ທ່ານສີຈິ້ນຜິງຕ້ອນຮັບການເຂົ້າຢ້ຽມຄຳນັບຂອງທ່ານປະທານສະພາດູມາແຫ່ງຊາດຣັດເຊຍ
(GMT+08:00) 2013-05-27 16:03:18 cri
ຕາມຂ່າວCRI: ວັນທີ 27 ພຶດສະພານີ້, ຢູ່ທີ່ນະຄອນຫຼວງປັກກິ່ງ, ທ່ານສີຈິ້ນຜິງ, ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງທ່ານເຊີເກ ນາຣີສກິນ, ປະທານສະພາດູມາແຫ່ງຊາດຣັດເຊຍ.
ທ່ານສີຈິ້ນຜິງກ່າວວ່າ, ໃນຍຸກໃໝ່ທາງປະຫວັດສາດ, ຫວັງວ່າຈີນ-ຣັດເຊຍອີງຕາມການພັດທະນາແລະການຜັນແປຂອງສະຖານະການ, ຕ່າງສະໜອງການສະໜັບສະໜູນອັນເດັດດ່ຽວເຊິ່ງກັນແລະກັນຕື່ມອີກ. ຫວັງໃຫ້ສອງຝ່າຍສືບຕໍ່ທຳຄວາມພະຍາຍາມຮ່ວມກັນ, ນຳໃຊ້ທ່າແຮງດ້ານການພົວພັນທາງການເມືອງລະດັບສູງລະຫວ່າງຈີນ-ຣັດເຊຍຢ່າງເຕັມສ່ວນ, ຮັດແໜ້ນການແລກປ່ຽນແລະການຮ່ວມມືລະຫວ່າງພັກຝ່າຍຕ່າງໆຂອງສອງປະເທດ, ຕັ້ງໜ້າຈັດຕັ້ງປະຕິບັດຕາມຄວາມຮັບຮູ້ທີ່ເປັນເອກະສັນກັນລະຫວ່າງສອງຝ່າຍ, ຊຸກຍູ້ໃຫ້ການຮ່ວມມືໃນຂົງເຂດຕ່າງໆໄດ້ຮັບຜົນສຳເລັດໃໝ່ຢ່າງບໍ່ຢຸດຢັ້ງ, ເພື່ອສ້າງຜົນປະໂຫຍດໃຫ້ແກ່ສອງປະເທດແລະປະຊາຊົນສອງຊາດ.
ທ່ານນາຣີສກິນກ່າວວ່າ, ຣັດເຊຍຍິນດີເພີ່ມທະວີການຮ່ວມມືທີ່ແທ້ຈິງໃນຂົງເຂດຕ່າງໆລະຫວ່າງຣັດເຊຍ-ຈີນ, ຮັດແໜ້ນການປະສານງານແລະປະສານສົມທັບກັນໃນອົງການຫຼາຍຝ່າຍ, ທຳຄວາມພະຍາຍາມຢ່າງບໍ່ລົດລະເພື່ອສ້າງການພົວພັນແບບໄມຕີຈິດມິດຕະພາບລະຫວ່າງຣັດເຊຍ-ຈີນໃຫ້ຍືນຍົງຄົງຕົວແລະສືບທອດກັນທຸກເຊັ່ນຄົນ.
