ປະທານາທິບໍດີມຽນມາຕ້ອນຮັບການເຂົ້າຢ້ຽມຂ່ຳນັບຂອງຮອງປະທານຄະນະກຳມະການການທະຫານສູນກາງຈີນ
ວັນທີ 23 ກໍລະກົດນີ້,ຢູ່ນະຄອນຫຼວງເນປີດໍຂອງມຽນມາ, ທ່ານເທັນເຊັນ ປະທານາທິບໍດີມຽນມາໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານຟ້ານສາງລົງ ຮອງປະທານຄະນະກຳມະການການທະຫານສູນກາງຈີນທີ່ເດີນທາງໄປຢ້ຽມຢາມມຽນມາ.
ທ່ານຟ້ານສາງລົງໄດ້ນຳເອົາຄວາມຢື້ຢາມຖາມຂ່າວທີ່ສະໜິດສະໜົມແລະຄວາມອວຍພອນອັນປະເສີດຂອງທ່ານສີຈີ້ນຜິງ ປະທານປະເທດຈີນທີ່ຝາກໄປຍັງທ່ານປະທານາທິບໍດີເທັນເຊັນ. ທ່ານເທັນເຊັນໄດ້ສະແດງຄວາມຂອບໃຈຢ່າງຈິງໃຈແລະໄດ້ຂໍຜ່ານທ່ານຟ້ານສາງລົງຝາກຄວາມຢື້ຢາມຖາມຂ່າວຢ່າງຈິງໃຈແລະພອນໄຊອັນປະເສີດຂອງທ່ານໄປຍັງທ່ານປະທານສີຈິ້ນຜິງເຊັ່ນກັນ.
ທ່ານເທັນເຊັນກ່າວວ່າ, ທ່ານຮອງປະທານຟ້ານສາງລົງພາຍຫຼັງຂຶ້ນດຳລົງຕຳແໜ່ງແລ້ວໄດ້ເລືອກເອົາມຽນມາເປັນປະເທດທຳອິດໃນການຢ້ຽມຢາມຕ່າງປະເທດຂອງທ່ານ, ຊຶ່ງໄດ້ສະແດງໃຫ້ເຫັນເຖິງການພົວພັນແບບໄມຕີຈິດມິດຕະພາບລະຫວ່າງສອງລັດສອງກອງທັບມຽນມາຈີນ. ມຽນມາແລະຈີນເພີ່ມທະວີຄວາມສາມັກຄີແລະການຮ່ວມມືກັນສອດຄ່ອງກັບຜົນປະໂຫຍດພື້ນຖານຂອງປະຊາຊົນສອງຊາດ, ແລະມີຜົນດີຕໍ່ການພັດທະນາແລະສະຖຽນລະພາບຂອງປະເທດຕົນແລະພາກພື້ນແຫ່ງນີ້.
ທ່ານຟ້ານສາງລົງກ່າວວ່າ, ຈີນແລະມຽນມາເປັນເພື່ອນມິດທີ່ດີ, ບ້ານໃກ້ເຮືອນຄຽງທີ່ດີແລະຄູ່ຮ່ວມມືທີ່ດີຢ່າງແທ້ຈິງ. ຫຼາຍປີມານີ້, ການນຳຂັ້ນສູງຂອງສອງຝ່າຍຈີນແລະມຽນມາໄດ້ແລກປ່ຽນຢ້ຽມຢາມເຊິ່ງກັນແລະກັນເລື້ອຍໆ, ການຮ່ວມມືໃນຂົງເຂດຕ່າງໆເປັນຕົ້ນແມ່ນການເມືອງ, ເສດຖະກິດການຄ້າ,ວັດທະນະທຳໄດ້ຮັບຄວາມຄືບໜ້າທີ່ສຳຄັນ. ຈີນຍິນດີຮ່ວມກັບມຽນມາຮ່ວມມືກັນເພື່ອຊຸກຍູ້ໃຫ້ການພົວພັນລະຫວ່າງສອງປະເທດແລະສອງກອງທັບໄດ້ມີການພັດທະນາຫຼາຍຂຶ້ນກວ່າເກົ່າ.
ມື້ດຽວກັນ, ທ່ານຟ້ານສາງລົງໄດ້ພົບປະກັບທ່ານສະວີມານ ປະທານສະພາປະຊາຊົນຂອງລັດຖະສະພາມຽນມາ,ນອກຈາກນັ້ນ,ທ່ານຟ້ານສາງລົງຍັງໄດ້ພົບປະເຈລະຈາກັບທ່ານພົນເອກພິເສມິນອ໋ອງໄລ ຜູ້ບັນຊາການສູງສຸດກອງປ້ອງກັນປະເທດມຽນມາ, ໂດຍທັງສອງຝ່າຍໄດ້ລົງເລິກແລກປ່ຽນຄວາມເຫັນຢ່າງກົງໄປກົງມາກ່ຽວກັບການພົວພັນລະຫວ່າງສອງປະເທດແລະສອງກອງທັບ.
