ປະທານປະເທດຈີນພົບປະເຈລະຈາກັບນາຍົກລັດຖະມົນຕີອິສຣາແອນ
(GMT+08:00) 2013-05-09 18:34:37 cri
ວັນທີ 9 ພຶດສະພານີ້, ຢູ່ທີ່ນະຄອນຫຼວງປັກກິ່ງ, ທ່ານສີຈິ້ນຜິງ ປະທານປະເທດຈີນໄດ້ພົບປະກັບທ່ານເບັນຈາມິນ ເນທັນຢາຮູ ນາຍົກລັດຖະມົນຕີອິສຣາແອນ, ທ່ານສີຈິ້ນຜິງກ່າວວ່າ, ການບັນລຸໃຫ້ອິສຣາແອນແລະປາແລັດສຕິນເປັນບ້ານໃກ້ເຮືອນຄຽງທີ່ດີຕໍ່ກັນ, ອິສຣາແອນກັບທຸກປະເທດອາຣັບຢູ່ຮ່ວມກັນໂດຍສັນຕິນັ້ນແມ່ນເປົ້າໝາຍພະຍາຍາມຂອງບັນດາຝ່າຍແລະຄວາມປາຖະໜາຂອງປະຊາຄົມໂລກ. ຫວັງວ່າອິສຣາແອນແລະປາແລັສຕິນຈະທຳຄວາມພະຍາຍາມຮ່ວມກັນ, ໃຊ້ມາດຕະການຕົວຈິງໃນການສ້າງຄວາມໄວ້ເນື້ອເຊື່ອໃຈກັນເປັນກ້າວໆ, ຈັດການເຈລະຈາສັນຕິພາບຄືນໃໝ່ໂດຍໄວແລະໄດ້ຮັບຄວາມຄືບໜ້າຕົວຈິງ.
ທ່ານສີຈິ້ນຜິງກ່າວວ່າ: ເຂດຕາເວັນອອກກາງຢູ່ໃນແປວໄຟສົງຄາມເປັນເວລາດົນນານມາແລ້ວ,ມາຮອດປະຈຸບັນກໍ່ຍັງບໍ່ມີຄວາມສະຫງົບ. ການສະແຫວງຫາສັນຕິພາບ,ສະຖຽນລະພາບແລະຊຸກຍູ້ການພັດທະນາແມ່ນຄວາມປາຖະໜາຮ່ວມຂອງປະເທດໃນພາກພື້ນນີ້, ການແກ້ໄຂຄວາມຂັດແຍ່ງດ້ວຍວິທີທາງການເມືອງແມ່ນທາງເລືອກດ້ານຍຸດທະສາດທີ່ສອດຄ່ອງກັບຜົນປະໂຫຍດພື້ນຖານຂອງຝ່າຍຕ່າງໆ. ຈີນຈະສືບຕໍ່ຍຶດໝັ້ນຈຸດຢືນທີ່ພາວະວິໄສແລະຍຸດຕິທຳ, ພະຍາຍາມຊຸກຍູ້ການເຈລະຈາສັນຕິພາບ,ຊຸກຍູ້ໃຫ້ບັນຫາຈຸດສຸມໃນພາກພື້ນໄດ້ຮັບການແກ້ໄຂດ້ວຍວິທີທາງການເມືອງ,ແລະປະກອບສ່ວນເຂົ້າໃນການປົກປັກຮັກສາສັນຕິພາບແລະສະຖຽນລະພາບຂອງເຂດຕາເວັນອອກກາງ.
ໂອກາດນີ້,ທ່ານເນທັນຢາຮູໄດ້ແຈ້ງໃຫ້ຊາບຈຸດຢືນທີ່ກ່ຽວຂ້ອງຂອງອິສຣາແອນ. ທ່ານກ່າວວ່າ: ອິສຣາແອນຮູ້ດີຕໍ່ຄວາມທຸກທໍລະມານຈາກແປວໄຟສົງຄາມ, ຍິນດີຕ້ອນຮັບແລະປາຖະໜາຫາສັນຕິພາບ, ຍິນດີຈັດການເຈລະຈາເພື່ອບັນລຸສັນຕິພາບ. ອິສຣາແອນຍ້ອງຍໍຈີນທີ່ໄດ້ສຸມກຳລັງເຂົ້າໃນການຊຸກຍູ້ຂະບວນການສັນຕິພາບຕາເວັນອອກກາງ, ແລະຍິນດີຮັກສາການແລກປ່ຽນຄວາມເຫັນກັບຈີນ.
