ທຳນຽບປະທານາທິບໍດີຟິລິບປິນສະແດງຄວາມຂໍໂທດຕໍ່ຊາວປະມົງໄຕ້ຫວັນຖືກຍິງເສຍຊີວິດ
ຕອນບ່າຍວັນທີ 15 ພຶດສະພານີ້, ໃນກອງປະຊຸມຂ່າວທີ່ຈັດຂຶ້ນໃນທຳນຽບປະທານາທິບໍດີຟິລິບປິນ,ໂຄສົກປະທານາທິບໍດີຟິລິບປິນອ່ານຄຳຖະແຫຼງການວ່າ, ທ່ານເບນິກໂນ ອາກີໂນ III ໄດ້ແຕ່ງຕັ້ງທ່ານອາມາດິໂອ ເປີເຣສ໌, ປະທານໜ່ວຍງານເສດຖະກິດວັດທະນະທຳມານີລາເປັນຜູ້ຕາງໜ້າຂອງທ່ານເອງ, ກ່າວສະແດງ "ຄວາມເສຍໃຈແລະຄວາມຂໍໂທດຢ່າງເລິກເຊິ່ງຂອງທ່ານແລະປະຊາຊົນຟິລິບປິນ" ໄປຍັງຄອບຄົວຂອງທ່ານຫົງສືເຊີງ, ຊາວປະມົງໄຕ້ຫວັນທີ່ຖືກຍິງເສຍ ຊີວິດ, ພ້ອມດ້ວຍປະຊາຊົນໄຕ້ຫວັນ ທີ່ໄດ້ເກີດເຫດຄາດຕະກຳໂດຍບັງເອີນ.
ວັນທີ 9 ພຶດສະພານີ້, ເຮືອປະມົງໄຕ້ຫວັນ"ກວາງຕ້າຊິ່ງ 28" ຖືກກຳປັ່ນປ້ອງກັນແຄມຝັ່ງທະເລຟິລິບປິນຍິງປືນກວາດໃສ່, ລູກເຮືອຊື່ ຫົງສືເຊີງທີ່ມີອາຍຸ 65 ປີຖືກຍິງເສຍຊີວິດ. ຫຼາຍມື້ມານີ້, ປະຊາຊົນສອງຝັ່ງຊ່ອງແຄບໄຕ້ຫວັນພາກັນກ່າວປະນາມຕໍ່ເຫດການນີ້. ວັນທີ 15 ພຶດສະພານີ້, ໂຄສົກປະທານາທິບໍດີຟິລິບປິນກ່າວວ່າ, ອີງຕາມຄຳສັ່ງຂອງທ່ານປະທານາທິບໍດີເບນິກໂນ, ກົມສຳຫຼວດແຫ່ງຊາດຟິລິບປິນໄດ້ເລີ່ມເຂົ້າຮ່ວມການສຳຫຼວດ, ແລະຮັບປາກວ່າ ຈະດຳເນີນການສຳຫຼວດເຫດການນີ້ຢ່າງ "ເຖິງຖອງ, ລະອຽດ, ທ່ຽງທຳແລະວ່ອງໄວ". ກົມສຳຫຼວດແຫ່ງຊາດຟິລິບປິນໄດ້ຈັດເອົາວຽກງານນີ້ໄວ້ຢູ່ໃນຖານະທີ່ຕ້ອງປະຕິບັດກ່ອມເພື່ອຈະໄດ້ຮັບການແກ້ໄຂໂດຍໄວ.
ໂຄສົກຜູ້ນີ້ກ່າວວ່າ ພວກຂ້າພະເຈົ້າເຂົ້າໃຈຄວາມໂສກເສົ້າແລະຄວາມເຈັບຊ້ຳໜຳໃຈຂອງ ຄອບຄົວຜູ້ເສຍຊີວິດແລະປະຊາຊົນໄຕ້ຫວັນຍ້ອນເຫດການນີ້, ພວກຂ້າພະເຈົ້າສະແດງຄວາມເຫັນໃຈຢ່າງສຸດຊື້ງຕໍ່ພວກເຂົາເຈົ້າ.
