ການແຂ່ງຂັນຂົວພາສາຈີນພາກນັກຮຽນມັດທະຍົມທົ່ວໂລກຄັ້ງທີ 6 ຈັດການແຂ່ງຂັນຮອບຄັດເລືອກຢູ່ລາວ
ຕາມຂ່າວ CRI: ວັນທີ 27 ພຶດສະພານີ້, ການແຂ່ງຂັນຂົວພາສາຈີນພາກນັກຮຽນມັດທະຍົມທົ່ວໂລກຄັ້ງທີ 6 ໄດ້ຈັດການແຂ່ງຂັນຮອບຄັດເລືອກເຂດລາວຢູ່ໂຮງຮຽນຈີນປາກເຊແຂວງຈຳປາສັກ. ນັກຮຽນມັດທະຍົມ 15 ຄົນທີ່ມາຈາກໂຮງຮຽນຫລຽວໂຕນະຄອນຫຼວງວຽງຈັນ, ໂຮງຮຽນຈົງເຕັກແຂວງສະຫວັນນະເຂດ ແລະໂຮງຮຽນຈີນປາກເຊແຂວງຈໍາປາສັກໄດ້ເຂົ້າຮ່ວມການແຂ່ງຂັນ, ສະແດງຄວາມສາມາດຂອງຕົນ, ຄວາມນິຍົມຕໍ່ພາສາຈີນກໍ່ຄືວັດທະນະທຳຈີນ, ແລະຮ່ວມກັນມອບການສະແດງທີ່ມີເອກະລັກຂອງຈີນໃຫ້ແກ່ຜູ້ຊົມທັງຫຼາຍ.
ນາງເຊີນຢາເວີນ ຜູ້ໄດ້ຮັບລາງວັນທີໜຶ່ງ
ການແຂ່ງຂັນຄັ້ງນີ້ມີ 3 ຂັ້ນຕອນເຊັ່ນ: ກ່າວປາຖະກະຖາດ້ວຍພາສາຈີນ, ຕອບຄຳຖາມ, ແລະສະແດງສິລະປະຈີນ. ໂດຍຜ່ານການແຂ່ງຂັນ, ນາງ ຢູຊາ ໂພສູພັນອາມາດ ຈາກໂຮງຮຽນຈີນປາກເຊແຂວງຈໍາປາສັກ ແລະ ນາງ ນະພາວັນ ຈາກໂຮງຮຽນຫລຽວໂຕນະຄອນຫລວງວຽງຈັນໄດ້ຮັບລາງວັນທີໜຶ່ງ, ເຂົາເຈົ້າຈະເປັນຕົວແທນໃຫ້ແກ່ນັກຮຽນມັດທະຍົມຂອງລາວໄປເຂົ້າຮ່ວມການແຂ່ງຂັນຮອບຊີງຊະນະເລີດຂອງງານແຂ່ງຂັນ"ຂົວພາສາຈີນ"ພາກນັກຮຽນມັດທະຍົມທົ່ວໂລກຄັ້ງທີ 6 ທີ່ຈະຈັດຂຶ້ນຢູ່ນະຄອນຄຸນມີງແຂວງຢຸນນານຈີນໃນເດືອນຕຸລາປີນີ້.
ການແຂ່ງຂັນຄັ້ງນີ້ແມ່ນສະຖານທູດຈີນປະຈຳລາວເປັນເຈົ້າພາບ, ແລະໂຮງຮຽນຈີນປາກເຊແຂວງຈຳປາສັກເປັນຜູ້ຈັດຂຶ້ນ, ຜູ້ຕາງໜ້າສະຖານທູດຈີນປະຈຳລາວ, ຄະນະບໍລິຫານໂຮງຮຽນພາສາຈີນຂອງລາວ, ຜູ້ຕາງໜ້າຄູອາຈານແລະຫົວໜ້າສະມາຄົມຊາວຈີນຢູ່ລາວໄດ້ຮ່ວມກັນເຂົ້າຊົມການແຂ່ງຂັນຄັ້ງນີ້. ທ່ານວາງຮົງສຸນ, ຫົວໜ້າຫ້ອງການການເມືອງຂອງສະຖານທູດຈີນປະຈຳລາວໄດ້ກ່າວຄຳອວຍພອນຕໍ່ການແຂ່ງຂັນຄັ້ງນີ້, ທ່ານຫວັງໃຫ້ບັນດານ້ອງນັກຮຽນຈົ່ງຮຽນຮູ້ພາສາຈີນ, ແລະຊອກຮູ້ປະຫວັດສາດອັນຍາວນານແລະວັດທະນະທຳມູນເຊື້ອອັນດີງາມຂອງຈີນ, ເຂົ້າສູ່ປະເທດຈີນ, ຊອກຮູ້ກ່ຽວກັບປະເທດຈີນທີ່ມີຊີວິຊີວາແລະມີການພັດທະນາຢ່າງວ່ອງໄວ. ປະຈຸບັນ, ການແຂ່ງຂັນ"ຂົວພາສາຈີນ"ບໍ່ພຽງແຕ່ເປັນເວທີທີ່ວາງສະແດງຄວາມສະເໜ່ຂອງວັດທະນະທຳຈີນເທົ່ານັ້ນ, ຍັງເປັນງານມະຫະກຳທີ່ຈີນຕ່າງດ້າວແລະເຊື້ອສາຍຈີນຢູ່ລາວເຕົ້າໂຮມຊຸມນຸມກັນຢ່າງເບີກບານມ່ວນຊື່ນ.
