ໂທລະເລກສະແດງຄວາມເຫັນໃຈຂອງຜູ້ນຳ ສປປລາວ
ຕາມຂ່າວCRI, ວັນທີ20ເມສານີ້, ຢູ່ເມືອງລູຊານ ແຂວງເສສວນຈີນໄດ້ເກີດໄພແຜ່ນດິນໄຫວຢ່າງຮ້າຍແຮງ, ມື້ດຽວກັນ, ທ່ານຈູມມາລີ ໄຊຍະນສອນ ປະທານປະເທດ ແລະ ທ່ານທອງສີງ ທຳມະວົງ ນາຍົກລັດຖະມົນຕີ ແຫ່ງສປປລາວ ໄດ້ສົ່ງໂທລະເລກສະແດງຄວາມເຫັນໃຈໄປຍັງທ່ານສີຈິນຜິງ ປະທານປະເທດ ແລະທ່ານຫຼີເຄີ້ຊຽງ ນາຍົກລັດຖະມົນຕີ ແຫ່ງສປຈີນ, ເຊິ່ງມີເນື້ອໃນດັ່ງນີ້.
ພວກຂ້າພະເຈົ້າໄດ້ຮັບຂ່າວດ້ວຍຄວາມເສົ້າສະຫຼົດໃຈວ່າ ໃນເວລາ 8:02 ໂມງ ຂອງວັນທີ 20 ເມສາ 2013, ໄດ້ເກີດມີແຜ່ນດິນໄຫວຢ່າງຮຸນແຮງຢູ່ເມືອງລູຊານ ນະຄອນຢາອ່ານ ແຂວງເສສວນ ຂອງ ສປຈີນ ໄດ້ສ້າງຄວາມເສຍຫາຍຢ່າງຫຼວງຫຼາຍຕໍ່ຊີວິດ ແລະ ຊັບສິນຂອງປະຊາຊົນກໍຄືພື້ນຖານໂຄງລ່າງຂອງເຂດດັ່ງກ່າວ.
ໃນນາມພັກ, ລັດຖບານ ແລະ ປະຊາຊົນລາວບັນດາເຜົ່າ ກໍຄືໃນນາມສ່ວນຕົວ, ພວກຂ້າພະເຈົ້າ ຂໍສະແດງຄວາມເສຍໃຈ ແລະ ເຫັນອົກເຫັນໃຈເປັນຢ່າງຈິງໃຈ ມາຍັງພວກສະຫາຍ ແລະ ໂດຍຜ່ານພວກສະຫາຍ ໄປຍັງພັກ, ລັດຖະບານ ແລະ ປະຊາຊົນຈີນອ້າຍນ້ອງ ໂດຍສະເພາະໄປຍັງຄອບຄົວຜູ້ປະສົບເຄາະຮ້າຍຈາກໄພພິບັດຄັ້ງນີ້.
ພວກຂ້າພະເຈົ້າເຊື່ອໝັ້ນວ່າ, ດ້ວຍຄວາມເອົາໃຈໃສ່ຊ່ວຍເຫຼືອຢ່າງທັນການຂອງສູນກາງພັກ, ລັດຖະບານ ກໍຄືອຳນາດການປົກຄອງທ້ອງຖິ່ນ ແລະ ດ້ວຍມູນເຊື້ອດຸໝັ່ນຂະຫຍັນພຽນ ທີ່ບໍ່ເຄີຍຍອມຈຳນົນຕໍ່ໄພທຳມະຊາດ ຂອງປະຊາຊົນຈີນອ້າຍນ້ອງນັ້ນ, ຄວາມເສຍຫາຍດັ່ງກ່າວຈະໄດ້ຮັບການປົວແປງ ແລະ ຊີວິດການເປັນຢູ່ຂອງປະຊາຊົນໃນເຂດໄດ້ຮັບຜົນກະທົບຈາກໄພພິບັດທາງທຳມະຊາດໃນຄັ້ງນີ້ ຈະໄດ້ຣັບການບູລະນະ, ຟື້ນຟູ ແລະ ກັບຄືນສູ່ສະພາບປົກະຕິໂດຍໄວ.
