ຕຳຫຼວດຈາລະຈອນນະຄອນຫຼວງ, ກຽມພ້ອມກ້ອນກຳລັງໃສ່ບຸນປີໃໝ່ລາວ ພສ2556
(GMT+08:00) 2013-04-03 18:10:26 cri
ວັນທີ 3 ເມສານີ້, ທີ່ນະຄອນຫຼວງວຽງຈັນ ທ່ານ ພັນໂທ ພົມມະຈັນ ສວນບຸນມາ ຮອງຫ້ອງຕຳຫຼວດ ແລະ ຫົວໜ້າພະແນກຕຳຫຼວດຈາລະຈອນນະຄອນຫຼວງວຽງຈັນໄດ້ໃຫ້ສຳພາດຕໍ່ສື່ມວນຊົນກ່ຽວກັບການກຽມຄວາມພ້ອມຂອງກ້ອນກຳລັງຈາລະຈອນທົ່ວນະຄອນຫຼວງວຽງຈັນ ໃນການສະເຫຼີມສະຫຼອງປີໃໝ່ລາວ ພສ 2556 ທີ່ຈະມາເຖິງນີ້.
ທ່ານກ່າວວ່າ: ເພື່ອຮັບປະກັນຄວາມສະຫງົບ, ປອດໄພ, ຄວາມເປັນລະບຽບຮຽບຮ້ອຍ ແລະ ມີບັນຍາກາດເບີກບານມ່ວນຊື່ນ, ກຳລັງຕຳຫຼວດຈາລະຈອນຂອງນະຄອນຫຼວງໄດ້ວາງແຜນການຈັດວາງກ້ອນກຳລັງໃສ່ຕາມພື້ນທີ່ຕ່າງໆ. ນອກນັ້ນ, ເລີ່ມແຕ່ວັນທີ 3 ເມສານີ້, ຍັງຈະໄດ້ລົງໂຄສະນາ, ຢາຍແຜ່ນພັບເພື່ອໃຫ້ປະຊາຊົນມີສະຕິໃນການໃຊ້ຍານພາຫະນະຕາມເສັ້ນທາງຕ່າງໆ, ເຄົາລົບລະບຽບຈາລະຈອນ ແລະ ເລີ່ມແຕ່ວັນທີ 12 ເມສານີ້, ຕຳຫຼວດຈາລະຈອນນະຄອນຫຼວງຈະເລີ່ມວາງກ້ອນກຳລັງໃສ່ຈຸດທີ່ຮັບຜິດຊອບຕາມເສັ້ນທາງ 13 ເໜືອ, 13 ໄຕ້ ແລະ ເສັ້ນທາງທ່າເດື່ອ. ນອກນັ້ນ, ກຳລັງເຈົ້າໜ້າທີ່ຈາລະຈອນຍັງໄດ້ຈັດກຳລັງຢູ່ພາກສ່ວນປະຈຳຢູ່ປ້ອມຍາມ, ພາກສ່ວນກຳລັງຈັດລະບຽບຕາມສາຍທາງຕ່າງໆເພື່ອຮັບປະກັນການສັນຈອນໃຫ້ມີຄວາມປອດໄພ.
ທ່ານກ່າວຕື່ມວ່າ: ໃນປີກາຍນີ້, ນະຄອນຫຼວງວຽງຈັນມີຕົວເລກຂອງຜູ້ເສຍຊີວິດສູງກວ່າແຂວງອື່ນໆ ເຊິ່ງມີອຸບັດຕິເຫດເກີດຂື້ນທັງໝົດ 52 ລາຍ. ເສຍຊີວິດ 7 ລາຍ, ສາຍເຫດສ່ວນໃຫຍ່ແມ່ນມາຈາກການດື່ມສິ່ງມືນເມົາແລ້ວຂັບຂີ່ຍານພາຫານະ, ບໍ່ເຄົາລົບລະບຽບຈາລະຈອນ, ສະນັ້ນ, ປີນີ້ທາງເຈົ້າໜ້າທີ່ຈາລະຈອນຈະເລັ່ງກຳລັງເຂົ້າໃສ່ເພື່ອໃຫ້ອຸບັດຕິເຫດຫຼຸດລົງໜ້ອຍກວ່າປີຜ່ານມາ.
