ທ່ານທູດລາວປະຈຳຈີນຄອງຄອຍຕໍ່ງານວາງສະແດງສິນຄ້າຈີນ-ອາຊຽນຄັ້ງທີ10ທີ່ຈະໄຂຂຶ້ນໃນໄວໆນີ້
ວັນທີ 20 ສິງຫານີ້,ທ່ານສົມດີບຸນຄຸ້ມໃຫ້ສຳພາດຕໍ່ນັກຂ່າວCRI
ຕອນຄ່ຳວັນທີ 20 ສິງຫານີ້, ໃນໂອກາດທີ່ເຂົ້າຮ່ວມກິດຈະກຳ "ງານລາຕີກຳປູເຈຍ"ຢູ່ສູນຈີນ-ອາຊຽນທີ່ນະຄອນຫຼວງປັກກິ່ງ, ທ່ານສົມດີ ບຸນຄຸ້ມ ເອກອັກຄະລັດຖະທູດແຫ່ງສປປລາວປະຈຳຈີນໄດ້ໃຫ້ສຳພາດຕໍ່ນັກຂ່າວວິທະຍຸສາກົນແຫ່ງປະເທດຈີນຫຼືCRIວ່າ, ຜູ້ນຳປະເທດຈີນແລະອາຊຽນແລະນັກທຸລະກິດນັບມື້ນັບຫຼາຍໄດ້ຕັ້ງໜ້າເຂົ້າຮ່ວມງານວາງສະແດງສິນຄ້າຈີນ-ອາຊຽນ, ງານວາງສະແດງສິນຄ້າຈີນ-ອາຊຽນໄດ້ເສີມຂະຫຍາຍບົດບາດນັບມື້ນັບສຳຄັນກວ່າເກົ່າໃນການຊຸກຍູ້ຄວາມເຂົ້າໃຈກັນແລະການຮ່ວມມືດ້ານເສດຖະກິດການຄ້າລະຫວ່າງຈີນກັບບັນດາປະເທດອາຊຽນ, ເມື່ອທຽບກັບງານວາງສະແດງສິນຄ້າຈີນ-ອາຊຽນໃນທຸກຄັ້ງທີ່ຜ່ານມາ, ງານວາງສະແດງປີນີ້ຈະມີບັນຍາກາດທີ່ດີທີ່ສຸດ,ຂ້າພະເຈົ້າມີຄວາມຄອງຄອຍຢ່າງເຕັມປ່ຽມຕໍ່ງານຄັ້ງນີ້.ທ່ານກ່າວວ່າ:
ຮອດປັດຈຸບັນນີ້ແມ່ນປີຂອງການເປັນຄູ່ຮ່ວມມືຍຸດທະສາດລະຫວ່າງຈີນ-ອາຊຽນແລະງານວາງສະແດງທີ່ພວກເຮົາຈັດໃນທຸກໆປີ,ປີນີ້ເປັນປີໜຶ່ງທີ່ວ່າຄົບຮອບສິບປີ.ຂ້າພະເຈົ້າຄຶດວ່າປີນີ້ກໍຈະເປັນປີໜຶ່ງທີ່ມີບັນຍາກາດດີທີ່ສຸດແລະຂ້າພະເຈົ້າຄຶດວ່າດັ່ງໄດ້ຮູ້ຂໍ້ມູນຄືມີຫລາຍປະເທດແລະຜູ້ນໍາຂັ້ນສູງຂອງປະເທດຕ່າງໆໃນອາຊຽນກໍຄືຜູ້ນໍາຂອງຈີນກໍຈະເຂົ້າຮ່ວມແລະຫລາຍໆບໍລິສັດກໍຈະເຂົ້າຮ່ວມ,ຈະເປັນໂອກາດດີທີ່ສຸດໃຫ້ແກ່ພວກເຮົາໃນການທີ່ວ່າຈັດການວາງສະແດງຜົນສໍາເລັດຂອງການສ້າງສາປະເທດຂອງຕົນເອງ,ໂດຍສະເພາະການຮ່ວມມືນໍາກັນທາງດ້ານເສດຖະກິດ,ທີ່ວ່າແຕ່ລະປີພວກເຮົາກໍໄດ້ຈັດຂຶ້ນແລະຈະເຫັນໄດ້ວ່າແຕ່ລະປີການເຂົ້າຮ່ວມຂອງບໍລິສັດຕ່າງໆຂອງປະເທດຕ່າງໆອາຊຽນ10ປະເທດລວມທັງຈີນ11ປະເທດກໍໄດ້ປະກອບສ່ວນ,ມີລັກສະນະຈໍານວນເພີ່ມຂຶ້ນ,ໂດຍສະເພາະລາວ,ແຕ່ລະປີຈໍານວນບໍລິສັດຕ່າງໆມີຄວາມສົນໃຈຫລາຍໆໃນການນໍາຜົນຜະລິດຕົນເອງມາວາງສະແດງເຊິ່ງເຫັນໄດ້ຜົນວ່າການວາງສະແດງດັ່ງກ່າວເປັນຈຸດລວບອັນໜຶ່ງໃນການສົ່ງເສີມບໍ່ແມ່ນວ່າພຽງແຕ່ຄວາມເຂົ້າໃຈກັນ,ທັງສົ່ງເສີມການດໍາເນີນທຸລະກິດຮ່ວມກັນເຊິ່ງວ່າເຫັນໄດ້ຜົນວ່າແຕ່ລະປີນັ້ນ,ມີຫລາຍບໍລິສັດເຂົ້າຮ່ວມ.ຫລັງຈາກວາງສະແດງມີການເຊັນສັນຍາຫລາຍສະບັບນໍາກັນແຕ່ລະປີເພີ່ມຂຶ້ນໃນການທີ່ຈະວ່າສືບຕໍ່ພົວພັນແລະສົ່ງເສີມການລົງທຶນ,ການຄ້າຂາຍນໍາກັນ ເຊິ່ງເຮັດໃຫ້ຕົວເລກຂອງແຕ່ລະປີໂດຍສະເພາະຂອງລາວເຮົາພົວພັນການຄ້ານັບມື້ນັບເພີ່ມຂຶ້ນ,ເຊັ່ນວ່າປີ2012ທີ່ຜ່ານມາຖືວ່າເປັນຈໍານວນຫລວງຫລາຍ,ປະມານ1ຕື້ໂດລາ,ເປັນຕົວເລກທີ່ວ່າບໍ່ແມ່ນໜ້ອຍ,ແຕ່ຂ້າພະເຈົ້າຄຶດວ່າການວາງສະແດງດັ່ງກ່າວກໍມີສ່ວນໃນການສົ່ງເສີມການລົງທຶນພາຍໃນອາຊຽນກໍຄືການລົງທຶນຂອງນັກທຸລະກິດຈີນທີ່ໄປລົງທຶນຢູ່ບັນດາປະເທດ,ເຮັດໃຫ້ໂຄງການລົງທຶນຂອງລາວແຕ່ລະປີເພີ່ມຂຶ້ນ ແລະໂຄງການດັ່ງກ່າວກໍເປັນພື້ນຖານໃຫ້ແກ່ການພັດທະນາໂຄງລ່າງແລະເປັນການກະຕຸກຊຸກຍູ້ໃນການດໍາເນີນທຸລະກິດ.ຂ້າພະເຈົ້າຄຶດວ່າງານດັ່ງກ່າວຈະເຮັດບົດບາດທີ່ສໍາຄັນທີ່ສຸດໃນແຕ່ລະປີ,ພວກເຮົາແຕ່ລະປີໄດ້ຍິນບໍລິສັດໄດ້ກຽມພ້ອມທີ່ວ່າຜະລິດສິນຄ້າຈະເອົາມາວາງສະແດງ.ຂ້າພະເຈົ້າຄິດວ່າແຕ່ລະປີງານວາງສະແດງກໍຈະເປັນການປະກອບສ່ວນໃນການກະຕຸກຊຸກຍູ້ໃນການຫາຕະຫລາດໃຫ້ແກ່ນັກທຸລະກິດແລະພາກສ່ວນທີ່ລົງທຶນຕ່າງໆຢູ່ລາວ.
