ປະທານສະພາປະຊາຊົນແຫ່ງຊາດຈີນພົບປະເຈລະຈາກັບປະທານສະພາແຫ່ງຊາດລາວ
ວັນທີ 3 ມິຖຸນານີ້, ຢູ່ນະຄອນຫຼວງປັກກິ່ງ, ທ່ານຈ່າງເຕີຈ່ຽງ ປະທານສະພາປະຊາຊົນແຫ່ງຊາດຈີນໄດ້ພົບປະເຈລະຈາກັບທ່ານນາງປານີ ຢ່າທໍ່ຕູ້ ປະທານສະພາແຫ່ງຊາດລາວ. ທ່ານຈ່າງເຕີຈ່ຽງກ່າວວ່າ: ຈີນໃຫ້ຄວາມສຳຄັນໃນການຂະຫຍາຍການພົວພັນມິດຕະພາບຖ້ານບ້ານໃກ້ເຮືອນຄຽງທີ່ດີກັບປະເທດອ້ອມຂ້າງ, ພະຍາຍາມເຮັດໃຫ້ການພັດທະນາຂອງຕົນສ້າງຜົນປະໂຫຍດແກ່ປະເທດອ້ອມຂ້າງຊຶ່ງລວມທັງລາວໃຫ້ຫຼາຍກວ່າເກົ່າ, ຈີນຍິນດີຮ່ວມກັບປະເທດຕ່າງໆເຊັ່ນລາວ, ຮ່ວມກັນປົກປັກຮັກສາແລະຊຸກຍູ້ສະຖຽນລະພາບແລະຄວາມຈະເລີນຮຸ່ງເຮືອງຂອງອາຊີ.
ການພົບປະເຈລະຈາຢ່າງເປັນທາງການລະຫວ່າງປະທານສະພາປະຊາຊົນແຫ່ງຊາດຈີນແລະຄະນະກັບປະທານສະພາແຫ່ງຊາດລາວແລະຄະນະ
ທ່ານຈ່າງເຕີຈ່ຽງກ່າວວ່າ:ມິດຕະພາບຈີນລາວມີມູນເຊື້ອແລະມີປະຫວັດອັນຍາວນານ. ໃນໄລຍະໃໝ່, ການພົວພັນລະຫວ່າງສອງປະເທດໄດ້ຮັບການຂະຫຍາຍຕົວຢ່າງຮອບດ້ານ. ການນຳສູນກາງຊຸດໃໝ່ໂດຍມີທ່ານສີຈີ້ນຜິງເປັນເລຂາທິການໃຫຍ່ນັ້ນໄດ້ເອົາໃຈໃສ່ຕໍ່ການຂະຫຍາຍການພົວພັນໄມຕີຈິດມິດຕະພາບຖານບ້ານໃກ້ເຮືອນຄຽງທີ່ດີກັບປະເທດອ້ອມຂ້າງ, ສຸມກຳລັງເຂົ້າໃນການຊຸກຍູ້ການພົວພັນຈີນລາວໃຫ້ຂະຫຍາຍຕົວກ້າວສູ່ລວງເລິກ. ທ່ານຈ່າງເຕີຈ່ຽງກ່າວວ່າ: ສອງສະພາຈີນລາວໄດ້ໄປມາຫາສູ່ກັນຢ່າງສະໜິດແໜ້ນ, ມີພື້ນຖານທີ່ດີດ້ານການແລກປ່ຽນແລະຮ່ວມມືກັນ. ສະພາປະຊາຊົນແຫ່ງຊາດຈີນຊຸດປະຈຸບັນໄດ້ສ້າງຕັ້ງໜ່ວຍງານມິດຕະພາບຈີນລາວ,ແລະຍິນດີຢູ່ບົນພື້ນຖານທີ່ມີຢູ່ໃນປະຈຸບັນ, ເພີ່ມທະວີແລະລົງເລິກການພົວພັນມິດຕະພາບລະຫວ່າງສອງສະພາຈີນລາວ, ສືບຕໍ່ຮັກສາການຕິດຕໍ່ພົວພັນຢ່າງໃກ້ຊິດລະຫວ່າງການນຳຂັ້ນສູງຂອງສອງສະພາ, ດຳເນີນການແລກປ່ຽນກັນລະຫວ່າງບັນດາກຳມາທິການ, ເພີ່ມທະວີການໄປມາຫາສູ່ກັນຢ່າງມີໄມຕີຈິດມິດຕະພາບລະຫວ່າງສະມາຊິກສະພາໂດຍສະເພາະສະມາຊິກສະພາທີ່ເປັນຊ່າວໜຸ່ມ, ຊຸກຍູ້ການຮ່ວມມືດ້ານການຝຶກອົບຮົມດ້ານບຸກຄະລາກອນໃຫ້ໄດ້ຮັບປະສິດທິຜົນທີ່ດີ. ພ້ອມດຽວກັນນັ້ນ, ຄວນເພີ່ມທະວີການແລກປ່ຽນແລະຮ່ວມມືກັນໃນດ້ານຕ່າງໆເປັນຕົ້ນແມ່ນການສ້າງກົດໝາຍ,ການຕິດຕາມກວດກາແລະອື່ນໆ, ເພື່ອເສີມຂະຫຍາຍບົດບາດສຳຄັນໃນການບັນລຸເປົ້າໝາຍການພັດທະນາປະເທດຂອງໃຜລາວ,ແລະຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນກັບລາວໃຫ້ຂະຫຍາຍຕົວກ້າວສູ່ລວງເລິກ.
ທ່ານນາງປານີຢ່າທໍ່ຕູ້ກ່າວວ່າ: ລາວທະນຸຖະໜອມມິດຕະພາບອັນເປັນມູນເຊື້ອລະຫວ່າງລາວຈີນທີ່ສຸດ, ຖືຈີນເປັນໝູ່ເພື່ອນທີ່ຈິງໃຈແລະຄູ່ຮ່ວມມືທີ່ໜ້າໄວ້ໃຈ, ພັກ, ສະພາແຫ່ງຊາດແລະລັດຖະບານລາວເອົາໃຈໃສ່ໃນລະດັບສູງຕໍ່ການຂະຫຍາຍການພົວພັນກັບຈີນ. ນາງກ່າວວ່າ: ການຢ້ຽມຢາມຈີນໃນຄັ້ງນີ້ມີຈຸດປະສົງເພື່ອເພີ່ມທະວີການພົວພັນມິດຕະພາບລະຫວ່າງສະພາແຫ່ງຊາດລາວກັບສະພາປະຊາຊົນແຫ່ງຊາດຈີນ, ຮັກສາທ່າອ່ຽງການແລກປ່ຽນຢ້ຽມຢາມເຊິ່ງກັນແລະກັນລະຫວ່າງການນຳຂັ້ນສູງ, ຊຸກຍູ້ການຮ່ວມມືທີ່ມີການປະຕິບັດຕົວຈິງ,ໂດຍສະເພາະແມ່ນການຮ່ວມມືໃນໂຄງການໃຫຍ່, ເພີ່ມທະວີການແລກປ່ຽນບົດຮຽນດ້ານການປົກຄອງປະເທດ, ຮັດແໜ້ນການປະສານງານແລະປະສານສົມທົບກັນໃນອົງການສະພາຫຼາຍຝ່າຍ, ປະກອບສ່ວນຫຼາຍກວ່າເກົ່າເຂົ້າໃນການຊຸກຍູ້ການພົວພັນລາວຈີນໃຫ້ຂະຫຍາຍຕົວກ້າວສູ່ລວງເລິກຢ່າງຮອບດ້ານ.
