ຈີນແລະສວິສ໌ເຊັນສັນຍາການຄ້າເສລີຢ່າງເປັນທາງການ
(GMT+08:00) 2013-07-07 13:49:44 cri
ຕາມຂ່າວCRI, ວັນທີ6ກໍລະກົນນີ້, ຢູ່ນະຄອນຫຼວງປັກກິ່ງ, ທ່ານກາວຫູເສິງ ລັດຖະມົນຕີວ່າການກະຊວງການຄ້າຈີນ ແລະ ທ່ານໂຈຮັນ ສໄນເດີ ອຳມານ ທີ່ປຶກສາສະຫະພັນ ທັງເປັນລັດຖະມົນຕີວ່າການກະຊວງເສດຖະກິດສວິສ໌ ໄດ້ເຊັນສັນຍາການຄ້າເສລີຈີນ-ສວິສ໌ຢ່າງເປັນທາງການ. ນີ້ແມ່ນສັນຍາການຄ້າເສລີສະບັບທຳອິດທີ່ຈີນເຊັນກັນກັບປະເທດເອີລົບ. ວົງການຕ່າງໆຂອງສວິສ໌ໄດ້ຕີລາຄາຢ່າງຕັ້ງໜ້າຕໍ່ການສ້າງເຂດການຄ້າເສລີລະຫວ່າງປະເທດທັງສອງ.
ວັນທີ6ກໍລະກົດນີ້, ຂ່າວສານສວິສ໌ກ່າວວ່າ, ການເຊັນສັນຍາເຂດການຄ້າເສລີໝາຍຄວາມວ່າ, ວິສາຫະກິດສວິສ໌ຈະມີ "ທ່າແຮງດ້ານການແກ່ງແຍ່ງທີ່ປະຕິເສດບໍ່ໄດ້" ຢູ່ຕະຫຼາດຈີນ, ຈະອຳນວຍຄາມສະດວກໃຫ້ແກ່ຜະລິດຕະພັນສວິສ໌ເຂົ້າສູ່ຕະຫຼາດຈີນທີ່ໃຫຍ່ຫຼວງ. ອີກດ້ານໜຶ່ງ, ສັນຍາສະບັບນີ້ກໍຈະເປັນສິ່ງຮັບປະກັນດ້ານກົດໝາຍສຳລັບການແລກປ່ຽນທາງເສດຖະກິດແລະການຮ່ວມມືລະຫວ່າງສອງຝ່າຍ, ໃນຂະນະທີ່ລົງເລິກການຮ່ວມມືກັນ, ກໍເປັນການປະກອບສ່ວນເຂົ້າໃນການພັດທະນາແບບຍືນຍົງ.
ການເຊັນສັນຍາການຄ້າເສລີກໍເປັນຂ່າວດີສຳລັບບຸກຄົນວົງການເສດຖະກິດສວິສ໌. ມີນັກທຸລະກິດສວິສ໌ຫຼາຍທ່ານກ່າວວ່າ, ປະຈຸບັນ, ຈີນເປັນຄູ່ການຄ້າໃຫຍ່ທີ3ຂອງສວິສ໌ ເຊິ່ງຮອງຈາກສະຫະພາບເອີລົບແລະສະຫະລັດອາເມລິກາ, ບໍ່ຕ້ອງສົງໄສເລີຍວ່າ, ຕະຫຼາດແລະໂອກາດທຸລະກິດຂອງຈີນໄດ້ເປັນກຳລັງດຶງດູດນັກທຸລະກິດສວິສ໌ຢ່າງຫຼວງຫຼາຍ.