ທ່ານຊາງວ້ານຊວນເຂົ້າຮ່ວມກອງປະຊຸມລັດຖະມົນຕີວ່າການກະຊວງປ້ອງກັນປະເທດຈີນ-ອາຊຽນ
ວັນທີ 7 ພຶດສະພານີ້,ທ່ານຊາງວ້ານຊວນ, ທີ່ປຶກສາແຫ່ງລັດ, ທັງເປັນລັດຖະມົນຕີວ່າ ການກະຊວງປ້ອງກັນປະເທດຈີນທີ່ພວມຢ້ຽມຢາມບຼູໄນໄດ້ເຂົ້າຮ່ວມກອງປະຊຸມລັດຖະມົນຕີວ່າການກະຊວງປ້ອງກັນປະເທດຈີນແລະອາຊຽນຄັ້ງທີ 3, ມີຜູ້ນຳຂອງກະຊວງປ້ອງກັນປະເທດທີ່ມາຈາກ 10 ປະເທດອາຊຽນແລະຜູ້ຮັບຜິດຊອບຂອງກອງເລຂາອາຊຽນໄດ້ເຂົ້າຮ່ວມກອງປະຊຸມ. ຝ່າຍຕ່າງໆທີ່ຮ່ວມປະຊຸມໄດ້ລົງເລິກແລກປ່ຽນຄວາມເຫັນຢ່າງຈິງໃຈກ່ຽວກັບການເພີ່ມທະວີການຮ່ວມມືດ້ານວຽກງານປ້ອງກັນແລະຮັກສາຄວາມໝັ້ນຄົງລະຫວ່າງຈີນກັບອາຊຽນ.
ທ່ານໂມຮາມັດ ຢັສມິນ, ປະທານໝູນວຽນຂອງກອງປະຊຸມລັດຖະມົນຕີວ່າການກະຊວງປ້ອງກັນປະເທດອາຊຽນ, ລັດຖະມົນຕີວ່າການກະຊວງພະລັງງານຂອງບຼູໄນໄດ້ເປັນປະທານກອງປະຊຸມ. ທ່ານກ່າວວ່າ, ຈີນແມ່ນໜຶ່ງໃນບັນດາຄູ່ຮ່ວມມືສຳຄັນທີ່ສຸດຂອງອາຊຽນ. ອາຊຽນຍິນດີເພີ່ມທະວີການແລກປ່ຽນແລະຮ່ວມມືກັບຈີນ, ຊຸກຍູ້ສ້າງຄວາມໄວ້ເນື້ອເຊື່ອໃຈກັນດ້ານຍຸດທະສາດແລະການພົວພັນດ້ານວຽກງານປ້ອງກັນລະຫວ່າງສອງຝ່າຍໃຫ້ຂຶ້ນສູ່ລະດັບສູງອັນໃໝ່.
ທ່ານຊາງວ້ານຊວນກ່າວເນັ້ນວ່າ, ຈີນຈະຍຶດໝັ້ນຫຼັກການແຫ່ງ "ໄມຕີຈິດຕໍ່ປະເທດໃກ້ຄຽງ, ຖືປະເທດໃກ້ຄຽງເປັນເພື່ອນທີ່ດີ", ຍິນດີຮ່ວມກັບພາກສ່ວນວຽກງານປ້ອງກັນຂອງບັນດາປະເທດອາຊຽນ, ບົນພື້ນຖານຫຼັກການທີ່ " ໄວ້ເນື້ອເຊື່ອໃຈກັນ, ຕ່າງຝ່າຍຕ່າງມີຜົນປະໂຫຍດແລະເຫັນໃຈເຊິ່ງກັນແລະກັນ", ສືບຕໍ່ຊຸກຍູ້ການແລກປ່ຽນແລະຮ່ວມມືດ້ານວຽກງານປ້ອງກັນແລະການພົວພັນຄູ່ຍຸດທະສາດລະຫວ່າງຈີນກັບອາຊຽນ, ຮ່ວມກັນປົກປັກຮັກສາສັນຕິພາບ, ຄວາມຈະເລີນແລະສະຖຽນລະພາບຂອງພາກພື້ນ.
ລັດຖະມົນຕີວ່າການກະຊວງປ້ອງກັນປະເທດຂອງບັນດາປະເທດອາຊຽນເຫັນວ່າ, ກອງປະຊຸມປຶກສາຫາລືໄດ້ສ້າງເວທີທີ່ດີທີ່ຊ່ວຍໃຫ້ບັນດາຝ່າຍແລກປ່ຽນຄວາມເຫັນ,ເພີ່ມຄວາມໄວ້ເນື້ອເຊື່ອໃຈແລະອະທິບາຍຄວາມບໍ່ເຂົ້າໃຈກ່ຽວກັບນະໂຍບາຍດ້ານວຽກງານປ້ອງກັນ, ຍິນດີສືບຕໍ່ເພີ່ມທະວີການສົນທະນາແລະຮ່ວມມືດ້ານການຮັກສາຄວາມໝັ້ນຄົງກັບຈີນຕື່ມອີກ.
