ທ່ານຫຼີເຄີ້ສຽງແລະທ່ານຊີງຮ່ວມກັນຖະແຫຼງຂ່າວ
ວັນທີ 20 ພຶດສະພານີ້, ພາຍຫຼັງການເຈລະຈາລະຫວ່າງສອງຝ່າຍສຳເລັດລົງ, ທ່ານຫຼີເຄີ້ສຽງ, ນາຍົກລັດຖະມົນຕີຈີນແລະທ່ານມານໂມຮານ ຊິງ, ນາຍົກລັດຖະມົນຕີອິນເດຍໄດ້ຮ່ວມກັນຖະແຫຼງຂ່າວ.
ທ່ານຫຼີເຄີ້ສຽງແລະທ່ານຊີງຮ່ວມກັນຖະແຫຼງຂ່າວ
ທ່ານຫຼີເຄີ້ສຽງກ່າວວ່າ, ຂ້າພະເຈົ້າແລະທ່ານນາຍົກລັດຖະມົນຕີມານໂມຮານ ຊິງໄດ້ດຳເນີນການເຈລະຈາຢ່າງເປີດອົກເປີດໃຈແລະມີໄມຕີຈິດມິດຕະພາບ, ສອງຝ່າຍໄດ້ອອກຖະແຫຼງການຮ່ວມ, ກຳນົດທິດຂະຫຍາຍຕົວແຫ່ງການຮ່ວມມືໃນຫຼາຍຂົງເຂດ, ແລະໄດ້ບັນລຸຄວາມເຫັນທີ່ເປັນເອກະສັນກັນດ້ານຍຸດທະສາດ, ຄວາມໄວ້ເນື້ອເຊື່ອໃຈດ້ານຍຸດທະສາດລະຫວ່າງສອງຝ່າຍກໍໄດ້ເພີ່ມຂຶ້ນ. ພວກຂ້າພະເຈົ້າເປັນເອກະສັນກັນເຫັນວ່າ, ສອງປະເທດຈີນອິນເດຍຄວນຖືການພັດທະນາຂອງປະເທດກົງກັນຂ້າມເປັນໂອກາດການພັດທະນາອັນໃຫຍ່ຫຼວງຂອງປະເທດຕົນ, ຈີນອິນເດຍຢູ່ຮ່ວມກັນດ້ວຍຄວາມປອງດອງກັນຈະສ້າງຈຸດຮຸ່ງໃສອັນໃໝ່ແຫ່ງການຮ່ວມມືຂອງອາຊີ, ການພັດທະນາຮ່ວມຂອງຈີນແລະອິນເດຍຈະເປັນແມ່ແຮງໃໝ່ທີ່ຊຸກຍູ້ເສດຖະກິດໂລກ. ລະຫວ່າງຈີນແລະອິນເດຍມີຜົນປະໂຫຍດຮ່ວມຫຼາຍກວ່າຄວາມຂັດແຍ່ງກັນ, ສອງປະເທດສາມາດຮຽນເອົາແບບຢ່າງອັນດີງາມຈາກປະຫວັດສາດອັນຍາວນານຂອງສອງປະເທດ, ຖອດຖອນແລະນຳໃຊ້ບົດຮຽນອັນອຸດົມສົມບູນ, ແກ້ໄຂບັນຫາແລະຄວາມຂັດແຍ່ງກັນດ້ວຍທ່າທີທີ່ເຫັນກວ້າງມອງໄກແລະດ້ວຍຄວາມຈິງໃຈ.
ທ່ານມານໂມຮານ ຊິງກ່າວວ່າ, ການເຄົາລົບນັບຖືເຊິ່ງກັນແລະກັນແລະການແລກປ່ຽນທີ່ຕ່າງຝ່າຍຕ່າງມີຜົນປະໂຫຍດແມ່ນບັນຍາກາດຫຼັກການພົວພັນລະຫວ່າງອິນເດຍ ກັບຈີນ, ຫຼັກ 5 ປະການຢູ່ຮ່ວມກັນໂດຍສັນຕິແມ່ນພື້ນຖານຂອງການພົວພັນລະຫວ່າງສອງປະເທດ, ຄວາມແຕກຕ່າງກັນລະຫວ່າງສອງປະເທດບໍ່ໄດ້ກາຍເປັນອຸປະສັກກີດ ຂວາງການພົວພັນອິນເດຍ-ຈີນ, ພວກຂ້າພະເຈົ້າມີສະຕິປັນຍາແລະບົດຮຽນທີ່ສາມາດແກ້ໄຂບັນຫາຕ່າງໆທີ່ມີຢູ່ລະຫວ່າງສອງປະເທດໃຫ້ເໝາະສົມ. ອິນເດຍຈີນຮ່ວມມືກັນບໍ່ພຽງແຕ່ຈະສາມາດຊຸກຍູ້ການພັດທະນາລະຫວ່າງສອງປະເທດໃຫ້ຂະຫຍາຍຕົວເທົ່ານັ້ນ, ແຕ່ ຍັງຈະປະກອບສ່ວນອັນຕັ້ງໜ້າເຂົ້າໃນ ສັນຕິພາບແລະຄວາມຈະເລີນຮຸ່ງເຮືອງຂອງອາຊີ ກໍຄືຂອງໂລກອີກດ້ວຍ.
ທ່ານຫຼີເຄີ້ສຽງແລະທ່ານຊິງເຂົ້າຮ່ວມເປັນສັກຂີພິຍານໃນພິທີລົງນາມເອກະສານ
ກ່ອນຈະຖະແຫຼງຂ່າວຮ່ວມກັນ, ນາຍົກລັດຖະມົນຕີສອງທ່ານຍັງໄດ້ຮ່ວມກັນເຂົ້າຮ່ວມເປັນສັກຂີພິຍານໃນພິທີລົງນາມໃນເອກະສານຮ່ວມມືໃນຂົງເຂດຕ່າງໆ ເປັນຕົ້ນແມ່ນ: ເສດຖະກິດການຄ້າ, ກະສິກຳ, ວັດທະນະທຳ, ອະນຸລັກສິ່ງແວດລ້ອມແລະການໄປມາຫາ ສູ່ກັນລະຫວ່າງທ້ອງຖິ່ນ.
