ນາງ ແສນສົມພອນ ແສນຄຳຍອງ ເປັນນາງສັງຂານນະຄອນຫຼວງວຽງຈັນປະຈຳປີ ພສ 2556
ພິທີປະກວດນາງສັງຂານປະຈໍາປີ ພສ 2556 ຂອງນະຄອນຫຼວງວຽງຈັນຮອບຕັດສິນ ໄດ້ຈັດຂື້ນໃນຕອນຄໍ່າວັນທີ 12 ເມສານີ້ທີ່ເດີ່ນພະທາດຫຼວງນະຄອນຫຼວງວຽງຈັນ, ນາງ ແສນສົມພອນ ແສນຄຳຍອງ ໄດ້ເປັນນາງສັງຂານນະຄອນຫຼວງວຽງຈັນປະຈຳປີ ພສ 2556. ເປັນກຽດເຂົ້າຮ່ວມໃນງານມີທ່ານ ສາຍທອງ ແກ້ວດວງດີ, ຮອງເຈົ້າຄອງນະຄອນຫຼວງ ວຽງຈັນ, ທ່ານນາງ ວັນເພັງ ແກ້ວນະຄອນ, ຫົວໜ້າພະແນກຖະແຫຼງຂ່າວວັດທະນະທຳ ແລະທ່ອງທ່ຽວນະຄອນຫຼວງວຽງຈັນ, ມີບັນດາແຂກຖືກເຊີນ ແລະ ມວນຊົນຊາວນະຄອນຫຼວງເຂົ້າຮ່ວມຢ່າງຫຼວງຫຼາຍ.
ການປະກວດນາງສັງຂານປະຈໍາປີ ພສ 2556 ມີຜູ້ເຂົ້າຮ່ວມການຄັດເລືອກມີທັງໝົດ 24 ນ້ອງຊຶ່ງສົ່ງມາຈາກ 9 ຕົວເມືອງທົ່ວນະຄອນຫຼວງວຽງຈັນ. ຜ່ານການຄັດເລືອກ, ມີ 14 ນ້ອງໄດ້ເຂົ້າສູ່ຮອບຕັດສິນນີ້. ໃນຮອບຕັດສິນ, ໄດ້ມີການຕອບຄຳຖາມເພື່ອໃຫ້ຖືກໃຈຄະນະກຳມະການ ແລະ ກອງເຊຍ, ສຸດທ້າຍ, ມີນ້ອງນາງສາວ 7 ຄົນໄດ້ຄັດເລືອກອອກມາໃຫ້ເປັນນາງສັງຂານປີນີ້, ໃນນັ້ນ, ນາງ ແສນສົມພອນ ແສງຄຳຍອງ ສາວງາມໝາຍເລກ M4 ໄດ້ຊະນະເລີດ, ແລະຄອງຕຳແໜ່ງນາງສັງຂານນະຄອນຫຼວງວຽງຈັນປະຈຳປີ ພສ 2556 , ແລະໄດ້ຮັບສາຍສະພາຍ, ມົງກຸດ ພ້ອມດວ້ຍເງິນສົດລວມມູນຄ່າ 35 ລ້ານກີບ. ອັນດັບສອງແມ່ນນາງ ສົມທະວິນ ສີດວງໄຊ, ໝາຍເລກ M6. ອັນດັບທີ 3 ແມ່ນນາງ ຄຳພູນ ພົມມະວົງ, ໝາຍເລກ M8, ອັນດັບທີ 4 ແມ່ນນາງ ນິພາວັນ ມິ່ງບຸບຜາ, ໝາຍເລກ M2, ອັນດັບທີ 5 ແມ່ນນາງ ຈັນສຸດາ ບຸນຍະວົງ, ໝາຍເລກ M17. ອັນດັບທີ 6 ແມ່ນນາງ ເຂັມເພັດ ອະນຸລັກ, ໝາຍເລກ M10. ແລະ ອັນດັບທີ 7ແມ່ນນາງ ຈິດສະດາ ວົງໄຊສະຫວາດ, ໝາຍເລກ M24.
ການປະກວດນາງສັງຂານປະຈຳປີ ພສ 2556 ນອກຈາກຄົ້ນຫາ 7 ສາວງາມເພື່ອເປັນຕົວແທນຂອງລູກສາວທັງ 7 ຂອງພະຍາກະບິນລະພົມແລ້ວ ນາງສາວທັງ 7 ນ້ອງຍັງຈະໄດ້ເຄື່ອນໄຫວກິດຈະກຳຕ່າງໆຕາມຮີດຄອງປະເພນີປີໃໝ່ລາວ ເປັນຕົວແທນໃຫ້ແກ່ແມ່ຍິງລາວໃນການເຜີຍແຜ່ວັດທະນະທຳອັນດີງາມຂອງຊາດລາວນຳອີກ.
