ວົງການທ່ອງທ່ຽວຂອງໄທເຫັນວ່າ ກົດໝາຍວ່າດ້ວຍການທ່ອງທ່ຽວສະບັບໃໝ່ຂອງຈີນຈະຍົກສູງຄຸນນະພາບການທ່ຽວໄທ
ສື່ມວນຊົນໄທລາຍງານໃນຫວ່າງມໍ່ໆມານີ້ວ່າ, ກົດໝາຍວ່າດ້ວຍການທ່ອງທ່ຽວສະບັບໃໝ່ຂອງຈີນທີ່ຈະເລີ່ມປະກາດໃຊ້ນັ້ນອາດຈະພາໃຫ້ຄ່າໃຊ້ຈ່າຍໃນການໄປທ່ຽວໄທເພີ່ມຂຶ້ນ, ເຮັດໃຫ້ຈຳນວນນັກທ່ອງທ່ຽວຈີນຫຼຸດລົງຢ່າງວ່ອງໄວ. ຕໍ່ເລື່ອງນີ້, ບຸກຄົນວົງການທ່ອງທ່ຽວຂອງໄທກ່າວວ່າ, ໃນຂະນະທີ່ຄ່າໃຊ້ຈ່າຍໃນການໄປທ່ຽວໄທສູງຂຶ້ນນັ້ນກໍ່ຈະເຮັດໃຫ້ຄຸນນະພາບດ້ານການທ່ອງທ່ຽວໄດ້ຮັບການຍົກສູງຂຶ້ນ, ນີ້ມີຜົນດີຕໍ່ຂະແໜງການທ່ອງທ່ຽວຂອງຈີນແລະໄທພ້ອມກັນ.
ທ່ານອັນເສີນ ເງົາຣັງສີ, ຮອງຫົວໜ້າກົມທ່ອງທ່ຽວແຫ່ງຊາດໄທທີ່ຮັບຜິດຊອບວຽກງານຕະຫຼາດອາຊີແລະປາຊີຟິກໃຕ້ເຫັນວ່າ, ພາຍຫຼັງໄດ້ອອກກົດໝາຍວ່າດ້ວຍການທ່ອງທ່ຽວສະບັບໃໝ່ແລ້ວ, ຈຳນວນນັກທ່ອງທ່ຽວຈີນທີ່ໄປທ່ຽວໄທກໍ່ຈະຫຼຸດລົງໃນລະດັບໃດໜຶ່ງ, ແຕ່ສະພາບການແບບນີ້ພຽງແຕ່ເກີດຂຶ້ນໃນໄລຍະໜຶ່ງເທົ່ານັ້ນ, ຈະບໍ່ແກ່ຍາວເປັນເວລາຍາວນານ. ຜູ້ປະກອບການໃນຂະແໜງການທ່ອງທ່ຽວຂອງໄທຕ້ອງກຽມພ້ອມໃຫ້ດີ, ເພື່ອໃຫ້ສອດຄ່ອງກັບສະພາບເປັນໄປຂອງກົດໝາຍສະບັບນີ້.
ຕາມສະຖິຕິ, ປີ 2012, ນັກທ່ອງທ່ຽວຈີນທີ່ໄປທ່ຽວໄທໄດ້ມີເຖິງ 2 ລ້ານ 8 ແສນເທື່ອຄົນ. ພຽງແຕ່ໃນ 6 ເດືອນຕົ້ນປີນີ້, ນັກທ່ອງທ່ຽວຈີນທີ່ໄປທ່ຽວໄທກໍ່ໄດ້ບັນລຸເຖິງ 2 ລ້ານ 2 ແສນເທື່ອຄົນແລ້ວ, ຄາດວ່າໃນໝົດປີ 2013 ຈະຫຼາຍກວ່າ 4 ລ້ານເທື່ອຄົນ. ຈີນຈະສືບຕໍ່ຮັກສາຖານະທີ່ເປັນປະເທດແຫຼ່ງນັກທ່ອງທ່ຽວອັນດັບໜຶ່ງຂອງໄທ.
