ອັກຄີໄພທີ່ເກີດຂຶ້ນຢູ່ບໍລິສັດສັດປີກແຂວງຈີລິນຂອງຈີນໄດ້ເຮັດໃຫ້ເສຍຊີວິດແລ້ວ120ຄົນ
ວັນທີ 3 ມິຖຸນານີ້, ບໍລິສັດສັດປີກປາວຢວນເຟິ່ງນະຄອນເຕີຮຸ້ຍແຂວງຈີລິນຂອງຈີນໄດ້ເກີດອັກຄີໄພຄັ້ງຮ້າຍແຮງ. ນັບມາຮອດເວລາ20ໂມງຂອງມື້ດຽວກັນ, ອຸບັດຕິເຫດຄັ້ງນີ້ໄດ້ເຮັດໃຫ້ມີຜູ້ເສຍຊີວິດ120ຄົນ, ແລະອີກ70ຄົນໄດ້ຮັບບາດເຈັບ.
ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ,ປະທານປະເທດຈີນ, ປະທານຄະນະກຳມະການການທະຫານສູນກາງຈີນທີ່ກຳລັງຢ້ຽມຢາມຢູ່ຕ່າງປະເທດແລະທ່ານຫຼີເຄີ້ສຽງ ກຳມະການກົມການເມືອງສູນກາງພັກກອມມູນິດຈີນ, ນາຍົກລັດຖະມົນຕີຈີນຕ່າງໄດ້ມີຄຳສັ່ງແນະນຳໃຫ້ຖືການກູ້ເອົາຊີວິດຂອງຄົນເປັນໜ້າທີ່ສຳຄັນອັນດັບໜຶ່ງ, ຊຳລະວຽກງານທີ່ກ່ຽວຂ້ອງຕໍ່ຜູ້ເສຍຊີວິດໃຫ້ດີດ້ວຍຄວາມຈິງຈັງ;ຕ້ອງສືບສວນຫາສາເຫດທີ່ພາໃຫ້ເກີດອຸບັດຕິເຫດ, ສືບສວນແລະລົງໂທດຜູ້ກະທຳຜິດຕາມກົດໝາຍ, ໃຊ້ມາດຕະການທີ່ເໝາະສົມເພື່ອສະກັດກັ້ນບໍ່ໃຫ້ເກີດອຸບັດຕິເຫດຄ້າຍຄືກັນນີ້ອີກຢ່າງບັງເກີດຜົນ.
ມື້ດຽວກັນ, ທ່ານໂກວເສິ່ງຄຸນ ທີ່ປຶກສາແຫ່ງລັດ, ຮອງປະທານຄະນະກຳມະການຄວາມປອດໄພຂອງລັດຖະບານຈີນໄດ້ນຳພາຄະນະຮີບເດີນທາງໄປຊີ້ນຳການຊ່ວຍເຫຼືອກູ້ໄພຢູ່ສະຖານທີ່ເກີດເຫດ, ແລະປະກາດສ້າງຕັ້ງໜ່ວຍສືບສວນອຸບັດຕິເຫດຂອງລັດຖະບານຂຶ້ນຢູ່ສະຖານທີ່ເກີດເຫດ.
ສະຖານທີ່ເກີດອັກຄີໄພຂອງບໍລິສັດສັດປີກເຕີຮຸ້ຍແຂວງຈີລິນ
