ສະຫຼອງວັນສ້າງຕັ້ງຄະນະສັນຕິພາບ ແລະ ສາມັກຄີຂອງລາວຄົບຮອບ 30 ປີ ແລະ ວັນສັນຕິພາບໂລກ
(GMT+08:00) 2013-07-23 18:17:13 cri
ໃນວັນທີ 23 ກໍລະກົດນີ້, ທີ່ສະມາຄົມນັກຂ່າວ ນະຄອນຫຼວງວຽງຈັນ, ຄະນະສັນຕິພາບ ແລະ ສາມັກຄີຂອງລາວ ໄດ້ຈັດພິທີຖະແຫຼງຂ່າວກ່ຽວກັບ " ການສະເຫຼີມສະຫຼອງວັນສ້າງຕັ້ງຄົບຮອບ 30 ປີ ແລະ ວັນສັນຕິພາບໂລກ " ຂື້ນ, ພາຍໃຕ້ການເປັນປະທານຂອງທ່ານ ຄຳພັນ ສິມມາລາວົງ ປະທານຄະນະສັນຕິພາບ ແລະ ສາມັກຄີຂອງລາວ, ມີທ່ານ ສົມສະນຸກ ມີໄຊ ປະທານສະມາຄົມນັກຂ່າວລາວ ພ້ອມດ້ວຍສື່ມວນຊົນທັງພາຍໃນແລະຕ່າງປະເທດເຂົ້າຮ່ວມຢ່າງພ້ອມພຽງ.
ໃນໂອກາດນີ້, ທ່ານ ຄຳພັນ ສິມມາລາວົງ ໄດ້ກ່າວປະຫວັດຄວາມເປັນມາ, ພາລະບົດບາດ ແລະ ການເຄື່ອນໄຫວຜ່ານມາຂອງ ຄະນະສັນຕິພາບ ແລະ ສາມັກຄີຂອງລາວ ແລະ ວັນສາກົນເພື່ອສັນຕິພາບ 21 ກັນຍານີ້. ທ່ານກ່າວວ່າ: ເພືອປູກຈິດສຳນຶກໃຫ້ຊາວໜຸ່ມ, ນັກຮຽນ, ນັກສຶກສາ, ພະນັກງານທຸກພາກສ່ວນ ຕະຫຼອດຮອດປະຊາຊົນບັນດາເຜົ່າ ໄດ້ຮັບຮູ້, ເຂົ້າໃຈ ແລະ ເຫັນໄດ້ເຖິງຄວາມສຳຄັນເຖິງວຽກງານສັນຕິພາບ ເຊິ່ງຍາມໃດກໍ່ຕິດພັນກັບການພັດທະນາ ທັງເປັນການປຸກລະດົມໃຫ້ມີສ່ວນຮ່ວມໃນການເສີມສ້າງສັນຕິພາບໃນພາກພື້ນ ແລະ ໃນໂລກ. ເພື່ອເປັນການພັດທະນາເນື້ອໃນຈິດໃຈຂອງອົງການສະຫະປະຊາຊາດ ທີ່ໄດ້ປະກາດວັນທີ 21 ກັນຍາທຸກປີ ເປັນ " ວັນສາກົນເພື່ອສັນຕິພາບ " ທັງທີ່ຮຽກຮ້ອງໃຫ້ບັນດາປະເທດສະມາຊິກ ແລະ ອົງການຈັດຕັ້ງທາງສັງຄົມໃຫ້ເຜີຍແຜ່ວຽກງານສັນຕະພາບ ໂດຍຜ່ານທາງດ້ານການສຶກສາ ເພື່ອສຶກສາອົບຮົມ ແລະ ເຜີຍແຜ່ຄວາມຮູ້ໃນສາທາລະນະຊົນ ແລະ ຖືເອົາວັນດັ່ງກ່າວເປັນວັນຢຸດຕິການສູ້ຮົບໃນໂລກ, ປຸກລະດົມໃຫ້ຢຸດຕິການໃຊ້ຄວາມຮຸນແຮງ ແລະ ແກ້ໄຂຂໍ້ຂັດແຍ່ງດ້ວຍສັນຕິວິທີໂດຍການເຈລະຈາ.
ນອກຈາກນີ້, ທາງຄະນະສັນຕິພາບ ແລະ ສາມັກຄີຂອງລາວ ຍັງຈະໄດ້ຈັດກິດຈະກຳ " ຍ່າງເພື່ອສຸກຂະພາບ " ຢູ່ສວນປະຕູໄຊ ໃນວັນທີ 27 ກໍລະກົດນີ້. ເພື່ອສ້າງຂະບວນການຟົດຟື້ນ ແລະ ໃຫ້ມີຄວາມໝາຍເນື່ອງໃນວັນດັ່ງກ່າວອີກດ້ວຍ.
