ເຈົ້າໜ້າທີ່ຍີ່ປຸ່ນປະຕິເສດຄວາມຮັບຮູ້ທີ່ເປັນເອກະສັນກັນກ່ຽວກັບການໂຈະຄວາມຂັດແຍ່ງບັນຫາເກາະຕ້ຽວອີໄວ້ກ່ອນ
(GMT+08:00) 2013-06-05 10:32:47 cri
ກ່ຽວກັບເລື່ອງທີ່ທ່ານຊູກາ ໂຢຊິຮິເດ ເລຂາທິການລັດຖະບານຍີ່ປຸ່ນກ່າວໃນເມື່ອມໍ່ໆມານີ້ວ່າ: ຍີ່ປຸ່ນແລະຈີນບໍ່ເຄີຍມີຄວາມຮັບຮູ້ທີ່ເປັນເອກກະສັນກັນກ່ຽວກັບການໂຈະຄວາມຂັດແຍ່ງ ບັນຫາເກາະຕ້ຽວອີໄວ້ກ່ອນ, ວັນທີ 4 ມິຖຸນານີ້, ຢູ່ທີ່ນະຄອນຫຼວງປັກກິ່ງ, ທ່ານຫົງເຫຼີຍ ໂຄສົກກະຊວງການຕ່າງປະເທດຈີນໄດ້ກ່າວອີກເທື່ອໃໝ່ເຕືອນໃຫ້ລັດຖະບານຍີ່ປຸ່ນກ້າປະເຊີນກັບປະຫວັດສາດ,ແລະຮັບຮອງຄວາມຮັບຮູ້ທີ່ເປັນເອກະສັນກັນລະຫວ່າງຈີນກັບຍີ່ປຸ່ນກ່ຽວກັບການໂຈະຄວາມຂັດແຍ່ງບັນຫາເກາະຕ້ຽວອີໄວ້ກ່ອນ, ແລ້ວກັບຄືນສູ່ການເຈລະຈາແລະປຶກສາຫາລືກັນເພື່ອຄວບຄຸມແລະແກ້ໄຂບັນຫາເກາະຕ້ຽວອີ.ທ່ານຫົງເຫຼີຍກ່າວວ່າ:"ໃນເວລາທີ່ຈີນຍີ່ປຸ່ນດຳເນີນການເຈລະຈາກ່ຽວກັບການເຮັດໃຫ້ການພົວພັນທາງການທູດລະຫວ່າງສອງປະເທດຫັນເປັນປົກກະຕິແລະເຊັນສົນທິສັນຍາສັນຕິພາບຈີນ-ຍີ່ປຸ່ນ, ຜູ້ນຳລຸ້ນອາວຸໂສຂອງສອງປະເທດໄດ້ຖືສະພາບລວມແຫ່ງການພົວພັນລະຫວ່າງຈີນກັບຍີ່ປຸ່ນເປັນບັນຫາຕັດສິນ,ແລະໄດ້ບັນລຸຄວາມເຂົ້າໃຈກັນແລະຄວາມຮັບຮູ້ທີ່ເປັນເອກະສັນກັນ ກ່ຽວກັບການໂຈະບັນຫາຄວາມຂັດແຍ່ງເກາະຕ້ຽວອີໄວ້ກ່ອນ,ເພື່ອແກ້ໄຂໃນພາຍຫຼັງ, ນີ້ແມ່ນຄວາມເປັນຈິງຂອງປະຫວັດສາດ. ແຕ່ວ່າ, ການກະທຳຕ່າງໆຂອງຍີ່ປຸ່ນໃນປີໜຶ່ງທີ່ຜ່ານມາໄດ້ຝ່າຝືນແລະທຳລາຍຄວາມຮັບຮູ້ທີ່ເປັນເອກະສັນກັນແລະຄວາມເຂົ້າໃຈກັນໃນບັນຫາດັ່ງກ່າວ, ນີ້ແມ່ນສາເຫດຕົ້ນຕໍທີ່ເຮັດໃຫ້ສະຖານະການເກາະຕ້ຽວອີໃນປະຈຸບັນເຄັ່ງຕຶງຂຶ້ນ."
