ສປປລາວຈັດການແຂ່ງຂັນ"ຂົວພາສາຈີນ"ພາກນັກສຶກສາມະຫາວິທະຍາໄລຄັ້ງທີ8
ນທີ21ພຶດສະພານີ້ຢູ່ທີ່ມະຫາວິທະຍາໄລແຫ່ງຊາດລາວ, ສປປລາວໄດ້ຈັດການແຂ່ງຂັນ"ຂົວພາສາຈີນ"ພາກນັກສຶກສາມະຫາວິທະຍາໄລຄັ້ງທີ 8 ເພື່ອຄັດເລືອກຕົວແທນນັກສຶກສາລາວເຂົ້າຮ່ວມການແຂ່ງຂັນ"ຂົວພາສາຈີນ"ຄັ້ງທີ12ທີ່ສປຈີນ. ທ່ານອູຈື້ອູ, ອຸປະທູດແຫ່ງສປຈີນປະຈຳລາວ, ທ່ານບຸນເພັງ ສົມຈັນມະວົງ, ຮອງຫົວໜ້າກົມອາຊີວະສຶກສາກະຊວງສຶກສາທິການແລະກິລາ, ແລະບັນດາແຂກທີ່ຮັບເຊີນຈາກພາກສ່ວນຕ່າງໆທີ່ກ່ຽວຂ້ອງໄດ້ເຂົ້າຮ່ວມຢ່າງພ້ອມພຽງ.
ໃນການແຂ່ງຂັນຄັ້ງນີ້, ມີນັກສຶກສາພາກວິຊາພາສາຈີນທັງໝົດ28ຄົນເຂົ້າຮ່ວມ, ໃນນັ້ນ, ມີ8ຄົນໄດ້ຜ່ານເຂົ້າສູ່ຮອບສຸດທ້າຍ. ຜ່ານການແຂ່ງຂັນກ່າວປາຖະກະຖາ, ແລະການສະແດງສິລະປະວັດທະນະທຳຈີນ, ໃນທີ່ສຸດ, ນາງກິຕາ ອາສິດນິພາບໄດ້ຮັບລາງວັນທີ1, ທ້າວເລັ່ງລີໄດ້ຮັບລາງວັນທີ2,ນາງມະໂນລາ ຈັນທະວອນໄດ້ຮັບລາງວັນເວົ້າພາສາດີເດັ່ນ, ແລະນາງພອນມິບ ບາວີຄຳໄດ້ຮັບລາງວັນການສະແດງຄວາມສາມາດດີເດັ່ນ. ຫຼັງຈາກງານແຂ່ງຂັນຄັ້ງນີ້, ຜູ້ໄດ້ລາງວັນທີ1ຈະເປັນຕົວແທນຂອງນັກສຶກສາລາວໄປເຂົ້າຮ່ວມການແຂ່ງຂັນຮອບຊີງຊະນະເລີດຂອງງານແຂ່ງຂັນ"ຂົວພາສາຈີນ"ຄັ້ງທີ12ທີ່ຈະຈັດຂຶ້ນຢູ່ແຂວງຫູນານຈີນ, ເຊິ່ງມີຫົວຂໍ້ວ່າ"ປະເທດຈີນແຫ່ງຄວາມຝັນຂ້ອຍ", ຮອດເວລານັ້ນ,ຈະມີນັກສຶກສາດີເດັ່ນທີ່ມາຈາກ70ກວ່າປະເທດເຊິ່ງລວມທັງປະເທດລາວຈະເຂົ້າຮ່ວມການແຂ່ງຂັນແລະສະແດງຄວາມສາມາດຂອງຕົນ.
