ທ່ານສີຈີ້ນຜິງໄດ້ພົບປະກັບຄະນະແລະບຸກຄົນດີເດັ່ນຂອງຈີນໃນການຊ່ວຍເຫຼືອຕ່າງປະເທດດ້ານສາທາລະນະສຸກ
ຕອນເຊົ້າວັນທີ16ສິງຫານນີ້,ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ, ທ່ານສີຈີ້ນຜິງ,ເລຂາທິການໃຫຍ່ສູນກາງພັກກອມມູນິດຈີນ,ປະທານປະເທດ,ປະທານຄະນະກໍາມະການການທະຫານສູນກາງຈີນໄດ້ພົບປະກັບຄະນະແລະບຸກຄົນດີເດັ່ນໃນວຽກງານຊ່ວຍເຫລືອຕ່າງປະເທດດ້ານສາທາລະນະສຸກ,ທ່ານສີຈີ້ນຜິງໄດ້ຕາງໜ້າສູນກາງພັກກອມມູນິດຈີນແລະລັດຖະບານຈີນສະແດງຄວາມຊົມເຊີຍຢ່າງສຸດອົກສຸດໃຈຕໍ່ເຂົາເຈົ້າ, ທັງໄດ້ສະແດງຄວາມຢື້ຢາມຖາມຂ່າວຢ່າງຈິງໃຈຕໍ່ສະຫາຍທີ່ເຄີຍແລະກໍາລັງປະຕິບັດໜ້າທີ່ຊ່ວຍເຫລືອດ້ານສາທາລະນະສຸກຢູ່ຕ່າງປະເທດ.
ທ່ານສີຈີ້ນຜິງຊີ້ອອກວ່າ,ໃນເວລາຜ່ານມາ,ສະມາຊິກຂອງໜ່ວຍງານຊ່ວຍເຫຼືອຕ່າງປະເທດດ້ານສາທາລະນະສຸກໄດ້ອໍານວຍການບໍລິການໃຫ້ແກ່ປະຊາຊົນຂອງປະເທດທີ່ໄດ້ຮັບການຊ່ວຍເຫລືອຢ່າງສຸດອົກສຸດໃຈດ້ວຍເຕັກນິກປິ່ນປົວອັນດີເດັ່ນແລະຈັນຍາບັນທາງການແພດອັນສູງສົ່ງ ເຊິ່ງໄດ້ຊຸກຍູ້ການພັດທະນາ ວຽກງານສາທາລະນະສຸກຂອງປະເທດທີ່ໄດ້ຮັບການຊ່ວຍເຫລືອແລະຍົກສູງລະດັບສຸຂະພາບຂອງປະຊາຊົນຂອງປະເທດເຫຼົ່ານັ້ນ.
ທ່ານສີຈີ້ນຜິງກ່າວເນັ້ນວ່າ,ວຽກງານຊ່ວຍເຫລືອຕ່າງປະເທດທາງດ້ານສາທາລະນະສຸກເປັນເນື້ອໃນ ສໍາຄັນຂອງວຽກງານການຕ່າງປະເທດຂອງຈີນ.ອົງການແລະທ້ອງຖິ່ນທີ່ກ່ຽວຂ້ອງຕ້ອງເພີ່ມທະວີການນໍາພາແລະການຈັດຕັ້ງປະຕິບັດ,ປັບປຸງນະໂຍບາຍທີ່ກ່ຽວຂ້ອງ,ແກ້ໄຂຄວາມຫຍຸ້ງຍາກແລະບັນຫາໃນວຽກງານຊ່ວຍເຫລືອຕ່າງປະເທດດ້ານສາທາລະນະສຸກຢ່າງແທ້ຈິງ,ສ້າງສະຖານະການໃໝ່ຂອງວຽກງານຊ່ວຍເຫລືອຕ່າງປະເທດທາງດ້ານສາທາລະນະສຸກ.
