ວິທະຍຸກະຈາຍສຽງແຫ່ງຊາດນຳໃຊ້ອາຄານໃໝ່
ຕອນເຊົ້າວັນທີ 12 ເມສານີ້, ວິທະຍຸກະຈາຍສຽງແຫ່ງຊາດລາວໄດ້ ຈັດພິທີເປີດການນຳໃຊ້ອາຄານສຳນັກງານຫລັງໃໝ່ ແລະ ສະເຫຼີມສະຫຼອງບຸນປີໃໝ່ລາວ. ໂດຍມີ ສາດສະດາຈານ ດຣ ບໍ່ແສງ ຄຳ ວົງດາລາ, ລັດຖະມົນຕີວ່າການ ກະຊວງຖະແຫຼງຂ່າວ ວັດທະນະທຳແລະທ່ອງທ່ຽວ, ທ່ານ ສີພາ ນົງລາດ, ຜູ້ອຳນວຍການວິທະຍຸກະຈາຍສຽງແຫ່ງຊາດ ລາວ, ແຂກຖືກເຊີນ, ພ້ອມດ້ວຍ ພະນັກງານພາຍໃນວິທະຍຸກະຈາຍສຽງແຫ່ງຊາດເຂົ້າຮ່ວມ.
ອາຄານສຳນັກງານຫລັງໃໝ່ຂອງວິທະຍຸກະຈາຍສຽງແຫ່ງຊາດລາວ ຕັ້ງຢູ່ຕິດກັບ ອາຄານ ຫລັງເກົ່າ, ຂ້າງສະໜາມກິລາເຈົ້າອະນຸວົງເມືອງຈັນທະບູລີນະຄອນຫຼວງວຽງຈັນ, ເປັນອາຄານ 4 ຊັ້ນເປັບຮູບໂຕ ແອວ ມີ 35 ຫ້ອງ, ໃນນີ້ມີຫ້ອງປະຊຸມໃຫຍ່ສາມາດບັນຈຸໄດ້ 200 ຄົນ 1 ຫ້ອງ, ຫ້ອງປະຊຸມນ້ອຍບັນຈຸໄດ້ 20 – 25 ຄົນ 2 ຫ້ອງ, ຫ້ອງອັດ ແລະ ອອກອາກາດສົດ 5 ຫ້ອງ, ເຫຼືອນັ້ນເປັນຫ້ອງການຂອງພະນັກງານ, ເລີ່ມລົງມືກໍ່ສ້າງໃນວັນທີ 5 ກຸມພາປີກາຍນີ້, ມາຮອດຕົ້ນເດືອນ ກຸມພາ ປີນີ້ໄດ້ສຳເລັດສົມບູນ ໂດຍແມ່ນ ບໍລິສັດ ພົນສັກ ທະວີຊັບ ຈຳກັດ ເປັນຜູ້ຮັບເໝົາກໍ່ສ້າງໃນມູນຄ່າ 10 ຕື້ 400 ລ້ານກີບ.
ໃນໂອກາດຂຶ້ນລາຍງານຜົນສຳເລັດການກໍ່ສ້າງອາຄານຫລັງໃໝ່ຂອງວິທະຍຸກະຈາຍສຽງ ແຫ່ງຊາດລາວໃນຄັ້ງນີ້ ທ່ານ ທອງພິມ ດີມະນີວົງ, ຮອງຜູ້ອຳນວຍການວິທະຍຸກະຈາຍສຽງແຫ່ງ ຊາດລາວ ໄດ້ກ່າວວ່າ: ຜົນສຳເລັດການກໍ່ສ້າງອາຄານຫລັງນີ້ ເປັນການຕອບສະໜອງກັບການ ຂະຫຍາຍຕົວຂອງວຽກງານການກະຈາຍສຽງ ແລະ ອຳນວຍຄວາມສະດວກໃຫ້ແກ່ພະນັກງານ ພາຍໃນວິທະຍຸກະຈາຍສຽງແຫ່ງຊາດລາວມີບ່ອນເຮັດວຽກສະດວກສະບາຍ ແລະປະກອບ ສ່ວນສຳຄັນເຮັດໃຫ້ວຽກງານກະຈາຍສຽງນັບມື້ດີຂຶ້ນເລື້ອຍໆ.
