ທ່ານຢາງເຈສື້ພົບປະທ່ານນາງໄລສແລະທ່ານຮາເກີ
ວັນທີ12ກໍລະກົດນີ້, ຢູ່ວໍຊິງຕັນ ທ່ານຢາງເຈສື້,ຜູ້ຕາງໜ້າວິສາມັນຂອງທ່ານສີຈິ້ນພີງ,ປະທານປະເທດຈີນ,ທັງເປັນທີ່ປືກສາແຫ່ງລັດທີ່ໄປເຂົ້າຮ່ວມງານສົນທະນາຍຸດທະສາດແລະເສດຖະກິດຈີນອາເມລິກາຮອບທີ5ຢູ່ອາເມລິກາໄດ້ພົບປະທ່ານນາງຊຸຊັນ ໄລສ, ຜູ້ຊ່ວຍວຽກງານຄວາມປອດໄພແຫ່ງຊາດຂອງປະທານາທິບໍດີອາເມລິກາ ແລະທ່ານຊັກ ຮາເກີ, ລັດຖະມົນຕີວ່າການກະຊວງປ້ອງກັນປະເທດອາເມລິກາ.
ໃນເວລາພົບປະກັບທ່ານນາງໄລສ,ທ່ານຢາງເຈສື້ກ່າວວ່າ,ເມື່ອສອງຝ່າຍພ້ອມກັນພະຍາຍາມແລ້ວ,ງານສົນທະນາຍຸດທະສາດແລະເສດຖະກິດຈີນອາເມລິກາຮອບທີ5ໄດ້ຮັບຜົນສຳຄັນທີ່ຕັ້ງໜ້າ.ຫວັງວ່າສອງຝ່າຍຈະສືບຕໍ່ທຳຄວາມພະຍາຍາມ,ເພີ່ມທະວີການໄປມາຫາສູ່ກັນແລະການແລກປ່ຽນທາງຍຸດທະສາດລະຫວ່າງຂັ້ນສູງ,ເພີ່ມຄວາມໄວ້ເນື້ອເຊື່ອໃຈກັນ,ເປີດກວ້າງການຮ່ວມມືກັນ,ຊຳລະແກ້ໄຂຄວາມຂັດແຍ້ງກັນຢ່າງເໝາະສົມ,ຮັບປະກັນໃຫ້ການພົວພັນລະຫວ່າງຈີນກັບອາເມລິກາຂະຫຍາຍໄປໜ້າຕາມວົງໂຄຈອນທີ່ຖືກຕ້ອງຢ່າງບໍ່ຢຸດຢັ້ງ.
ທ່ານນາງໄລສກ່າວວ່າ,ທ່ານປະທານາທິບໍດີບາຣັກ ໂອບາມາແລະລັດຖະບານອາເມລິກາມີຄຳໝັ້ນສັນຍາທີ່ເດັດດ່ຽວໃນການຂະຫຍາຍການພົວພັນກັບຈີນ,ທັງອອກແຮງກັບຈີນທຳຄວາມພະຍາຍາມຮ່ວມກັນ,ໃຊ້ການເຄື່ອນໄຫວຕົວຈິງເພື່ອຊຸກຍູ້ການພົວພັນລະຫວ່າງປະເທດໃຫຍ່ແບບໃໝ່ໃຫ້ໄດ້ຮັບຜົນງານທີ່ລະອຽດຫຼາຍກວ່າເກົ່າ.
ໃນເວລາພົບປະກັບທ່ານຮາເກີ,ທ່ານຢາງເຈສື້ກ່າວວ່າ,ງານສົນທະນາຍຸດທະສາດແລະເສດຖະກິດຈີນອາເມລິກາຮອບທີ5ໄດ້ປຶກສາຫາລືກັນຢ່າງເລິກເຊິ່ງໂດຍປິ່ນອ້ອມການຈັດຕັ້ງປະຕິບັດຄວາມຮັບຮູ້ທີ່ຄືກັນຂອງປະມຸກລັດສອງປະເທດ,ໄດ້ຮັບຜົນງານອັນອຸດົມສົມບູນ,ຊື່ງກວມເອົາການເຫັນດີຕັ້ງໜ້າຄົ້ນຄວ້າແລະສ້າງຕັ້ງກົນໄກລາຍງານການເຄື່ອນໄຫວທີ່ສຳຄັນຂອງສອງກອງທັບໃຫ້ຊາບເຊິ່ງກັນແລະກັນ,ສືບຕໍ່ຄົ້ນຄວ້າບັນຫາຫຼັກຖານຂອງການເຄື່ອນໄຫວຄວາມປອດໄພທາງການທະຫານທາງທະເລແລະອາກາດຂອງຈີນແລະອາເມລິກາ.ຈີນຍິນດີກັບອາເມລິກາສືບຕໍ່ເພີ່ມທະວີການໄປມາຫາສູ່ກັນລະຫວ່າງສອງກອງທັບ,ເພີ່ມຄວາມໄວ້ເນື້ອເຊື່ອໃຈທາງຍຸດທະສາດເຊິ່ງກັນແລະກັນ,ຫຼີກລ້ຽງເກີດມີຄວາມເຂົ້າໃຈຜິດແລະການວິນິດໃສຜິດ.
ທ່ານຮາເກີກ່າວວ່າ,ອາເມລິກາຈະຕັ້ງໜ້າຈັດຕັ້ງປະຕິບັດຄວາມຮັບຮູ້ທີ່ຄືກັນຂອງປະມຸກລັດສອງປະເທດ,ບົນພື້ນຖານງານສົນທະນາທາງຍຸດທະສາດແລະເສດຖະກິດອາເມລິກາຈີນຄັ້ງນີ້, ລົງເລິກພັດທະນາການສົນທະນາ,ໄປມາຫາສູ່ກັນແລະຮ່ວມມືກັນກັບຈີນໃນຂົງເຂດການທະຫານຢ່າງບໍ່ຢຸດຢັ້ງ,ຊຸກຍູ້ຄວາມເຂົ້າໃຈແລະຄວາມໄວ້ເນື້ອເຊື່ອໃຈເຊິ່ງກັນແລະກັນໃຫ້ກ້າວສູ່ລວງເລິກ,ຊຸກຍູ້ການພົວພັນລະຫວ່າງກອງທັບສອງປະເທດໃຫ້ຂະຫຍາຍໄປໜ້າຢ່າງບໍ່ຢຸດຢັ້ງ.
