ສປປລາວໄດ້ຮັບລາງວັນເປັນປະເທດທີ່ໜ້າທ່ອງທ່ຽວທີ່ສຸດໃນໂລກສຳລັບປີ2013
ຕາມຂ່າວCRI: ວັນທີ9ພຶດສະພານີ້,ຢູ່ທີ່ນະຄອນຫຼວງວຽງຈັນ, ທ່ານອັນໂຕນ ຄາຣາກີ, ປະທານສະພາການທ່ອງທ່ຽວແລະການຄ້າສະຫະພາບເອີລົບໄດ້ມອບລາງວັນໃຫ້ແກ່ສປປລາວ, ເນື່ອງໃນໂອກາດທີ່ສປປລາວໄດ້ຮັບຄັດເລືອກເປັນປະເທດທີ່ໜ້າທ່ອງທ່ຽວທີ່ສຸດໃນໂລກສຳລັບປີ2013. ທ່ານບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫຼງຂ່າວວັດທະນະທຳແລະທ່ອງທ່ຽວໄດ້ຕາງໜ້າລັດຖະບານລາວຮັບລາງວັນດັ່ງກ່າວ.
ທ່ານອັນໂຕນ ຄາຣາກີກ່າວວ່າ, ເມື່ອກ້າວເຂົ້າສູ່ສັດຕະວັດທີ 21, ການທ່ອງທ່ຽວໄດ້ກາຍເປັນຂົວຕໍ່ອັນສຳຄັນໃຫ້ແກ່ມິດຕະພາບແລະການພົວພັນລະຫວ່າງປະຊາຊາດໃນໂລກ, ເປັນຫົນທາງໜຶ່ງໃນການສົ່ງເສີມສັນຕິພາບແລະຄວາມເຂົ້າອົກເຂົ້າໃຈເຊິ່ງກັນແລະກັນ, ທັງເປັນເສັ້ນທາງທີ່ຈະນຳພາໄປສູ່ອະນາຄົດທີ່ດີກວ່າ. ທ່ານອັນໂຕນ ຄາຣາ ກີໄດ້ສະເໜີເຫດຜົນທີ່ເລືອກເອົາ ສປປລາວ ໃຫ້ເປັນປະເທດທີ່ໜ້າທ່ອງທ່ຽວທີ່ສຸດໃນໂລກສຳລັບປີ 2013, ເຊິ່ງກໍ່ຄື: ໄດ້ປົກປັກຮັກສາມໍລະດົກທາງດ້ານປະຫວັດສາດແລະວັດທະນະທຳອັນລ້ຳຄ່າເປັນຢ່າງດີ; ໄດ້ອະນຸລັກກິດຈະກຳການທ່ອງທ່ຽວທາງສາສະໜາທີ່ມີຄຸນຄ່າແລະຄວາມໝາຍສຳຄັນໃນລະດັບໂລກ; ໄດ້ຊຸກຍູ້ແລະສົ່ງເສີມການພັດທະນາການທ່ອງທ່ຽວແບບປະຊາຊົນມີສ່ວນຮ່ວມ; ນອກຈາກແຫຼ່ງທ່ອງທ່ຽວທີ່ໂດດເດັ່ນທາງດ້ານປະຫວັດສາດແລະວັດທະນະທຳແລ້ວ, ສປປລາວຍັງມີແຫຼ່ງທ່ອງທ່ຽວທາງດ້ານທຳມະຊາດທີ່ງົດງາມ; ແລະໄດ້ສືບຕໍ່ຢ່າງຕັ້ງໜ້າໃນການພັດທະນາແລະປົກປັກຮັກສາມໍລະດົກທາງດ້ານວັດທະນະທຳແລະປະຫວັດສາດ.
ທ່ານບໍ່ແສງຄຳ ວົງດາລາກ່າວວ່າ, ສປປລາວຈະສືບຕໍ່ພັດທະນາຂະແໜງການທ່ອງທ່ຽວໃຫ້ດີ ເພື່ອປະກອບສ່ວນເສີມສ້າງແລະເພີ່ມທະວີສາຍພົວພັນມິດຕະພາບລະຫວ່າງປະຊາຊາດໃນໂລກ, ເພື່ອພ້ອມກັນສົ່ງເສີມສັນຕິພາບແລະຄວາມເຂົ້າອົກເຂົ້າໃຈກັນ, ພ້ອມກັນກ້າວເຂົ້າສູ່ອະນາຄົດອັນຈະເລີນຮຸ່ງເຮືອງແຫ່ງການພັດທະນາພາຍໃຕ້ທ້ອງຟ້າແຫ່ງສັນຕິພາບ ມິດຕະພາບ ແລະການຮ່ວມມືກັນຢ່າງຍືນຍົງ.
ທ່ານອາຊາງ ລາວລີ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ທ່ານທອງລຸນ ສີສຸລິດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງການຕ່າງປະເທດ, ບັນດາທ່ານລັດຖະມົນຕີວ່າການ, ຊ່ວຍວ່າການ, ບັນດາທູຕານຸທູດປະຈຳລາວແລະຜູ້ຕາງໜ້າວົງການຕ່າງໆໃນສັງຄົມລາວໄດ້ເຂົ້າຮ່ວມພິທີມອບຮັບນາມມະຍົດດັ່ງກ່າວ. ແຕ່ປີ2006ເປັນຕົ້ນໄປ, ສະພາການທ່ອງທ່ຽວແລະການຄ້າສະຫະພາບເອີລົບເລີ່ມຈັດກິດຈະກຳປະກວດປະເທດທີ່ໜ້າທ່ອງທ່ຽວທີ່ສຸດໃນໂລກ. ປະເທດທີ່ເຄີຍໄດ້ຮັບນາມມະຍົດດັ່ງກ່າວມີ: ຊີລີ, ຕວກກີ, ສະຫະລັດອາຣັບເອມີເຣດ, ສ.ເກົາຫຼີ, ທຣີນີດັດ, ໂທແບໂກ ແລະສປປລາວ.
