ການຮ່ວມມືຂອງອະນຸພາກພື້ນແມ່ນ້ຳຂອງໄດ້ມີຄວາມຄືບໜ້າ
(GMT+08:00) 2013-08-23 11:12:39 cri
ວັນທີ 22 ສິງຫານີ້, ສູນຄົ້ນຄວ້າອະນຸພາກພື້ນແມ່ນ້ຳຂອງມະຫາວິທະຍາໄລຢຸນນານຈີນແລະສຳນັກພິມຈຳໜ່າຍຂໍ້ມູນເອກະສານວິທະຍາສາດສັງຄົມຈີນໄດ້ຮ່ວມກັນເຜີຍແຜ່ປຶ້ມປົກສີຟ້າ "ອະນຸພາກພື້ນແມ່ນ້ຳຂອງ2013"ໂດຍຊີ້ອອກວ່າ, ການຮ່ວມມືດ້ານເສດຖະກິດຂອງອະນຸພາກພື້ນແມ່ນ້ຳຂອງໄດ້ກາຍເປັນຕົວແບບທີ່ສຳເລັດຜົນຂອງການຮ່ວມມືດ້ານເສດຖະກິດອາຊີແລະການຮ່ວມມືໃຕ້ໆ.
ປຶ້ມປົກສີຟ້າລະບຸວ່າ, ໃນໄລຍະ 20 ປີນັບແຕ່ເລີ່ມມີການຮ່ວມມືດ້ານເສດຖະກິດຂອງອະນຸພາກພື້ນແມ່ນ້ຳຂອງເມື່ອປີ1992ເປັນຕົ້ນມາ, ການຮ່ວມມືໃນອະນຸພາກພື້ນໄດ້ກ້າວສູ່ລວງເລິກແລະຂະຫຍາຍກວ້າງອອກຢ່າງບໍ່ຢຸດຢັ້ງ, ແລະໄດ້ເສີມຂະຫຍາຍບົດບາດສຳຄັນທີ່ສຸດໃນການຊຸກຍູ້ການພັດທະນາດ້ານເສດຖະກິດສັງຄົມຂອງປະເທດສະມາຊິກ, ເສີມສ້າງກຳລັງແກ່ງແຍ່ງສັງລວມຂອງອະນຸພາກພື້ນ,ແລະຊຸກຍູ້ຂະບວນການເຊື່ອມໂຍງເຂົ້າກັນຂອງເສດຖະກິດອາຊີ.
ທ່ານຫຼິວຈື້ ຫົວໜ້າບັນນາທິການປຶ້ມປົກສີຟ້າດັ່ງກ່າວໃຫ້ຮູ້ວ່າ, ພາຍໃຕ້ສະພາບລວມທີ່ການຟື້ນຕົວຂອງເສດຖະກິດໂລກ ກຳລັງປະສົບຄວາມຫຍຸ້ງຍາກຢ່າງຫຼວງຫຼາຍນັ້ນ, ນະໂຍບາຍໃໝ່ດ້ານການເປີດປະຕູສູ່ພາຍນອກຂອງຈີນໃນໄລຍະໃໝ່ໄດ້ເຮັດໃຫ້5ປະເທດໃນອະນຸພາກພື້ນແມ່ນ້ຳຂອງຄືລາວ, ຫວຽດນາມ, ມຽນມາ,ໄທແລະກຳປູເຈຍໄດ້ມີການພັດທະນາຢ່າງວ່ອງໄວໃນດ້ານເສດຖະກິດໃນປີ2012ຜ່ານມາ,ໂດຍ ເສດຖະກິດຂອງ5ປະເທດນີ້ລ້ວນແຕ່ໄດ້ບັນລຸການເຕີບໂຕໃນລະດັບຫຼາຍກວ່າ 5%.
ປຶ້ມປົກສີຟ້າລະບຸວ່າ, ແຕ່ປີ2012ເປັນຕົ້ນມາ,ການເຄື່ອນໄຫວດ້ານການຕ່າງປະເທດຂອງປະເທດອະນຸພາກພື້ນແມ່ນ້ຳຂອງໄດ້ມີການພັດທະນາຢ່າງມີຊີວິດຊີວາແບບບໍ່ເຄີຍມີມາກ່ອນ, ປະເທດໃຫຍ່ທີ່ຢູ່ນອກອະນຸພາກພື້ນເຊັ່ນອາເມລິກາ,ຍີ່ປຸ່ນແລະອິນເດຍໄດ້ມີສ່ວນຮ່ວມເພີ່ມ ຂຶ້ນຢ່າງຫຼວງຫຼາຍໃນອະນຸພາກພື້ນແມ່ນ້ຳຂອງ, ການເຄື່ອນໄຫວໄປຢ້ຽມຢາມຕ່າງປະເທດ ຄັ້ງທຳອິດຂອງທ່ານບາຣັກໂອບາມາພາຍຫຼັງທີ່ທ່ານໄດ້ຂຶ້ນຮັບຕຳແໜ່ງປະທານາທິບໍດີອາເມລິກາອີກສະໄໝໜຶ່ງນັ້ນກໍ່ແມ່ນການເຂົ້າຮ່ວມກອງປະຊຸມສຸດຍອດອາຊີຕາເວັນອອກແລະພ້ອມທັງໄປຢ້ຽມຢາມກຳປູເຈຍ, ໄທແລະມຽນມານຳອີກ. ສາມາດເວົ້າໄດ້ວ່າ, ອະນຸພາກພື້ນແມ່ນ້ຳຂອງໄດ້ກາຍເປັນສະຖານທີ່ທົດລອງຍຸດທະສາດກ້ຳເກິ່ງຄືນອີກຢູ່ອາຊີປາຊີຟິກຂອງອາເມລິກາແລະເປັນສະໜາມແຂ່ງຂັນລະຫວ່າງປະເທດໃຫຍ່. ທ່ານມາສ້ຽວຈຸ່ນ ສາສະດາຈານຂອງສະຖາບັນຄົ້ນຄວ້າຍຸດທະສາດສາກົນຂອງໂຮງຮຽນທິດສະດີພັກສູນກາງພັກກອມມູນິດຈີນເຫັນວ່າ, ຈີນຄວນປະສານງານການພົວພັນລະຫວ່າງປະເທດໃຫຍ່ຢ່າງເຕັມທີ່, ເພື່ອໃຫ້ເປັນສະພາບທີ່ຕ່າງຝ່າຍຕ່າງມີຜົນປະໂຫຍດ.