາ, ວຽກງານຊ່ວຍເຫຼືອຄົນໂອທິສຕິກໄດ້ມີການຂະຫຍາຍຕົວຢ່າງໄວວາ, ແຕ່ກໍ່ຍັງຂາດທຶນຮອນຢ່າງຫຼວງຫຼາຍ, ສະນັ້ນ, ຈຶ່ງໄດ້ຈັດງານຄອນເສີດກຸສົນນີ້ຂື້ນມາ, ເພື່ອເປີດໂອກາດ ໃຫ້ບໍລິສັດ, ຫ້າງຮ້ານແລະທຸກພາກສ່ວນ ໃນສັງຄົມລາວ ໄດ້ມີສ່ວນຮ່ວມໃນການບໍລິຈາກ ໂດຍການສົມທົບທຶນຮອນເພື່ອຊ່ວຍ ໃຫ້ສະມາຄົມມີແຫຼ່ງທຶນພຽງພໍເຂົ້າໃສ່ກອງທຶນສົ່ງເສີມ ການສຶກສາ, ພ້ອມທັງເປີດໂອກາດ ໃຫ້ພວກເຮົາ ບັນລຸເປົ້າໝາຍການຂະຫຍາຍ ຂອດບໍລິການນີ້ຢ່າງທົ່ວເຖິງ.
ງານຄອນເສີດດັ່ງກ່າວໄດ້ເລີ່ມຕົ້ນດ້ວຍການສະແດງບົດຟ້ອນປະກອບສຽງແຄນ ເດັກນ້ອຍຈາກສະໂມສອນດ່ານຊ້າງ, ຕາມມາດ້ວຍການສະແດງບົດເພງ ແລະ ການສະແດງເຕັ້ນປະກອບເພງຂອງເດັກໂອທິສຕິກ. ນອກນັ້ນ, ຍັງມີການສະແດງປະກອບ ສຽງເພງ in your arms ຂອງທ່ານ ນາງ ອາລຸນາ ຖາວອນສຸກ, ສິນລະປິນທີ່ມີຊື່ສຽງຕ່າງໆ, ເຊິ່ງກໍໄດ້ຮັບສຽງຕົບມື ແລະ ສຽງເຊຍຈາກຜູ້ເຂົ້າຮ່ວມຢ່າງຟົດຟື້ນ.
