ສິ່ງກີດຂວາງດ້ານເຕັກນິກຕໍ່ການຄ້າຂອງຕ່າງປະເທດເຮັດໃຫ້ການສົ່ງອອກສິນຄ້າຂອງຈີນໃນປີກາຍນີ້ເສຍຫາຍໂດຍກົງເຖິງ68ຕື້500ລ້ານໂດລາ
ວັນທີ 29 ກໍລະກົດນີ້, ກົມໃຫຍ່ຕິດຕາມກວດກາຄຸນນະພາບແລະກວດພະຍາດແຫ່ງຊາດຈີນເຜີຍໃຫ້ຮູ້ວ່າ, ປີ2012ຜ່ານມາ, ວິສາຫະກິດສົ່ງອອກສິນຄ້າຂອງຈີນມີ 23,9%ໄດ້ຮັບຜົນສະທ້ອນຈຳນວນໜຶ່ງຈາກສິ່ງກີດຂວາງດ້ານເຕັກນິກຕໍ່ການຄ້າຫຼືTBT ຂອງຕ່າງປະເທດ, ຊຶ່ງໄດ້ສ້າງຄວາມເສຍຫາຍໂດຍກົງໃຫ້ການຄ້າສົ່ງອອກຂອງຈີນໃນໝົດປີ2012ຜ່ານມານີ້ເຖິງ68ຕື້500ລ້ານໂດລາ,ຊຶ່ງເພີ່ມຂຶ້ນ10%ເມື່ອທຽບໃສ່ປີ2011.
ກົມໃຫຍ່ຕິດຕາມກວດກາຄຸນນະພາບແລະກວດພະຍາດແຫ່ງຊາດຈີນໄດ້ດຳເນີນການສຳຫຼວດພາຍໃນຂອບເຂດທົ່ວປະເທດກ່ຽວກັບຜົນສະທ້ອນຂອງສິ່ງກີດຂວາງດ້ານເຕັກນິກຕໍ່ການຄ້າຂອງຕ່າງປະເທດທີ່ມີຕໍ່ວິສາຫະກິດສົ່ງອອກສິນຄ້າຂອງຈີນໃນປີ2012. ຕາມຜົນການສຳຫຼວດ, ປະເທດແລະເຂດແຄວ້ນທີ່ສົ່ງຜົນສະທ້ອນຫຼາຍທີ່ສຸດຕໍ່ວິສາຫະກິດສົ່ງອອກສິນຄ້າຂອງຈີນຕາມລຳດັບທີ1ຫາລຳດັບທີ5ແມ່ນສະຫະພາບເອີຣົບ, ອາເມລິກາ,ອົສຕຼາລີແລະນູແວນເຊລັງ, ອາເມລິກາລາຕີນ, ອາຊຽນ.
ສິ່ງກີດຂວາງດ້ານເຕັກນິກຕໍ່ການຄ້າຫຼືTBT ຖືກເຫັນວ່າເປັນອຸປະສັກຕົ້ນຕໍທີ່ວິສາຫະກິດໄດ້ປະສົບໃນເວລາສົ່ງອອກສິນຄ້າຊຶ່ງຮອງຈາກອັດຕາແລກປ່ຽນເງິນຕາ. ກົມໃຫຍ່ຕິດຕາມກວດກາຄຸນນະພາບແລະກວດພະຍາດແຫ່ງຊາດຈີນກ່າວວ່າ,ຈະໃຊ້ມາດຕະການເພື່ອຍົກສູງຄວາມສາມາດຂອງວິສາຫະກິດສົ່ງອອກສິນຄ້າຂອງຈີນໃນການຮັບມືກັບສິ່ງກີດຂວາງດ້ານເຕັກນິກຕໍ່ການຄ້າຂອງຕ່າງປະເທດ.
