ຄະນະຜູ້ແທນລາວເຫັນວ່າ ການສະສົມແລະແລກປ່ຽນບົດຮຽນສຳຄັນກວ່າຫຼຽນ
ນັກຂ່າວCRIຖ່າຍຮູບຮ່ວມກັບຄູຝຶກແລະນັກກິລາລາວທີ່ມາເຂົ້າຮ່ວມງານມະຫາກຳກິລາຊາວໜຸ່ມອາຊີຄັ້ງທີສອງຢູ່ຈີນ
ງານມະຫາກຳກິລາຊາວໜຸ່ມອາຊີຄັ້ງທີ 2 ທີ່ກຳລັງຈັດຂຶ້ນຢູ່ນະຄອນນານກິ່ງຂອງຈີນ,ມາຮອດວັນທີ 20ສິງຫານີ້ ລາຍການແຂ່ງຂັນໄດ້ກາຍເຄິ່ງແລ້ວ, ເຖິງວ່ານັກກິລາລາວມີຄວາມຫວັງໜ້ອຍທີ່ຈະຍາດເອົາຫຼຽນໄດ້ກໍຕາມ, ແຕ່ບໍ່ວ່າຄູຝຶກຫຼືນັກກິລາລ້ວນແຕ່ໄດ້ສະແດງໃຫ້ເຫັນຈິດໃຈທີ່ເບິ່ງໂລກໄປໃນທາງທີ່ດີ.
ໃນເວລາໃຫ້ສຳພາດຕໍ່ນັກຂ່າວວິທະຍຸສາກົນແຫ່ງປະເທດຈີນຫຼືCRI, ທ່ານຈະເລີນສຸກ ອ່າວອຸດົມພັນ ຄູຝຶກທິມກິລາແລ່ນແລະລານຂອງລາວກ່າວວ່າ:
"ໃນການແຂ່ງຂັນເທື່ອນີ້, ຄວາມຫວັງພວກເຮົາກໍ່ມີແຕ່ຢາກໃຫ້ນັກກິລາຂອງເຮົາມີສະຖິຕິທີ່ດີຂຶ້ນ,ແຕ່ວ່າ,ຄວາມຫວັງທີ່ຈະໄປຍາດເອົາຫຼຽນຫຼືທີ່ ເຮົາເບິ່ງຄວາມສາມາດຂອງທີມຕົນເອງກໍ່ຍັງຫ່າງຢູ່ພວມເປັນລະດັບໃຫຍ່ ເປັນລະດັບຂອງອາຊີ,ເດັກນ້ອຍຂອງເຮົາເອງກໍ່ຍັງຫາກໍ່ເຂົ້າມາໃນວົງການແລ່ນປະມານປີກວ່າ,ສອງປີ, ປະສົບການຍັງໜ້ອຍຢູ່,ແຕ່ເຮົາກໍ່ໄດ້ຊຸກຍູ້ເຂົາມາເຂົ້າຮ່ວມ,ເພື່ອເອົາປະສົບການ."
ທ່ານພັດທະນາ ອິນທະວົງ ນັກກິລາລອຍນ້ຳທີ່ອາຍຸ 18 ປີ ບອກນັກຂ່າວວ່າ:"ການແຂ່ງຂັນເທື່ອນີ້ກໍ່ ເປັນການແຂ່ງເອົາປະສົບການ,ຢ່າງໜຶ່ງກໍ່ຫວັງຊິທຳລາຍສະຖິຕິຂອງປະເທດລາວ, ເບິ່ງຄູ່ແຂ່ງເຂົາເຈົ້າກໍ່ເກັ່ງກວ່າ,ກໍ່ຝຶກຊ້ອມໃຫ້ທັນເຂົາເຈົ້າ,ລອຍດີຊ່ຳເຂົາເຈົ້າໃນອະນາຄົດ,ຢາກໃຫ້ມີການແລກປ່ຽນແບບມີການຝຶກຊ້ອມລະຫວ່າງປະເທດ."
ລາວໄດ້ສົ່ງນັກກິລາລວມທັງໝົດ 9 ຄົນມາເຂົ້າຮ່ວມງານມະຫາກຳກິລາຊາວໜຸ່ມອາຊີໃນຄັ້ງນີ້ຊຶ່ງຈະເຂົ້າຮ່ວມການແຂ່ງຂັນ 5 ປະເພດຄື ກິລາແລ່ນແລະລານ, ລອຍນ້ຳ, ຢູໂດ,ເທັນນິສ ແລະປິ່ງປ໋ອງ.
