ການພົບປະເຈລະຈາລະຫວ່າງລັດຖະມົນຕີກະຊວງປ້ອງກັນປະເທດຈີນ-ລາວ
ຕອນບ່າຍວັນທີ 2 ກໍລະກົດນີ້ ຢູ່ນະຄອນຫຼວງປັກກິ່ງ, ທ່ານສາງວ້ານສວນ, ທີ່ປຶກສາແຫ່ງລັດ ທັງເປັນລັດຖະມົນຕີວ່າການກະຊວງປ້ອງກັນປະເທດຈີນໄດ້ພົບປະເຈລະຈາກັບທ່ານດວງໃຈ ພິຈິດ, ຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງປ້ອງກັນປະເທດລາວ ທີ່ມາຢ້ຽມຢາມ, ສອງຝ່າຍໄດ້ແລກປ່ຽນຄວາມຄິດຄວາມເຫັນກ່ຽວກັບສະຖານະການຄວາມໝັ້ນຄົງຂອງພາກພື້ນ ແລະ ການພົວພັນລະຫວ່າງສອງປະເທດແລະສອງກອງທັບຈີນ-ລາວ.
ທ່ານສາງວ້ານສວນ ກ່າວວ່າ: ຈີນຖະໜຸຖະໜອມໄມຕີຈິດມິດຕະພາບລະຫວ່າງຈີນ-ລາວ, ຍິນດີຮ່ວມກັນກັບລາວທຳຄວາມພະຍາຍາມ, ເສີມສ້າງແລະຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດຢ່າງບໍ່ຢຸດຢັ້ງ, ຊຸກຍູ້ການແລກປ່ຽນແລະຮ່ວມມືລະຫວ່າງສອງກອງທັບໃຫ້ພັດທະນາໄປສູ່ລະດັບສູງກວ່າເກົ່າ. ເຊື່ອວ່າທ່ານດວງໃຈ ພິຈິດມາຢ້ຽມຢາມເທື່ອນີ້ ຈະເສີມຂະຫຍາຍບົດບາດອັນສຳຄັນໃນການເພີ່ມທະວີຄວາມເຂົ້າໃຈກັນ ແລະ ເປີດກວ້າງຄວາມຮັບຮູ້ທີ່ເປັນເອກະພາບກັນລະຫວ່າງສອງກອງທັບຈີນ-ລາວ.
ທ່ານດວງໃຈ ພິຈິດ ກ່າວວ່າ: ການພົວພັນລະຫວ່າງສອງກອງທັບລາວ-ຈີນ ໄດ້ຮັບການຂະຫຍາຍຕົວເປັນຢ່າງດີ, ໄດ້ຊຸກຍູ້ຢ່າງແຂງແຮງໃຫ້ພາລະກິດການສ້າງສາປະເທດແລະກອງທັບຂອງລາວໄດ້ມີການພັດທະນາກ້າວໄປໜ້າ. ລັດຖະບານແລະກອງທັບລາວຈະສືບຕໍ່ເດັດ ດ່ຽວປະຕິບັດນະໂຍບາຍໄມຕີຈິດມິດຕະພາບກັບຈີນ, ສຸມໃສ່ເພີ່ມທະວີການແລກປ່ຽນແລະຮ່ວມມືກັບຈີນຕື່ມອີກ.
