ນາຍົກລັດຖະມົນຕີໄທຕ້ອນຮັບການເຂົ້າຢ້ຽມຂ່ຳນັບຂອງຮອງປະທານຄະນະກຳມະການການທະຫານສູນກາງຈີນ
ຕອນບ່າຍວັນທີ 24 ກໍລະກົດນີ້ ຢູ່ທຳນຽບລັດຖະບານໄທ, ທ່ານນາງຍິ່ງລັກ ຊິນນະວັດ ນາຍົກລັດຖະມົນຕີທັງເປັນລັດຖະມົນຕີວ່າການກະຊວງປ້ອງກັນປະເທດໄທໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານຟ້ານສາງລົງ ຮອງປະທານຄະນະກຳມະການການທະຫານສູນກາງຈີນທີ່ເດີນທາງໄປຢ້ຽມຢາມໄທ.
ທ່ານນາງຍິ່ງລັກກ່າວວ່າ, ໄທແລະຈີນແມ່ນປະເທດບ້ານໃກ້ເຮືອນຄຽງທີ່ມີໄມຕີຈິດມິດຕະພາບອັນສະໜິດສະໜົມ. ຫຼາຍປີຜ່ານມານີ້, ສອງປະເທດໄດ້ສ້າງຕັ້ງການພົວພັນມິດຕະພາບແລະການຮ່ວມມືແບບຍາດຕິພີ່ນ້ອງ. ໃນຊຸມປີມໍ່ໆມານີ້, ການນຳຂັ້ນສູງຂອງສອງລັດແລະສອງກອງທັບໄດ້ແລກປ່ຽນຢ້ຽມຢາມຊຶ່ງກັນແລະກັນເປັນປະຈຳ, ການແລກປ່ຽນກັນຢ່າງມີໄມຕີຈິດມິດຕະພາບລະຫວ່າງສອງຝ່າຍໄດ້ມີຂຶ້ນຢ່າງບໍ່ຢຸດຢັ້ງ, ການຮ່ວມມືໃນຂົງເຂດຕ່າງໆໄດ້ຮັບໝາກຜົນອັນອຸດົມສົມບູນ.
ທ່ານຟ້ານສາງລົງກ່າວວ່າ, ຈີນແລະໄທມີຄວາມໃກ້ຄຽງກັນດ້ານພູມສາດ,ວັດທະນະທຳຄ້າຍໆກັນແລະມີສາຍພົວພັນແບບອ້າຍນ້ອງກັນ, ການພົວພັນລະຫວ່າງສອງປະເທດຈີນໄທສົມເປັນແບບຢ່າງທີ່ດີແຫ່ງການຮ່ວມມືຢ່າງມີໄມຕີຈິດມິດຕະພາບຖານບ້ານໃກ້ເຮືອນຄຽງ. ໃນຊຸມປີມໍ່ໆມານີ້,ການພົວພັນລະຫວ່າງສອງປະເທດໄດ້ຂະຫຍາຍຕົວກ້າວໄປທາງໜ້າຢ່າງໜັກແໜ້ນ, ການແລກປ່ຽນແລະຮ່ວມມືໃນຂົງເຂດຕ່າງໆໄດ້ກ້າວສູ່ລວງເລິກຢ່າງບໍ່ຢຸດຢັ້ງ, ການຮ່ວມມືລະຫວ່າງສອງກອງທັບມີຂົງເຂດກວ້າງຂວາງແລະໄດ້ຮັບຜົນສຳເລັດຢ່າງພົ້ນເດັ່ນ. ຈີນຍິນດີຮ່ວມກັບໄທປັບປຸງການພົວພັນມິດຕະພາບແລະການຮ່ວມມືລະຫວ່າງສອງລັດແລະສອງກອງທັບໃຫ້ຂະຫຍາຍຕົວຢ່າງບໍ່ຢຸດຢັ້ງ,ແລະຊຸກຍູ້ໃຫ້ພາກພື້ນແຫ່ງນີ້ມີຄວາມຈະເລີນຮຸ່ງເຮືອງແລະມີສະຖຽນລະພາບດີ.
